LIPOH 16 - AMÜSA BAIBEL (BSI)

Hagar ko Ishmael

¹ Abram nitpü Sarai-nü abi khyang azarü münümüsujücho. Ta abükyü ayularü khüdu anengnü Hagar licho,

² achotsü abükyünü Abram te yocho, “Abüdongba-nü I khyang azarü suronung müjü. Hütsüeko I kulilatpü te mükhong. Abükyünü I khyang azarü lijünung kohle.” Achotsü Abram-nü Sarai-nü yochonyicho.

³ Hütsüta abükyünü anii khyang Hagar tsü asham thsanung jücho. (Hi Abram Kanan la kang dhüre lipü tikehcho)

⁴ Abram-nü Hagar te mükhongcho, ko abükyü fü müdeng kangcho. Khode abükyü fü müdeng pü abükyünü müdhecho, abükyünü müthseh kang Sarai mükhimüngucho.

⁵ Hütsüde Sarai-nü Abram te yocho, “Hagar-nü Ih mükhimünguba hi nühnüe. Ihnü nü khyang abükyü jücho, ta abükyü fü müdengcho müdhe tinü, abinü Ih mükhimüngure. Abüdongba-nü Ihjü sü yujenang yu khaang!”

⁶ Abram-nü lalingcho, “Dhing, abükyü tsü nü yuhlarüe, ko nü pohki lile; abükyü chah nühnü tu nguchinyüro nguchieng.” Hütsükolü Sarai-nü abükyü tsü dira mütsa bichichonü abükyünü rang tsicho.

⁷ Ko Abüdongba riwürünü lipilih Shur langla kihna khüdula Hagar shiro yocho,

⁸ “Sarai yuhlatpü Hagar! Nüh khüdenü rocho ko khüde würo?” Abükyünü lalingcho, “Ih I büdongtpü tenü rang tsire.”

⁹ Abinü yocho, “Thali wüng ko abükyü pohki lieng.”

¹⁰ Hütsüpü abinü yocho, “Ihnü nü chahnü mükhilong trahchosohnung.

¹¹ Nühnü adhrezarü khüdu nümüsunung ko abi neng Ishmael dsijünung, tunüo Abüdongba-nü nü alongri yuva yuchiko.

¹² Ta nü tsudhre tsü rangmü gadu kyo linung; abinü atümung nyümnung ko atümungnü abi nyümnung. Abi tsutpurü atümung tenü za linung.”

¹³ Hagar-nü alüm la abükyü te tsingdhingcho, “Ihnü yuje Tsingrangba ngupü hütsü nengdang yonung lirü mah-o?” Hütsünü abükyü te chotaba Tsingrang te “Nguba Tsingrang” pü dsicho.

¹⁴ Hütsü khu nyitsarünü Kadesh e Bered nyüh kahla kihkong te tsü “Beer Lahai Roi” khüiba adüzü Ih Nguba “Akang Liba Kihkong” pü dsicho.

¹⁵ Hagar-nü Abram khyang azarü khüdu nümüsujücho ko abinü Ishmael pü dsicho.

¹⁶ Hütsütade Abram kang qurepü dhüroh azirü thsacho.