LEVIRÜ 9 - AMÜSA BAIBEL (BSI)

Aron-nü Kangmübü Jücho

¹ Khachehthro ayah thüm nyümong tsü, Mosa-nü Aron ko atsurüti ko Israel zirüti dsicho.

² Abinü Aron te yocho, “Lapha mükeh misü bongtho ko sanpung khüdu hirung ko Abüdongba khyang mübüng, misü bongtho tsü münyi mübü ko sanpung tsü trüp mübü nengdang.

³ Hütsüpü Israelrü te münyi mübü nengdang mizapung khüdu, trüp mübü nengdang tu achomükeh misü kang khüdu ko sanza kang khüdu za khüdu,

⁴ ko akehta mübü nengdang misüpung khüdu ko sanpung khüdu hironung young. Arühnü Abüdongba khyang hütsüri tsü tuji la yohrüta tsang mübü amübü jüng. Arühnü hi nguchibae, tunüo Abüdongba-nü chünye arüh te chüro ngusohnung.”

⁵ Mosa-nü yocho lüpcho arühnü Shükuh bete tsü hirocho ko hütsüla Abüdongba mübünung amülung apüm shimükhongcho.

⁶ Mosa-nü yocho, “Abüdongba ahechi nührü te chüronung nengdang hiri apüm nguchinung abinü nührü khyang yuzeng jüre.”

⁷ Hütsüpü abinü Aron te yocho, “Nührü ko müyurü münyi pehnung shulüm nühnü bholu lang tsü wüng ko münyi mübü ko trüp mübü mübüng. Abüdongba-nü mülacho roh-i, müyurü münyi hitsinung shulüm hiba amübü hi jüng.”

⁸ Aron-nü bholu lang tsü wücho ko apu münyi mübü nengdang misüpung tsü müpsehcho.

⁹ Atsurütinü ashüh tsü hirojücho ko abinü hütsüla amüyungza dhsangcho ko bholu nangolang liba ajüh chah tsü khürü münohcho ko anyingcho tsü bholu yingte tungkehjücho.

¹⁰ Hütsüpü abinü asu, akhüling ko amüci atsauba tsü Abüdongba-nü yocho roh-i bholu chah tsü trüpcho.

¹¹ Ta abinü ashutsa ko aküp tsülü dongkhu trüpcho.

¹² Abinü apu trüp mübü nengdang kanglungrü tsü müpsehcho. Atsurütinü ashüh tsü hirojücho ko abinü bholu müyüdinglang tungkehjücho.

¹³ Arühnü abi khyang athah ko atsehmüngang apüm jücho ko abinü hütsüri bholu chah trüpcho.

¹⁴ Hütsüpü abinü bohnying ko athsejing tsü thsütohcho ko trüp mübü michah bholu chah tsü trüpcho.

¹⁵ Hütsüpü, abinü müyurü nengdang amübü jücho. Abinü müyurü nengdang jünungba miza tsü noro müpsehcho ko apu münyi mübü shulüm nguchicho kyo amübü jücho.

¹⁶ Abinü trüp mübü shulüm kanglungrü tsüsü norocho ko yuzeng roh-i amübü jücho.

¹⁷ Abinü tsang mübü jücho ko hüm müyo-o khyo bholu chah tsü trüpcho. (Hi nyümong mükhu trüp mübü chah alahkeh licho)

¹⁸ Abinü müyurü akehta amübü nengdang misüpung ko sanpung tsü müpsehcho. Atsurütinü ashüh tsü hirojücho ko abinü hütsü bholu müyüdinglang tungkehjücho.

¹⁹ Aron-nü misüpung ko sanpung asu tsü kanglungrü akhuh chah kehpücho

²⁰ ko bholu lang tsü hiwücho.

²¹ Abinü asu tsü bholu chah tsü trüpcho ko Mosa-nü mülacho kyo Abüdongba khyang bebürüti nengdang akhuh ko tsalang athsejing tsü pathsa jiyü kang amübü jücho.

²² Khode Aron-nü kangmübü jüba nguchi apüm thümcho, abinü müyurü michah akheh dhimüsu müwajücho ko mütrahcho jürocho.

²³ Mosa ko Aron nyüh Abüdongba liba Shükuh la züducho ko anyüh chürode anyünü müyurü müwajücho ko Abüdongba ahechi arüh yola rocho.

²⁴ Dhrongyengnü Abüdongba-nü michang khüdu müthehcho ko bholu chah trüp mübü ko asu tsü müyahpehcho. Khode müyurünü hütsü ngucho, arühnü akünyangnü khong alih la hapkehcho.