LEVIRÜ 8 - AMÜSA BAIBEL (BSI)

Aron ko Atsurüti Khachehthro

¹ Abüdongba-nü Mosa te yocho,

² “I Shükuh la tsü Aron ko atsurüti nozüdung ko bebü jengki, amüyühsing tuji, münyi mübü nengdang misü bongtho, sanpung anyüh ko bhüpza müyohpü külüpcho hümdhse loh tsü hirung.

³ Hütsüpü amülung apüm hütsüla dsibülung.”

⁴ Abüdongba-nü yuzengjücho kyo Mosa-nü nguchicho ko khode amülung tsü shimükhongcho,

⁵ abinü arüh te yocho, “Ihnü ade tu nguchinung liro, hütsü Abüdongba-nü yuzengjücho nguchire.”

⁶ Mosa-nü Aron ko atsurüti belang norocho ko ayah mütsahnung yocho.

⁷ Abinü Aron chah fükhüm ko jengki khümsohcho ko shürajücho. Abinü bebürü jengki tsü yohjücho ko akyahcho rungrümnü rümjücho.

⁸ Abinü drengtang tsü yohjücho ko hütsü chah Urim ko Thummim yohjücho.

⁹ Ko athahchah kuthri thrijücho ko Abüdongba-nü yocho kyo abelang tsü müsachehcho amüdhethsa hon-nü külüp yohjücho.

¹⁰ Hütsüpü Mosa-nü amüyühsing tuji apüm müyühjücho ko hütsüta Abüdongba khyang müsachehjücho.

¹¹ Abinü tuji khürü khyo bholu tsü dhünyehpili xahcho ko bholu ko hütsüla shingtbhürü apüm ko mütpah-tbhü ko amüdongji zeh arüh müsachehcho.

¹² Abinü Aron thah chah tuji tungkehjü ko müyühjü abi khachehthrocho.

¹³ Hütsüpü abinü Aron tsurüti bekhu norocho ko Abüdongba-nü yocho roh-i arüh fükhüm khümjücho, shürajücho ko arüh thah la kuthri thrijücho.

¹⁴ Hütsüpü Mosa-nü münyi mübü nengdang misü bongtho khüdu hirocho ko Aron ko atsurütinü athahchah arüh khehnü nyümkehcho.

¹⁵ Mosa-nü hütsü müpsehcho ko ashüh khyücheh hütsüla amüyungza dhsangpü hütsü müsachehnung shulüm nangolang bholu jüh chah tsü münohcho. Hütsüpü anyingcho tsü bholu yingte tungkehjücho. Hütsüta abinü hütsü müsachehcho.

¹⁶ Mosa-nü bohnying lanü asu apüm, amüci atsauba ko asu kehpü akhüling khyüchehpü bholu chah trüpcho.

¹⁷ Abinü anyingcho apüm aküp, ashutsa ko axü khyüchehcho ko Abüdongba-nü yocho kyo dongkhu hiwü trüp-pehcho.

¹⁸ Anyüula, Mosa-nü trüp mübü nengdang sanpung hirocho ko Aron ko atsurütinü athahchah arüh khehnü nyümkehcho.

¹⁹ Mosa-nü hütsü müpsehcho ko ashüh tsü bholu müyüdinglang tungkehjücho.

²⁰ Abinü sanpung tsü zangzang khanahcho, abohnying ko athsejing tsü kihnü thsütohcho ko athah, asu ko anyingcho apüm tsü Abüdongba-nü yocho kyo bholu chah tsü trüpcho.

²¹ Hiba trüp mübü hi tsang mübü lile ko hiba axümlichi tsünü Abüdongba künyangsohre.

²² Hütsüpü Mosa-nü bebürüti khachehthronung anyüuba sanpung tsü hirocho ko Aron ko atsurütinü arüh khehnü nyümkehcho.

²³ Mosa-nü hütsü müpsehcho ko ashüh khürü khyo Aron tsalang nangku ying la, akheh tsalang müyungkutrehdi chah ko ajing tsalang müyungkutrehdi chah münohjücho.

²⁴ Hütsüpü abinü Aron tsurüti bekhu noro arüh tsalang nangku ying la, arüh kheh tsalang müyungkutrehdi chah ko arüh jing müyungza adidiuba chah münohjücho. Hütsüpü Mosa-nü ashüh anyingcho tsü bholu müyüdinglang tungkehjücho.

²⁵ Abinü asu, amüyingdongrü su, bohnying müshücho asu apüm, amüci atsauba, akhüling asu kehpü ko tsalang athsejing khyücho.

²⁶ Hütsüpü Abüdongba khyang müsachehcho lanü abinü bhüpza müyohcho hümdhse loh lanü hümdhse khüdu, tuji la külüpcho hümdhse khüdu, apa hümdhse khüdu khyo asu ko tsalang athsejing chah tsü kehpücho.

²⁷ Abinü hiri tsuyongba apüm Aron ko atsurüti kheh la yohjücho ko arühnü hütsü Abüdongba khyang pathsa jiyü jücho.

²⁸ Hütsüpü Mosa-nü arüh khehlanü tsuyongba tsü khyücho, ko khachehthro mübü trüp mübü michah hütsüri tsü bholu michah trüpcho. Hiba hi tsang mübü ko axümlichi tsünü Abüdongba dee künyangsohcho.

²⁹ Hütsüpü Mosa-nü adrengkhu tsü khyo Abüdongba khyang pathsa jiyü thsa jiyücho. Hütsü sanpung khyo khachehthrobala Mosa nohlüm licho. Mosa-nü lüpcho tsü Abüdongba-nü mülacho roh-i nguchicho.

³⁰ Mosa-nü amüyühba tuji ko ashüh khürü bholu chah tsünü khyo Aron, atsurüti ko arüh jengki chah xahkehjücho. Hütsüta abinü arühbürü ko arüh jengki Abüdongba khyang müsacheh jücho.

³¹ Mosa-nü Aron ko atsurüti te yocho, “Abüdongba liba Shükuh trahtrilang shuh tsü hiwüng ko Abüdongba-nü mülacho roh-i hütsü chong ko khachehthroba mübücho lohla liba hümdhse te hütsü tsung.

³² Shunye, hümdhsenye anyingcho tsü trüp-pehng.

³³ Nührü khachehthro ayah nguchi müthümde, nyümong dhünyeh nührünü Shükuh trahtri tüpehjü.

³⁴ Nührü münyi pehnung shulüm chünye Ihsanü tu nguchicho hütsü roh-i du nguchinung Abüdongba-nü Ihsa khyang yuzeng jüko.

³⁵ Nührünü Shükuh trahtri la tsü nyümong dhünyeh ama tsingse Abüdongba-nü mülacho nguchi lieng. Nührünü hütsü münguchikhang, nührü sünung. Hi Abüdongba-nü I khyang yuzengjücho lile.”

³⁶ Hütsünü Aron ko atsurütinü Abüdongba-nü Mosa khu yuzengjücho lüpcho nguchicho.