LIPOH 3 - AMÜSA BAIBEL (BSI)

Nyitsarünü Yocho Mühnyicho

¹ Abüdongba Tsingrangba-nü külüpcho yola mürü tsü khura asithsa licho. Mürü tsünü khingkutpü te tsingdhingcho, “Nühjü te tbü la tsünü tu sing chahnüsü singsih mütsunung Tsingrangba-nü yuje yocho mah-o?”

² Khingkutpü tsünü lalingcho, “Ihjünü tbü la tsü alongla yaba singdong chah tsü khu apa masü chahnü singsih tsunung kohle.

³ Tsingrangba-nü hütsüba singdong chah tsünü singsih mütsunung mahkhang athahpü mii müthahpünung; ko tsukhang, sünungepü yoko.”

⁴ Mürü tsünü lalingcho, “Hütsü arahkheh, nührü müsünung.

⁵ Tunüo khode nührünü hütsü tsunang, nührü Abi kyo kangnung ko atsa amütsa müdhe kangnung Abinü müdhechonü hütsüta yocho.”

⁶ Khingkutpü tsünü hiba singdong tsü adhingnung atsa ko asih tsü atsunung tsara ngucho ko müdhe kangnung tsü khüta anyemüyangnung pü lümcho. Achotsü abükyünü singsih tsü laa rocho ko tsucho; ko abükyünü anii khyangsü jücho, ko abinü tsucho.

⁷ Anyünü hütsü tsuyeng, anyüh tbhüdeng thsacho müdhe kangcho; achotsü anyünü ngurüsingva xürüta lüpticho.

⁸ Hütsü anyüzehlang Abüdongba Tsingrangba tbü la tsü rachicho anyünü yuchicho, ko anyünü singdong yola Abi tenü rangkhucho.

⁹ Ta Abüdongba Tsingrang-nü adhreba tsü dsicho, “Nüh khüde liro?”

¹⁰ Abinü lalingcho, “Ihnü tbü la Nü yuva yuchiko; ta Ih tbhüdeng thsachonü, Nü tenü drü rangkhucho.”

¹¹ Tsingrangba-nü tsingdhingcho, “Nüh tbhüdengepü sünü yocho? Ihnü nüte tütsuba singsih sü tsucho mah-o?”

¹² Adhrebanü lalingcho, “Nühnü Ite linung jüba khingkutpü tsünü I khyang singsih tsü jücho, ko Ihnü tsucho.”

¹³ Abüdongba Tsingrang-nü khingkutpü te yocho, “Tuepü nühnü hi nguchicho?” Abükyünü lalingcho, “Mürünü Ih thsüyohchü hütsü tsusohcho.”

Tsingrangba-nü Yukhacho

¹⁴ Achotsü Abüdongba Tsingrang-nü mürü te yocho, “Nühnü hi nguchicho ngang kanglungrü apüm yola nü müleng chah hiba chokehchola küdunung: Ade tinü nüminü chichinung ko nü kang ayung lihwü tsunung.

¹⁵ Ihnü khingkutpü nühjü arorüh kangsohnung; abi za ko nü za lede arorüh thsanung. Abi zanü nü thah jürüpnung ko nühnü arüh thsühza la mükyühnung.”

¹⁶ Ko Abinü khingkutpü te yocho, “Ihnü nüfü müdingde adhsangthsi alaa ko azarü surode adhsa alaa kangsohnung. Hitanye nühnü nü nii alaa mükhyahnung ko nüh abi dikehrü thsanung.”

¹⁷ Ko Abinü adhreba te yocho, “Nühnü nü nitpü yu nyi Ihnü tütsucho singsih tsü tsuko. Nü thsacholanü alih chokehcholare. Nü kang ayung kheseh nguchipü du atsunung ngunung.

¹⁸ Hütsüla za ko zeng chinung ko nühnü rangmü lanü singvarova tsunung.

¹⁹ Khüi alihnü nüh külüpcho nüh thali hütsü mükangde nü romih lanü shikih threh nguchipü du atsunung ngunung. Nüh alihnü külüpcho, nüh thali alih kangnung.”

²⁰ Adam-nü anitpü neng Eve dsicho, tunüo abükyü tsü amüi tsurü apüm atpa.

²¹ Ko Abüdongba Tsingrang-nü Adam ko anitpü nyüh khyang kanglungrü küpnü shü külüp khümsohcho.

Adam ko Eve Nyüh Tbü lanü Iipehcho

²² Hütsüpü Abüdongba Tsingrang-nü yocho, “Adelü nyitsarü tsü Ihsa kyo atsa amütsa müdhe kangko. Akang singdong chahnü singsih latsu, lede akang linung mümülabae.”

²³ Hütsünü Abüdongba Tsingrang-nü Eden tbü lanü abi tsisohcho ko abi thriba alih la tsü nguchisohcho.

²⁴ Hütsüpü Eden tbü nyüchüro lahpi akang singdong shündhün mürosoh nyahnung shulüm Cherufim ko apümlang ximülachehba ariri nohsheng khüdu yohpücho.