LIPOH 28 - AMÜSA BAIBEL (BSI)

¹ Achotsü Isak-nü Jakob dsi müwajü yocho, “Nühnü Kanan-larü tükhyü.

² Ta Mesopotamia la nümü Bethuelrü kulang wüng ko hütsülanü khingkurü nüku Laban-rü tsularü khüdu khyüng.

³ Akohba Tsingrang-nü nüh kuthriba müwajüng, ko tsuzarü khütang müwajüng ko nüh yucho adrong au kangnung.

⁴ Abinü Abraham müwajücho kyo nüh ko nü trah müwajüng ko Tsingrangba-nü Abraham khyang jüba lih khüila nüh liro, hiba kuthsi nühnü khyüng!”

⁵ Hütsüta Isak-nü Jakob tsü Mesopotamia lang Aramea-rü Bethuel tsurü Jakob e Esau nyüh atpa Rebeka amung Laban yanglang müthehcho.

Esau-nü Anitpü Apa Khyücho

⁶ Isak-nü Jakob müwajüpü Mesopotamia lang anitpü khyünung müthehkopü Esau-nü yuchicho. Hütsü du mah, ta khode Isak-nü abi müwajücho, hütsüde Kanan-larü mükhyünung mii yuzeng jükopü yuchicho.

⁷ Ko Jakob-nü au e atpa nyüh yochonyi Mesopotamia lang tsikopü müdhecho.

⁸ Hütsüde au Isak-nü Kanan-larü khyüsohnung mülümba tsü nyichehcho.

⁹ Achotsü abinü Abraham tsurü Ishmael yanglang wücho ko atsularü Nebaiot nirü Mahalat khyücho.

Bethel la Jakob Melang

¹⁰ Jakob-nü Bersheba pehjüpü Haran lang shemüsucho.

¹¹ Nyü züdude abinü ro amüsa müdüm khüdu chihcho, ko hütsüla nyehlicho. Abinü hütsüla lung khüdunü athah khangpü yüpjocho.

¹² Ko abi melang alih lanü ning chii lopa khüdu chah ninglang riwürü jüroli küduli rachi ngucho.

¹³ Ko hütsüla abi müshüm Abüdongba yacho ko abi te yocho, “Ih Abraham ko Isak Tsingrang, Abüdongba lile. Ihnü nüh ko nü chahnü trahchocho khyang nüh yüpjoba lih hi jünung.

¹⁴ Arüh tsü lihpi toi kangnung. Arühnü arüh lih nyüchüro nyüzüdu apümlang sohjeng linung, ko nüh ko nü trah khu Ihnü yucho apüm müwajünung.

¹⁵ Hi lümkehng, nüh khüdederü wünang Ih nüte linung ko nüh tsungtinung ko hiba lih yang Ihnü nüh nüli ronung. Ihnü nüte nyengchocho apüm münguchikhangde Ihnü nüh müpehjünung.”

¹⁶ Hütsüpü Jakob jesucho ko yocho, “Abüdongba hila lile.” Abi hila lipü Ihnü mümüdheko.

¹⁷ Abi drücho ko yocho, “Hiba müdüm hi khüta adrünung! Hi apa mah ta Tsingrangba kuh; ko hi ninglang tbükhüm.”

¹⁸ Hütsüpü nyangnyü khüu mütoh Jakob-nü suropü athah khangba lung tsü khyo amüdhethsa khyümcho. Hütsüpü abinü hütsü michah tuji tungkeh Tsingrangba khyang müsachehcho.

¹⁹ Ko abinü hütsüba müdüm te Bethel pü dsicho. Hütsüla khüdupi Luz yangdi licho.

²⁰ Hütsüpü Jakob-nü Abüdongba te yuchümcho: “Ih wüba langla nühnü Ite zeh ko Ih tsungtikhang ko tsuyongnung ko jengki jükhang,

²¹ ko Iu kulang thali khümcho norokhang, nüh I Tsingrang thsanung.

²² Hiba amüdhethsa lung khyümbala nüh mübünung ko nühnü jücho adhangpi lanü Ihnü nü khyang dhüre nohlüm jünung.”