LEVIRÜ 7 - AMÜSA BAIBEL (BSI)

Thsamehcho Mübü

¹ Thsamehcho mübü nengdang yuzeng hiri khütang Amüsa linung.

² Trüp mübü nengdang kanglungrü müpsehji bholu kihku lahpi chah tsü hiba amübü kanglungrü tsü müpsehnung ko ashüh tsü bholu müyüdinglang tungkehjünung.

³ Asu apüm khyücheh bholu chah mübünung: amüyingdongrü su, bohnying müshüba su,

⁴ akhüling ko hütsü chah kehba asu ko amüci atsauba.

⁵ Bebübanü asu apüm Abüdongba khyang tsuyongba mübü thsa bholu chah trüpnung. Hi mülang mübü lile.

⁶ Bebürü kukhi la adhrerü apümnü hütsü tsunung kohle, ta hütsü Amüsa müdümla dunü tsunung, tunüo hütsü khütang Amüsa lile.

⁷ Münyi mübü ko thsamehcho mübü anyüdingla bichinung yuzeng khüdu lile: Shuh tsü kangmübü jüba bebüba yo thsanung.

⁸ Bebürü sünü trüp mübü kangmübü jünang, hütsüba kanglungrü küp tsü abi yo thsanung.

⁹ Tsang mübü taa chahnü külüpcho mahkhang mütpah-tbhü lanü mahkhang taa chahnü hecho apüm bebürü sünü mübücho abi yo thsanung.

¹⁰ Ta amükülüpcho tsang mübü akungnye mahkhang tuji la yohrütachonye apüm Aron trah bebürü atümung yo ko arüh atümung changtanung.

Akehta Mübü

¹¹ Abüdongba khyang mübünung akehta mübü nengdang yuzeng hiri linung.

¹² Nyüh khüdunü hiba amübü hi Tsingrangba khyang nengse mübü jükhang, abinü kangmübü nengdang kanglungrü te bhüpza müyohpü külüpcho hümdhse: hüm la olive tuji yohrüta külüpcho acheh mahkhang olive tuji zeh nyehnü külüpcho hümdhse jüng.

¹³ Hütsüchah lahkeh bhüpza müyohpü külüpcho hümdhse mübüng.

¹⁴ Abinü Abüdongba khyang pathsa amübü alang müipi lanü nohlüm khüdu jüng; hütsü bebürü sünü kanglungrü shüh bholu chah tungkeh jürünang abi yo thsanung.

¹⁵ Shuh tsü kangmübü jüba nyümong tsünü tsukhangnung; tusü nyangnyü khüu yingcheh münyingnung.

¹⁶ Nyüh khüdunü anyengchocho mahkhang amüküp akehta mübü jükhang, amübü jüba nyümong tsünü mütsukhangkhang, nyümong khüu mii tsunung kohle.

¹⁷ Asang nyümong chii shuh khürü nyingkhang hütsü trüp-pehng.

¹⁸ Asang nyümong chii hütsüri tsukhang, abi amübü mükhyüchonung. Amübü tsü amümüsa roh-i khichinung ko sünü hütsü tsunang abi chah mülang tsü küdunung.

¹⁹ Shuh amümüsa khürü chah thahpükhang, hütsü mütsunung, ta trüp-pehnung. Sü ayahnü müsa liro abinü shuh tsü tsunung kohle,

²⁰ ta sünü mümüsapü hütsü tsunang, abi adelü Tsingrangba tsurü yola mükhiyohnung.

²¹ Adesü, nyüh khüdunü kanglungrü ko nyitsarünye ayahnü amümüsa chah thahpüpü amübü shuh tsü tsukhang, adelü abi tsü Tsingrangba tsurü yola mükhiyohnung.

²² Abüdongba-nü Mosa khyang yuzeng hiri Israelrü nengdang jücho.

²³ Misü, san mahkhang miza su tusü mütsunung.

²⁴ Amükangnü sücho mahkhang rangmü kanglungrünü mükahsehcho kanglungrü shu mütsunung, ta apa dhsütahla bichinung kohle.

²⁵ Sünü Abüdongba khyang tsuyongba mübü jücho kanglungrü lanü asu tsunang, abilü Tsingrangba tsurü yola mükhiyohnung.

²⁶ Khüde khüdesü linye Israelrünü uza mahkhang kanglungrü shüh mütsunung.

²⁷ Sünü yuzeng hi thsangnyangnang abilü Tsingrangba tsurü yola mükhiyohnung.

²⁸ Abüdongba-nü Mosa khyang yuzeng hiri Israelrü nengdang jücho.

²⁹ Sünü akehta mübü jünang, abinü hütsülanü changsho Abüdongba khyang pathsa apu khehlanü tsang mübü hirojüng.

³⁰ Abinü kanglungrü chahnü akhuh zeh asu pathsa Abüdongba khyang jüng.

³¹ Bebübanü asu tsü bholu chah trüpnung, ta akhuh tsülü abi yo thsanung.

³² Athsejing tsalangba tsü sünü

³³ asu ko ashüh akehta mübü jüro abi khyang amükangnü jüng.

³⁴ Kanglungrü chah mii adrengkhu tsü pathsa jiyü ko athsejing tsalang tsü amükangnü Israelrü chahnü Abüdongba-nü khyücho ko bebürü khyang jüre. Hi aronung shang apüm la Israelrünü bebürüti khyang jünung.

³⁵ Hiba hi Aron ko atsurüti bebürü kang khachehthro nyümong Abüdongba khyang mübücho lanü nohlüm jücho lile.

³⁶ Hütsü nyümong Abüdongba-nü Israelrü te arüh khyang hiba amübü lanü nohlüm jünung yuzengjücho. Hi Israelrünü aronung shang apüm la bichinung yuzeng lile.

³⁷ Hütsüta hiri hi trüp mübü, tsang mübü, münyi mübü, thsamehcho mübü, khachehthro mübü ko akehta mübü nengdang yuzeng licho.

³⁸ Lipilih Sinai Zong la, Abüdongba-nü Israelrü te amübü jünung nyümong Mosa khyang yuzeng hiri jücho.