LIPOH 14 - AMÜSA BAIBEL (BSI)

Abram-nü Lot Khümchocho

¹ Yangthsarü müyü, Babylon yangthsaba Amrafel, Ellasar yangthsaba Ariok, Elam yangthsaba Kedorlaomer ko Goiim yangthsaba Tidal-nü,

² aparü yangthsarü: Sodom yangthsaba Bera, Gomora yangthsaba Birsha, Adma yangthsaba Shina, Zeboim yangthsaba Shemaber ko Bela (mahkhang Zoar) yangthsaba arüh münga nyüm khatanung wücho.

³ Hiri yangthsarü münganü Siddim ngah la tsungphung khüdu kangcho. (Siddim tsü ade Asü kihdi.)

⁴ Arüh tsü Kedorlaomer pohki kang dhüreanyüh licho, ta kang dhüreasangu lalü arühnü abi nyüm yacho.

⁵ Kang dhüremüyüula, Kedorlaomer ko abi te tsungphung khüdu thsarü yangthsarütinü Asterot Karnaim la Refaim, Ham la Zuzim, Kiriathaim ngah la Emim,

⁶ ko Edom zong la Hor-rü, lipilih achangka Elparan chii iiwücho.

⁷ Hütsüpü arühnü Kadesh (hütsütade Enmishpat) lang mükangmüla thali rocho. Arühnü Amalek-rü lih apüm kohchehcho ko Hazazon Tamar la lirü Amor-rü kohchehcho.

⁸ Hütsütade Sodom, Gomora, Adma, Zeboim ko Bela la yangthsarütinü Siddim la khatade

⁹ Elam, Goiim, Babylon ko Ellasar la yangthsarüti müyü nyüm yangthsarü münganü khatacho.

¹⁰ Angah tsü shukuh zengnü jeng licho ko Sodom e Gomora yangthsarü khatala tsünü rang tside hütsüri shukuh la tsü dhrümyohcho; ta aparü yangthsarü asanglü azonglang tsü tsicheh tsicho.

¹¹ Yangthsarü müyü tsünü Sodom e Gomora la tsü tsuyongba mii zeh lüpcho khyüpü tsipehcho.

¹² Abram ani tsurü Lot Sodom la licho, achotsü arühnü apu ko akuthsi apüm hitsicho.

¹³ Ta nyüh khüdu tsicheh ro Ibrirü Abram, sü Amor-rü Mamre yo langsing shündhün licho, abi te yocho. Mamre ko anirüti Eshkol ko Aner-rü tsü Abram te kehta licho.

¹⁴ Khode Abram-nü ani tsurü rang tsiko pü yuchicho, abinü rothsarü atümungnü 318 dsibülungcho ko Dan chii yangthsarü müyü tsü iiwücho.

¹⁵ Hütsüla abinü abi nyitsarüti amülungmülung changnahcho, ko arorüh tsü amala becho ko arüh kohchehcho. Abinü arüh Damaskas kihku lahpi Hobah chii iiwücho,

¹⁶ ko kengcho tsiba kohro tsü thali khyücho. Abinü ani tsurü Lot, abi kuthsi ko khingkurü ko aparü arangtsirü zeh nüli rocho.

Melkizedek-nü Abram Müwajücho

¹⁷ Abram-nü Kedorlaomer ko aparü yangthsarüti kohpü thalide, Sodom yangthsabanü abi mütohnung Shaveh Ngahlang wücho. (Yangthsaba Ngah püsü dsicho.)

¹⁸ Ko Salem la yangthsaba ko Amichahba Tsingrang bebürü Melkizedek-nü hümdhse ko yongkha hiro,

¹⁹ abi müwajücho ko yocho, “Ning ko alih külüpba Amichahba Tsingrang-nü Abram müwajüng!

²⁰ Amichahba Tsingrang, sünü nü khyang akoh jücho, abi seing!” Ko Abram-nü Melkizedek khyang abinü kengchocho apüm lanü dhüre nohlüm jücho.

²¹ Sodom yangthsabanü Abram te yocho, “Akengchocho tsü nüh khyüng, ta I khyang I müyurü atümung thali jüng.”

²² Abram-nü lalingcho, “Ihnü ninglih külüpba Amichahba Tsingrang, Abüdongba jingte yuchümre,

²³ Ihnü nü yo shechang khüdu mii mahkhang jingkhüm yo khüdu mii mükhyünung. Hütsünü du nühnü khodesü Ihnü Abram alirü kangsohchoepü müchonung.

²⁴ I nyitsarünü tsucho chah khu Ihnü Ipu nengdang tusü mükhyünung. Ta I yola würü Aner, Eshkol ko Mamre, arüh khyang arüh nohlüm khyüsohng.”