LIPOH 17 - AMÜSA BAIBEL (BSI)

Azengtacho Amüdhethsa Aküp Müjüp-pehcho

¹ Abram kang kurepü düku azirü thsade, Abüdongba-nü chüro abi te yocho, “Ih Akohba Tsingrang, I yocho nyieng ko achomükeh lieng.

² Ihnü nüte Ih azengtacho külüpnung ko nü chahnü khütang trahchosohnung.”

³ Abram-nü aromih alih la hüpkehcho ko Tsingrangba-nü yocho,

⁴ “Ihnü nüte hiba azengtaba külüpre: Nüh yucho adrong au kangnung.

⁵ Adelü nü neng Abram müdsinung ta Abraham pü dsinung; tunüo Ihnü nüh yucho adrong au kangsohko.”

⁶ Nü chahnü khütang trahchosohnung ko arüh khürü yangthsarü kangnung. Nü chahnü adrong trahchonung ko arühnü yuchoti kangnung.

⁷ “Ihnü nüte ko nü chahnü trahchochoti te aronung shang apüm la azengtacho müchangkapü yohpünung. Ih nü Tsingrang ko nü chahnü trahchochoti Tsingrang thsanung.

⁸ Ihnü nüh ko nü chahnü trahchochoti khyang ade nührü shirüthsa liba lih hi jünung. Kanan lih apüm hi lede nengdang nü chahnü trahchochoti yo kangnung, ko Ih arüh Tsingrang thsanung.”

⁹ Tsingrangba-nü Abraham te yocho, “Nühnüsü Ite azengtaba hi yohpüng ko nü chahnü trahchochoti nüsü aronung shang apüm la yohpüng.

¹⁰ Nüh ko nü chahnü trahchochotinü yangthsa la ayah khüdu kyo nührü yola adhrerü apüm adhrerü yo aküp müjüp-pehnung nyengchoung.

^11-12 Ade tinü nührünü nyümong keh pide adhrerü akhunga atümung ko ayurü chahnü surocho ko shuparü tenü licho thsanye apüm aküp müjüp-pehng. Ko Ihjü kahla azengtaba amüdhethsa tsü hütsü linung.

¹³ Nyitsarü müipi aküp müjüp-pehnung ko hiba shutsala amüdhethsa tsü nüte Ih azengtaba tsü müchangka linung.

¹⁴ Adhrerü, sü mümüjüp-pehnang abilü I nyitsarü roh-i mükhichinung, tunüo abinü Ite azengtaba müyohbü.”

¹⁵ Tsingrangba-nü Abraham te yocho, “Nühnü adelü nü nitpü te Sarai pü müdsinung ta abükyü te Sara pü dsinung.

¹⁶ Ihnü abükyü müwajünung ko abükyü khu nü khyang azarü khüdu jünung. Ihnü abükyü müwajünung ko abükyü yuchoti atpa kangnung ko abükyü chahnü trahchocho lanü yangthsarü chüronung.”

¹⁷ Hütsüde Abraham-nü mükhurangnü münyücho ko apu te yocho, “Kang thsih khüdu ashirünü azarü lichehnung ang? Kang kure ashilarü Sara-nü azarü linung ang?”

¹⁸ Abraham-nü Tsingrangba te yocho, “Ishmael uthring I thsiking khyürü kangsohng.”

¹⁹ Ta Tsingrangba-nü yocho, “Nü nitpü Sara-nü nü khyang azarü khüdu nümüsujünung ko nühnü aneng Isak dsijünung. Ihnü abi te ko abi chahnü trahchochoti te I azengtacho yohpünung. Hiba hi müchangkaba azengtaba lile.

²⁰ Ishmael nengdang kihchicho Ihnü yuchiko, hütsüeko Ihnü abi müwajünung ko abi chahnü khütang trahchonung. Abi yangthsarü dhüreanyüh au kangsohnung ko abi trah tsü Ihnü yucho arangcheh kangsohnung.

²¹ Ta sekang hitade Sara khu suronung liba nü tsudhre Isak te Ihnü azengtaba yohpünung.”

²² Khode Tsingrangba-nü Abraham te chotakacho, Abinü abi pehjüpü tsicho.

²³ Hütsüba nyümong tsünü Abraham-nü Tsingrangba yochonyi Ishmael ko arüh kuh la adhrerüecho atümung, arüh kuh la kulilarünü surocho ko alicho atümung müjüp-pehcho.

²⁴ Abraham müjüp-pehde abi kang kurepü düku

²⁵ ko Ishmael kang dhüreasang thsacho.

²⁶ Anyüding ko kulirüti atümung zeh,

²⁷ nyümong khüdunü aküp müjüp-pehcho.