LIPOH 2 - AMÜSA BAIBEL (BSI)

¹ Hütsüta ninglih ko hütsüla liba apüm rungnümcho.

² Adhünyeh nyümong chihdelü Tsingrangba-nü Abi nguchi thümcho, ko dhünyeh nyümonglü Abinü kyahshangcho.

³ Abinü dhünyeh-u nyümong tsü müwajücho ko pathsa nyümong kang yohpücho, tunüo hütsü nyümong tsü nguchi thümcho ko kyahshangcho.

⁴ Hütsüta ninglih tsü thricho. Abüdongba Tsingrang-nü ninglih thride,

Eden Tbü

⁵ limih la singdonglidong mülicho ko singvarova müchiecho, tunüo Abinü tsing mümütheh-echo ko luh thsanung süsü mülicho;

⁶ ta alih yonglangnü kih chüro alih tsü kyangcho.

⁷ Hütsüpü Abüdongba Tsingrang-nü alih lanü alih hirocho ko hütsü khu nyitsarü külüpcho; anabong la akang sah mehyohjücho ko nyitsarü tsü akang liba khüdu kangcho.

⁸ Hütsüpü Abüdongba Tsingrang-nü nyüchürolang Eden la tbü khüdu külüpcho ko Abinü thriba nyitsarü tsü hütsüla yohpücho.

⁹ Abinü hütsüla singsih sihba atsah atsa singdongti chisohcho. Tbü longla akang singdong ko atsa amütsa müdhesohba singdongtisü yasohcho.

¹⁰ Eden lanü yongkhi khüdu pohcheh tsicho ko tbü tsü hütsünü kyangjücho; Eden khupü hütsü yongkhi müyü kang changnahcho.

¹¹ Akhudiba yongkhi tsü Pishon; hütsü Havila limih mükang pohre.

¹² (Hütsüla amüdhsengcheh hon ko axümlichi atsauba thsidi lungsü ngure.)

¹³ Anyüuba yongkhi tsü Gihon; hütsü Kush limih mükang pohre.

¹⁴ Yongkhi asanguba tsü Tigris, hütsü Assyria nyüchürolang pohre, ko müyüuba yongkhi tsü Eufrates.

¹⁵ Hütsüpü Abüdongba Tsingrang-nü nyitsarü tsü Eden tbü la tsü nguchinung ko nyahnung yohpücho.

¹⁶ Abinü abi te yocho, “Nühnü tbü la singdong masü chahnü singsih tsunung kohle,

¹⁷ ta atsa amütsa müdhesohba singdong chahnü nühnü tütsu. Khüi nyümong nühnü hütsü tsunang nüh sünung.”

¹⁸ Hütsüpü Abüdongba Tsingrang-nü yocho, “Adhrerü tsü müleng linung mütsa. Ihnü abi te trotanung aphishu khüdu külüpnung.”

¹⁹ Hütsüpü Abinü alih lanü alih hirocho ko kanglungrü apüm ko uza apüm külüpcho. Hütsüpü Abinü arüh tsü nyitsarü yang aneng jüsohnung norocho; hütsüta nyitsarü tsünü tu dsijücho hütsü arüh neng kangcho.

²⁰ Hütsüta nyitsarü tsünü uza apüm ko kanglungrü apüm neng dsijücho; ta arüh yola abi tronungthsa süsü mülicho.

²¹ Hütsüpü Abüdongba Tsingrang-nü adhrerü tsü yüpsülahsohcho ko abi yüpseh lide, Abinü athringrü khüdu khyüchehcho ko aiha tsü münatijücho.

²² Abinü thringrü tsünü khingkurü khüdu thricho ko abi yang abükyü tsü norojücho.

²³ Hütsüde adhreba tsünü yocho, “Achangkala, hila Ipu kyo khüdu lile, I rüh lanü arüh, ko I shutsa lanü shutsa. Abükyü te Khingkurü pü dsinung, tunüo abükyü adhreba chahnü khyüchehcho.”

²⁴ Hütsünü adhrerünü atpa ko au pehjünung ko anitpü te lümkha linung ko anyüh shuh khüdu kangnung.

²⁵ Adhreba ko khingkutpü anyüding tbhüdeng licho ta anyüh müshahtapü licho.