LIPOH 23 - AMÜSA BAIBEL (BSI)

Sara Sücho

¹ Sara kang thsih khüdupü mükyüpü dhünyeh licho.

² Ko abükyü Kanan limih Hebron la sücho, ko Abraham-nü abükyü meshücho.

³ Abinü anitpü asü me tsü pehjüpü wü Hit-rü te yocho,

⁴ “Ih, nührü yola yangpirü khüdu due; I nitpü me rangnung alih aikyah lihsohng.”

⁵ Arühnü yocho,

⁶ “Adirü, Ihrü te nyieng. Nüh ihrü yola langnürü adiuba lile, ihrü kong atsauba la nü nitpü me tsü dhrürang. Abükyü me rangnung ihrü masünü künyang du jünung.”

⁷ Achotsü Abraham-nü arüh jingte mükhukeh yocho,

⁸ “Nührünü I nitpü me rangnung hila mülakhang,

⁹ yanglilüm Zohar tsurü Efron te abi lih nangolang Makpela lungkhi tsü I khyang iengpü nührünü yojüng. Ihnü hütsü kongyo külüpnungthsa hila nührü betenü angang ajeng ngang iengpü yojüng.”

¹⁰ Hütsüla Efron apu mii Hit-rü yola yangdi tbükhüm te pümcho; ko abinü hütsüla lirü atümungnü yuchi yocho,

¹¹ “Nyieng, adirü; Ihnü nü khyang lutri apümnü lungkhi tsü zeh jüre. Hila I nyitsarü bete nü nitpü dhrürangnung Ihnü nü khyang jüre.”

¹² Ta Abraham-nü atümungnü yuchisohnung Hit-rü jingte mükhukeh Efron te yocho,

¹³ “Ihnü nü khyang yanglilüm nyisohnyüre. Ihnü lutri shünü lihnung; angang hi khyüng ko Ihnü I nitpü me rangnung.”

¹⁴ Efron-nü lalingcho,

¹⁵ “Adirü, Iyu nyieng. Alih tsülü shekel taripi thsih müyü lengle, ta Ihjü kahla tu thsanung! Yah dhrürangdung.”

¹⁶ Abraham-nü hütsü nyengcho Hit-rü betenü yuchi thsi shekel thsih müyü tsü shithsabhülehrünü bichiba ahosingnü ho jücho.

¹⁷ Hütsüta Mamre nyüchürolang Makpela la Efron lih tsü Abraham yo kangcho. Hütsüla luh rühsahcho pohki alih, lungkhi ko sing apüm tsü zehcho.

¹⁸ Hütsüta hütsüla zehrü Hit-rü atümungnü hütsü Abraham yoepü müdhecho.

¹⁹ Hütsüpü Abraham-nü anitpü Sara Kanan lih la hütsüba lungkhi la dhrürangcho.

²⁰ Hütsüta Hit-rü lih ko lungkhi tsü kongyo thsanung shulüm Abraham yo kangcho.