LIPOH 22 - AMÜSA BAIBEL (BSI)

Abraham Thsadsücho

¹ Azachah lipü Tsingrangba-nü Abraham thsadsücho; Abinü abi yanglang dsinü yocho, “Abraham!” Abraham-nü lalingcho, “Ih hila lile.”

² Tsingrangba-nü yocho, “Nühnü müibong, nü tsudhre Isak nüng ko Moria lih lang wüng. Hütsüla Ihnü thongunung zong khüdu chah I khyang abi kangmübü jüng.”

³ Nyangnyü khüu mütoh, Abraham-nü kangmübü nengdang sing khürü gadu chah zangkehcho, ko Isak ko kulirü anyüh abi yola nüpü Tsingrangba-nü yocho zonglang tsü shemüsucho.

⁴ Nyümong asangula, Abraham-nü ashulanü müdüm tsü ngucho.

⁵ Hütsüpü abinü kulirü te yocho, “Gadu te nührü hila ying. Azaba ihjü hütsüla tsü wü mübüpü nührü yang thali ronung.”

⁶ Abraham-nü kangmübü nengdang sing tsü Isak khyang dhisohcho ko apunü noh khüdu ko michang thsalangnung michanghi bicho. Anyüh wüyade,

⁷ Isak-nü yocho, “Uwa!” Abinü lalingcho, “Itso, Ih hila lile.” Isak-nü tsingdhingcho, “Nü kheh la Ihnü sing ko michang ngure, ta kangmübü shulüm sanza khüyo?”

⁸ Abraham-nü lalingcho, “Tsingrangba apunü jünung.” Hütsüta anyüding mütozah wücho.

⁹ Khode arühnü Tsingrangba-nü yocho müdüm tsü chihcho, Abraham-nü bholu khüdu külüpcho ko hütsü michah sing tsü zangkehcho. Hütsüpü abinü atsudhre tsü rahpü bholu la sing michah dhikehcho.

¹⁰ Hütsüpü abinü abi kyüsehnung anoh dhimüsucho.

¹¹ Ta Abüdongba riwürünü ninglangnü abi dsi yocho, “Abraham, Abraham!” Abinü lalingcho, “Ih hila lile.”

¹² Abinü yocho, “Azaba chah nü kheh tüthah mahkhang abi chah tu tünguchi. Nühnü Tsingrangba drürepü adelü Ihnü müdheko, tunüo nü tsurü khüdu du licho nühnü I khyang jünung müditpang.”

¹³ Abraham-nü dhingmükangcho ko singtrung khüdula san bongtho khüdu ajühnü vihkehya ngucho. Achotsü abinü wü hütsü hiro atsudhre mülih kangmübü trüp mübücho.

¹⁴ Hütsünü Abraham-nü hütsüba müdüm te “Abüdongba-nü jüre” pü dsicho. Ko chünye yingcheh “Abüdongba zong chah abinü jüre” pü chore.

¹⁵ Abüdongba riwürünü anyüpiu ninglangnü Abraham te yocho,

¹⁶ “Ihnü Ipu nengla yuchümre, Abüdongba-nü yore, Ihnü nüh khütang müwajünung. Tunüo nühnü hi nguchichonü ko nü tsurü khüdu du licho I khyang jünung müditpangchonü,

¹⁷ Ihnü nü khyang ningchah chenghiti ko kihbekhümla lihpi kyo nü chahnü trahchosohnung yuchümre. Nü trahnü arüh rorüti kohnung.

¹⁸ Nühnü I yuzeng nyichonü limih la yucho apüm nü trah khu müwajünung.”

¹⁹ Hütsüpü Abraham-nü akulirü yang thalicho, ko Abraham liyaba Bershebalang arüh apüm thali wücho.

Nahor Chahnü Trahchocho

²⁰ Khü lipü ani Nahor khyang Milka-nü azarü keh nümüsujüko pü Abraham-nü yuchicho:

²¹ Aukhuba tsü Uz, hütsü tung Buz, hütsü tung Aram au Kemuel,

²² hütsü tung Chesed, Hazo, Pildash, Jidlaf ko Rebeka au Bethuel.

²³ Hiri adhrerü keh tsü Milka-nü Abraham ani Nahor khyang nümüsujücho.

²⁴ Nahor asham Reuma-nüsü Teba, Gaham, Tahash ko Maka nümüsujücho.