LIPOH 24 - AMÜSA BAIBEL (BSI)

Isak ko Rebeka

¹ Adelü Abraham khütang shi kangcho, ko abinü nguchicho lüpchola Abüdongba-nü müwajücho.

² Abinü akulirü aziba, sü abi kuthsi apüm michah xüküm licho abi te yocho, “I phüm pohki nü kheh tohyohchüng ko yuchüm.

³ Nühnü I tsurü khyang Kanan-larü yolanü anitpü thsanung mükhyüjünungepü Ihnü nü khyang ninglih Tsingrang, Abüdongba nengla yuchümsohnyüre.

⁴ Ta nühnü I surolih yang wüng ko Ihrü tsutpurü yolanü I tsurü Isak khyang anitpü khüdu yangchijüng.”

⁵ Ta kulibong tsünü tsingdhingcho, “Khingkutpü tsünü kuh pehpü I yola hiba lih lang müronyükhang khütanung? Ihnü nü tsudhre tsü nüh roba lih lang tsü thali müthehnung mah-o?”

⁶ Abraham-nü lalingcho, “I tsudhre thali hütsülang tüwüsoh.

⁷ Ning Tsingrang, Abüdongba-nü Iu kuh lanü ko I tsutpurü lih lanü Ih norocho, ko Abinü hiba lih hi I chahnü trahchochoti khyang jünung nyengchoko. Nühnü I tsudhre khyang anitpü ngujünung nengdang, abinü nü müngu ariwürü müthehnung.

⁸ Khingkutpü tsünü nü yola müronyükhang, hiba yuchüm lanü nüh mülang mülinung. Ta tusü thsanye I tsurü hütsülang tünowü.”

⁹ Achotsü kulibong tsünü abi abüdongba Abraham phüm pohki akheh tohyohchü abinü yocho kyo nguchinung yuchümcho.

¹⁰ Hütsüpü kulibong, sü Abraham kuthsi michah xüküm licho, abinü abi abüdongba yo ut dhüre nüpü ko abi abüdongba chahnü jiyü athrochehcho adhangpi hipü Nahor yangdi Mesopotamia kihku lang shemüsucho.

¹¹ Khode abi wüchihcho, abinü yangdi jüp kihkong khüdu te abi ut-ti tsü yüpjosohcho. Hütsü anyüzehlang khingkurüti kih khanung roba bekhyah thsacho.

¹² Hütsüpü abinü dangkhidangnangcho, “Abüdongba, I büdongba Abraham Tsingrang, chünye I khyang akoh ngusohng, ko I büdongba Abraham te Nü anyengchotacho yohpüng.

¹³ Ih yangdi lazalarü kih kha ronung kihkong la yale.

¹⁴ Ihnü arüh yola nyüh khüdu te, Yanglilüm Ih kih yongnung nü kihbong dhichoung pü yonung. Abükyünü, ‘yong, ko Ihnü nü ut-ti khyangsü hirojünung pü yokhang; hütsü Nü dikehrü Isak khyang Nühnü throchehba tsü thsasohng.’ Hi tikehkhang, Nühnü I büdongba te Nü anyengchotacho yohpülepü müdhenung.”

¹⁵ Abi müdangkhidangnang zah-e, Rebeka apünurü chah kihbong khüdu dhipü rocho. Abükyü tsü Abraham ani Nahor ko anitpü Milka nyüh tsurü Bethuel tsulatpü thsacho.

¹⁶ Abükyü tsü atsah khütang tsacho ko amüdhsengcheh lazarü khüdu thsacho. Abükyünü kihkong lang tsü jowü abong jeng kha hipü thalicho.

¹⁷ Kulibong tsünü shang wünü abükyü shiro yocho, “Yanglilüm, nü kihbong lanü I khyang kih aza tieng.”

¹⁸ Abükyünü yocho, “Yong, adirü” ko abükyünü apünurü chahnü akihbong tsü akheh la dhicho yongsohcho.

¹⁹ Khode abi yongkacho, abükyünü yocho, “Ihnü nü ut-ti khyangsü arüh xodhrüm kha tihnung.”

²⁰ Abükyünü akihbong lanü kih tsü kanglungrü tbhü la tungyohpü thali wünü kih tsü kha kanglungrü apüm khyang tihcho.

²¹ Nyitsarüba tsü sahmüthsapü Abüdongba-nü alümcho tsü tikehsohlepü dhingyacho.

²² Khode abükyü tsü thümcho, nyitsarüba tsünü hon imüshi khüdu khyücheh anabong la yohjücho ko akheh la hon khehmüyang amülülah anyüh sehjücho.

²³ Hütsüpü abinü tsingdhingcho, “Nüu süo? Ko nührü kuh la Ih ko I müyangrü shomülang yüpnung adeng mülio?”

²⁴ Abükyünü lalingcho, “Iu tsü Nahor ko Milka anyüh tsurü Bethuel lile.

²⁵ Ko ihrü kuh la manying ko rangtsang kükyo lile; ko nührü müdongnungsü lile.”

²⁶ Hütsüde nyitsarüba tsünü mükhukeh Abüdongba mübücho.

²⁷ Abinü yocho, “I büdongba Abraham Tsingrang, sünü I büdongba te abi anyengchocho yuje cho yohpücho abi neng seing. Abüdongba-nü müchongkhüti I büdongbarü jünirü kuh yang Ih noroko.”

²⁸ Lazatpü tsünü atparü kulang shang wünü hütsüri nengdang tsü yocho.

²⁹ Rebeka amung khüdu anengnü Laban licho ko abinü Abraham kulirü yacho kihkong lang tsü shang wücho.

³⁰ Laban-nü ani nabong la imüshi ko akheh la khehmüyang tsü ngucho ko nyitsarüba tsünü abükyü te yocho yu tsü yuchipü licho. Abinü kihkong la abi ut-ti yola yaba Abraham kulibong yanglang tsü wünü yocho,

³¹ “I yola kulang rung. Nüh Abüdongba-nü müwajücho nyitsarü khüdue. Nüh tuepü yanglong hila yaro? Ihrü kuh la nü shulüm amüdongchah khütang lile, ko nü ut-ti nengdangsü ayüpchah lile.”

³² Achotsü nyitsarüba tsü iiwücho ko Laban-nü ut-ti chahnü khe tsü zangchocho ko arüh khyang manying ko rangtsang tüpcho. Hütsüpü abinü Abraham kulibong ko abi müyangrü khyang jing thsütohnung kih hirojücho.

³³ Khode tsuyongnung hirojücho, nyitsarüba tsünü yocho, “Ihnü tu yonung liro hütsü müyoedelü Ihnü mütsuyongnung.” Laban-nü yocho, “Young.”

³⁴ Achotsü abinü yocho, “Ih Abraham kulirü lile.”

³⁵ “Abüdongba-nü I büdongba khütang müwajü abi alirü kangko. Abinü abi khyang san, miza, misü atii atii, taripi, hon, ayurü khingkurü adhrerü, ut ko gadu jüko.

³⁶ I büdongba nitpü Sara-nü ashilang azarü khüdu nümüsujüko, ko I büdongbanü abi licho lüpcho abi khyang jüko.

³⁷ I büdongbanü abi yuzeng nyinung I khyang yuchümsohko. Abinü yocho, I tsurü khyang anitpü thsanung Kanan-larü yolanü tüthro.

³⁸ Ta Iu nyitsarü, I tsutpurü yanglang wüng ko abi khyang anitpü khüdu throjüng.

³⁹ Hütsüde Ihnü I büdongba te tsingdhingcho, ‘Khingkutpü tsünü I yola müronungekhang khütanung?’

⁴⁰ Abinü lalingcho, ‘Ihnü lede yochonyibong Abüdongba-nü nü bekhu ariwürü müthehnung ko nüh akoh ngusohnung. Nühnü I tsurü khyang Ipu nyitsarü, Iurü tsutpu lanü anitpü khüdu ngujünung.

⁴¹ Yuchüm lanü tsiphunung nü nengdang lang khüdu du lile: Nühnü Ihrü tsutpurü yanglang wüpü arühnü imohkhang, hütsüpü du nüh mülang mülinung.’

⁴² “Chünye Ih kihkong tsü ro chihde, Ihnü dangkhidangnangcho, ‘Abüdongba, I büdongba Abraham Tsingrang, I nguchichola akoh ngusohng.

⁴³ Ih kihkong hila lile. Khode lazalarü khüdu kih khanung ronang, Ihnü abükyü kihbong lanü I khyang kih tiengpü tsingdhingnung.

⁴⁴ Abükyünü hepü tikhang ko I ut khyangsü kih hiro tikhang, hütsüba tsü I büdongba tsurü khyang nühnü throba tsü thsasohng.’

⁴⁵ Ih müdangkhidangnang zah-e, Rebeka kihbong khüdu apünurü chah dhipü ro kihkong lang tsü züducho. Ihnü abükyü te yocho, ‘Yanglilüm I khyang kih tieng.’

⁴⁶ Abükyünü zahnü kihbong tsü dhichopü yocho, ‘Yong ko Ihnü nü kanglungrü khyang mii tihnung.’ Achotsü Ihnü yongcho ko abükyünü I kanglungrü khyang mii tihcho.

⁴⁷ Ihnü abükyü te tsingcho, ‘Nüu süo?’ Ko abükyünü lalingcho, ‘Iu tsü Nahor ko Milka nyüh tsurü Bethuel lile.’ Achotsü Ihnü anabong la imüshi ko akheh la khehmüyang yohjücho.

⁴⁸ Hütsüpü Ihnü mükhukeh Abüdongba mübücho. Ih müchongkhüti I büdongbarü tsutpurü kuh yang norocho, ko abi tsurü khyang khyüjünung arüh tsulatpü nguchonü Ihnü I büdongba Abraham Tsingrang nengsere.

⁴⁹ Ade, nührünü I büdongba te yochonyi ko yuje cho bichiekhang Ite young; mahkhang Ih tu nguchinungnang dhrongchehnung.”

⁵⁰ Hütsüde Laban e Bethuel nyühnü lalingcho, “Hiba khiyu hi Abüdongba chahnü rocho tsü, adhrongchehba tsü ihrünü khyünung mah.

⁵¹ Rebeka hila lile; abükyü nowüng. Ko Abüdongba apunü yocho kyo, nü büdongba tsurü nitpü kangsohng.”

⁵² Khode Abraham kulibongnü hütsü yuchicho, abinü mükhukeh Abüdongba mübücho.

⁵³ Hütsüpü abinü jengki, hon, taripi ko thsidi kohro khyücheh Rebeka khyang jücho. Abinü atpa ko amung khyangsü thsidi jiyü jücho.

⁵⁴ Hütsüpü du Abraham kulibong ko abi müyangrütinü tsuyongcho, ko hütsüla yüpcho. Khode arüh anyangnyü surocho, abinü yocho, “I büdongba yanglang Ih thalinung.”

⁵⁵ Ta Rebeka atpa e amung nyühnü yocho, “Lazatpü tsü ihrü te nyükhih-o mahkhang nyümong dhüre lisohng, hütsüpü du notsieng.”

⁵⁶ Ta abinü yocho, “Ih tümünusoh. Abüdongba-nü I lang khangthrujürü tsü, I büdongba yanglang Ih thalinung.”

⁵⁷ Arühnü lalingcho, “Ihsanü lazatpü tsü dsi abükyünü tonang tsingdhingnung.”

⁵⁸ Achotsü arühnü Rebeka dsi tsingdhingcho, “Nyitsarü hivi yola nüh müwünyüo?” Abükyünü lalingcho, “Wünung.”

⁵⁹ Achotsü arühnü Rebeka ko arüh kulirü aziba Abraham kulirü ko abi müyangrü yola wüsohcho.

⁶⁰ Ko arühnü yu hiri yo Rebeka müwajücho: “Alechü, nüh mükhilong atpa kang! Nü chahnü trahchochonü arüh rorüh yangditi kohchehnung!”

⁶¹ Hütsüpü Rebeka ko abi müyanglarüti rungnümpü Abraham kulibong yola wünung ut chah küducho, ko arüh atümung shemüsucho.

⁶² Hütsüde Isak-nü “Ih nguba akang liba Kihkong” akungaselih la tsü rocho ko Negev-la licho.

⁶³ Abinü anyüzehlang rachinung wücho ko ut-ti rochi ngucho.

⁶⁴ Khode Rebeka-nü Isak ngucho, abükyünü ut chahnü jürocho

⁶⁵ ko Abraham kulibong te tsingcho, “Langla Ihsa yanglang rochi yaba tsü süo?” Abinü lalingcho, “Hütsü I büdongbae.” Achotsü abükyünü ashü khyo akumüshücho.

⁶⁶ Hütsüpü kulibong tsünü Isak te abinü nguchicho lüpcho yocho.

⁶⁷ Hütsüpü Isak-nü Rebeka tsü atpa Sara shükuh la nüyohcho ko anitpü kangcho. Isak-nü Rebeka müicho, hütsünü atpa sünye abi longkyang licho.