LIPOH 12 - AMÜSA BAIBEL (BSI)

Tsingrangba-nü Abram Dsicho

¹ Abüdongba-nü Abram te yocho, “Nü limih, nü tsutpurü ko nü kuh pehjüng, ko Ihnü nüte ngusohnung limih khüdulang shemüsung.

² Ko Ihnü nü khyang khütang trahchosohnung ko yucho arangcheh khüdu kangsohnung; nü neng disohnung ko nüh amüwajüba kangsohnung Ihnü nüh müwajünung.

³ “Nüh müwajürü Ihnü müwajünung, Ta nüh chokehcholarü Ihnü chokehcholanung. Ko nüh khu Ihnü yucho apüm müwajünung.”

⁴ Abram kang nyührepü münga thsade, Abüdongba-nü yocho kyo Haran lanü shemüsucho; ko Lot abi yola wücho.

⁵ Abi yola anitpü Sarai, ani tsurü Lot ko akuthsi apüm ko Haran la lide nübülungcho kulirü atümung nüpü Kanan lang shemüsucho.

⁶ Khode arüh Kanan chihcho, Abram-nü limih tsü bong dhingnü ro Shekem müdüm More-la liba amüsa langsing chii rocho. Hütsütade hütsüba lih la tsü Kanan-rü lii yacho.

⁷ Ko Abüdongba-nü Abram te chüro yocho, “Ihnü nü majüh khyang jünung liba limih tsü hi lile.” Hütsüta Abram-nü abi te chüro nguba Abüdongba khyang hütsüla bholu khüdu külüpcho.

⁸ Hütsüpü abinü kihjinglang azong lih Bethel yangdi nyüchürolang jowücho ko nyüzüdulang Bethel ko nyüchürolang Ai nyüh kahla shükuh thsacho. Hütsülasü abinü bholu khüdu külüpcho ko Abüdongba mübücho.

⁹ Hütsüta abinü Kanan kihjinglang müdüm khüdu lanü khüdu shehmüi wücho.

Abram Ijip la

¹⁰ Ta Kanan la yangkong licho ko hütsüba yangkong tsü dirachonü azachah shulüm Ijip lang alinung jowücho.

¹¹ Ijip lurü khunung thsade, abinü anitpü Sarai te yocho, “Nüh atsah atsa khingkurüe.

¹² Ijip-rünü nüh ngude, arühnü nüh I nitpüepü lüm Ih müpsehnung ko nüh khyünung.

¹³ Arüh te nüh I nirüepü young; hütsütakhang nü nengdangnü arühnü Ih mümüpsehnung ko tsa bichinung.”

¹⁴ Khode abi Ijip chihcho, Ijiprünü anitpü tsü dee tsa ngucho.

¹⁵ Khode yangthsaba thsazirünü abükyü tsü ngucho, yangthsaba te abükyü tsacho tsü yocho; achotsü abükyü tsü yangthsaba kulang nowücho.

¹⁶ Abükyü khyanglangnü yangthsabanü Abram tsa bichicho ko abi khyang san ko miza, misü ko gadu, kulirü ko ut hiri jücho.

¹⁷ Ta yangthsabanü Sarai khyücho khu Abüdongba-nü abi chah ko abi kukhi chah dhsara amütsa küdusohcho.

¹⁸ Achotsü yangthsabanü Abram dsiro abi te tsingdhingcho, “Nühnü I chah hi tu nguchicho? Tuepü nühnü abükyü tsü nü nitpüepü Ite müyocho?

¹⁹ Tuepü nü niepü yocho ko I nitpü thsanung khyüsohcho? Nü nitpü hila lile; abükyü khyüng ko tsipehng!”

²⁰ Yangthsabanü anyitsarü khyang yuzengjücho ko arühnü arüh lih lanü Abram ko anitpü ko abi kuthsi apüm zeh iipehcho.