LIPOH 13 - AMÜSA BAIBEL (BSI)

Abram ko Lot Nyüh Zacho

¹ Abram-nü Ijip lanü Negev lang anitpü ko akuthsi apüm hipü tuwücho ko Lot abi yola wücho.

² Abram akang kuthsi, hon ko taripi la dee alirü kangcho.

³ Hütsüpü abinü Negev pehjüpü Bethel lang müdüm müdümla lii wücho. Abinü akhulang shükuh thsaba Bethel e Ai nyüh kahla müdüm tsü ro chihcho

⁴ ko abinü hütsüla bholu khüdu külüpcho ko abinü Abüdongba mübücho.

⁵ Lot-sü san, miza ko misü ko abi kukhi ko kulirüti licho.

⁶ Anyüh kanglungrü drongra licho ko arüh lamungchah kükyo mülichonü anyüh müjang linung mütsacho.

⁷ Ko Abram e Lot nyüh kanglungrü nyahrü yübütacho. Hütsütade yingcheh Kanan-rü ko Periz-rü hütsüla licho.

⁸ Achotsü Abram-nü Lot-te yocho, “Ihjü mahkhang Ihjü kanglungrü nyahrü kahla müyübütabae, tunüo Ihjü jünirüe.

⁹ Hütsüeko Ihjü zanung. Nühnü mürucho alih throchehng. Nüh khüulang wüng, ko Ih akhüulang wünung.”

¹⁰ Lot-nü dhingmükangcho ko Jordan ngah apüm, Zoar lang wübalang tsü Abüdongba Tbü mahkhang Ijip ngah kyo kih thangchi li ngucho. (Hi Abüdongba-nü Sodom ko Gomora müchangjüde.)

¹¹ Hütsüta Lot-nü Jordan ngah apüm throcho ko nyüchüro lahpi shemüsu tsicho. Hütsüta anyüh tsü zacho.

¹² Abram Kanan lih la licho, ko Lot angah yangditi yola licho ko Sodom amünyeh abinü shükuh thsacho.

¹³ Sodom la nyitsarütinü amükhyu ko Abüdongba nyüm amünyi arangcheh nguchicho.

Abram Hebron lang Shehmüicho

¹⁴ Lot tsiko khanglang, Abüdongba-nü Abram te yocho, “Nüh yabala tsünü apümlang mükangmüla dhing.

¹⁵ Nühnü nguba lih hi apüm nüh ko nü shümtsurü khyang jünung ko hütsü lede nü yo thsanung.

¹⁶ Ihnü nü majüh alih lihpi roh-i kangsohnung; ko nyüh khüdunü alih lihpi khidhingchehkhang, nü majühsü khidhingchehnung.

¹⁷ Ade, wüng ko Ihnü nü khyang jüba lih tsü jücho dhing.”

¹⁸ Achotsü Abram-nü ashükuh lohmüinü wü Hebron la Mamre yo langsing arangcheh shündhün licho, ko hütsüla abinü Abüdongba khyang bholu khüdu külüpcho.