LIPOH 15 - AMÜSA BAIBEL (BSI)

Tsingrangba-nü Abram te Zengchotacho

¹ Hi khanglang, Abram-nü müngucheh khüdu ngu Abüdongba-nü abi te yo yuchicho, “Abram Tüdrü. Ihnü dhsürü lanü nüh tsungtinung ko jiyü amülah jünung.”

² Ta Abram-nü lalingcho, “O Abüdongba Tsingrang, Ih azarü mülirü tsü I khyang Nü jiyü tsü tu thsanung? I thsiking khyürü tsü Damaskasrü Eliezer du kangko.

³ Nühnü I khyang tsuzarü müjü, ko I yurü khüdunü I kuthsi khyünung.”

⁴ Hütsüde Abüdongba-nü abi te thali chota yuchicho, “Hiba ayuhbong Eliezer-nü nü kuthsi mükhyünung; nü thsiking khyürü tsü nüpu tsurükhung thsanung.”

⁵ Abüdongba-nü abi yanglonglang nücheh yocho, “Ning chah tsü kehchü dhing ko chenghiti tsü khidhing; nü chahnü hütsü toi trahchonung.”

⁶ Abram-nü Abüdongba chah yudsicho ko hütsü khu abi te Abüdongba künyangcho ko abi khyüchocho.

⁷ Hütsüpü Abüdongba-nü abi te yocho, “Hiba limih Ihnü nü khyang jünung Babylon lih Ur lanü nüh norobong Ih, Abüdongba.”

⁸ Ta Abram-nü tsingdhingcho, “O Amichahba Tsingrang, Ihnü hütsü I yoepü khüta müdhenung?”

⁹ Abinü lalingcho, “I yanglang kang asang za misü adhsühi khüdu, miza khüdu ko mizapung khüdu ko mümüdhrü khüdu ko kuh-mümüdhrü khüdu hirung.”

¹⁰ Abram-nü Tsingrangba yang kanglungrü tsü hirocho, ko phohrüp anyüh kangpü müshüm müshümta achung anyüh thsa yohpücho; ta abinü uza-lü müphorüpcho.

¹¹ Ameti chah tsü hogon jürocho, ta Abram-nü iipehcho.

¹² Nyü züduchide, Abram yüpsülah tsicho, ko aring-adrü arangcheh abi chah rocho.

¹³ Abüdongba-nü abi te yocho, “Nü chahnü trahchochoti, shupa lih la shirü kang linung; arüh hütsüla ayurü thsanung ko kang thsih müyü arüh mütsa bichinung.

¹⁴ Ta arüh nyüpmüsehba yucho tsü Ihnü khingchinung, ko arüh hütsüba shupa limih pehjüde arühnü kuthsi adrong khyünung.

¹⁵ Nüpusü dee kutsüp linung, tbachi sünung ko dhrürangnung.

¹⁶ Ko arüh hila shang müyüula thali ronung; tunüo Ihnü Amor-rü münyi müjengmülüm-ede arüh mütsepehnung.”

¹⁷ Khode nyü tsü züducho ko marürahcho, michang füh khüdula mikhu ko mihmüle dhrongyengnü chürocho ko kanglungrü khanah yohpüba kahla tsünü tsicho.

¹⁸ Hütsü nyümong Abüdongba-nü Abram te azengtaba külüp yocho, “Ihnü nü majüh khyang alih hi apüm Ijip lanü Eufrates yongkhi chii,

¹⁹ Ken-rü, Keniz-rü, Kadmon-rü,

²⁰ Hit-rü, Periz-rü, Refaim-rü,

²¹ Amor-rü, Kanan-rü, Girgash-rü ko Jebus-rü lih apüm zeh jünung.”