LIPOH 25 - AMÜSA BAIBEL (BSI)

Abraham Chahnü Apa Trahchocho

¹ Abraham-nü anitpü apa khüdu, anengnü Ketura khyücho.

² Abükyünü abi khyang Zimran, Jokshan, Medan, Midian, Ishbak ko Shua nümüsujücho.

³ Jokshan tsü Sheba ko Dedan nyüh au, ko Dedan chahnü trahchochoti tsü Asshurim, Letushim ko Leummim.

⁴ Midian tsurüti tsü Efa, Efer, Hanok, Abida ko Eldah. Hiri atümung tsü Ketura chahnü trahchocho.

⁵ Abraham-nü abi licho apüm Isak khyang pehjücho;

⁶ ta abi akang lidenü, anitpü apanü nümüsujüba tsurüti khyang tsü jiyü jopehcho. Hütsüpü abinü arüh Isak tenü za nyüchürolangthring tsisohcho.

Abraham Sücho ko Dhrürangcho

^7-8 Abraham kang 175 chii kutsüp lipü sücho.

⁹ Atsunyü Isak e Ishmael nyühnü abi Makpela lungkhi la, Hit-rü Zohar tsurü Efron lih Mamre nyüchüro lahpi tsü dhrürangcho.

¹⁰ Hütsü lih tsü Abraham-nü Hit-rü te lihcho; Abraham anitpü Sara anyüding hütsüla dhrürangcho.

¹¹ Abraham süpü khanglang, Tsingrangba-nü Isak müwajücho. Ko abi “Ih nguba Akang liba Kihkong” shündhün licho.

Ishmael chahnü Trahchocho

¹² Sara kulitpü Ijip-larü Hagar-nü Abraham khyang nümüsujüba Ishmael chahnü,

¹³ arüh asurocho chungnü hiri licho: Nebaiot, Kedar, Adbeel, Mibsam,

¹⁴ Mishma, Duma, Masa,

¹⁵ Hadad, Tema, Jetur, Nafish ko Kedema.

¹⁶ Arüh tsü hung dhüreanyüh jümürüti ko arüh neng tsü yang ko alicho aichi jücho.

¹⁷ Ishmael kang thsih khüdupü sangrepü dhünyeh thsade sücho.

¹⁸ Ishmael chahnü trahchochoti tsü Assyria langla Ijip nyüchüro lahpi Havila ko Shur nyüh kahla licho. Arüh tsü Abraham trah aparü tenü za pathsa licho.

Esau ko Jakob nyüh Surocho

¹⁹ Hiba hi Abraham tsurü Isak yukheh.

²⁰ Isak-nü Bethuel tsulatpü Rebeka, Mesopotamia lanü Aramea-rü khüdu ko Laban ani khyüde abi kang yüre azirü thsacho.

²¹ Rebeka azarü mülichonü, Isak-nü abükyü nengdang Abüdongba te kihchicho. Ko Abüdongba-nü abi kihchicho laling Rebeka afü müdeng kangsohcho.

²² Abükyünü arüp hicho ko arüh müsurode, longlanü anyüh khatamüsucho. Abükyünü yocho, “Tuepü I chah hi kyo tikehro?” Hütsünü abükyünü Abüdongba te tsingdhingnung wücho.

²³ Abüdongba-nü abükyü te yocho, “Nü mila yucho anyüh zehle; Nühnü arorüh anyüh nümüsunung. Khüdu akhüu tenü tase azeh-u linung; Azibanü azaba dikehnung.”

²⁴ Abükyü azarü suronung becho chihcho ko dhrezarü arüp nümüsucho.

²⁵ Akhuba tsü amürüm ko afü tsü anbühnü chitipü surocho, hütsünü aneng Esau dsijücho.

²⁶ Anyüuba tsünü Esau thsühza chah khahkhah ramehpü surocho, hütsünü aneng Jakob dsijücho. Arüh surode Isak kang rohre thsacho.

Esau-nü Abi Thsiking Icho

²⁷ Ko azarüti tsü zicho, ko Esau tsü shu-iirü axangcheh, rangthrünung mürurü ko Jakob tsü alonglüm, kuh la du licho.

²⁸ Isak-nü Esau müicho, tunüo abinü Esau-nü rangthrücho tsu licho ta Rebeka-nü Jakob müicho.

²⁹ Nyümong khüdu Jakob hikih külüpchi yade, Esau rangmülangnü kyahsehpü lungcho.

³⁰ Esau-nü Jakob te yocho, “Ih kyahsehko, I khyang hikih tsü aza tieng.” (Hütsünü abi neng Edom dsicho.)

³¹ Jakob-nü yocho, “Nühnü I khyang nü aukhuba thsiking jüpü du tihnung.”

³² Esau-nü yocho, “Ih asürüe; aukhuba thsiking tsünü Ih tu jingchonung!”

³³ Jakob-nü lalingcho, “Nü thsiking tsü I khyang jünungepü akhu yuchüm.” Esau-nü yuchüm abi thsiking tsü Jakob khyang jücho.

³⁴ Hütsüpü Jakob-nü abi khyang hümdhse ko hikih tsü jücho. Abinü hütsü tsuyongcho ko shemüsu tsicho. Hütsüta Esau-nü abi aukhuba thsiking mükhimüchopehcho.