LEVIRÜ 6 - AMÜSA BAIBEL (BSI)

¹ Abüdongba-nü Mosa khyang yuzeng hiri jücho.

² Nyüh khüdunü ajünirü khüdunü zahkehsohcho thali müjü mahkhang lango fonü mahkhang kihyochü

³ mahkhang lango achahchola abinü müngu pü yo Abüdongba nyüm amünyi shitpahkhang, amübü khüdu jünungbae.

⁴ Khode nyüh khüdunü hiri langola dusü amünyi shitpahnang, abinü yuje mücho hirocho apüm nengdang thali jübae.

⁵ Abi thsameh rangcheh nyümong, abinü abüdongrü khyang thsih la mükyü lahkehpü ajeng thali jüng.

⁶ Abinü bebürü yang abi thsamehcho mübü Abüdongba yang lapha mükeh san mahkhang miza khüdu hirung. Angang tsü yuzengnü mülacho aichi khanung.

⁷ Bebübanü nyitsarüba amünyi nengdang kangmübü mübünung ko abi mülangpehjünung.

Üpümnü Trüpba Kangmübü

⁸ Abüdongba-nü Mosa te,

⁹ Aron ko atsurüti te trüp mübü nengdang yuzeng hiri jünung mülajücho. Trüp mübü tsü müyüp bholu chah yohpünung ko michang tsü ama ayung thsanung.

¹⁰ Hütsüpü bebübanü afükhüm ko aphümthri anana khyüpü bholu chahnü mihtru ayühyeh tsü khyücho bholu nangolang yohpünung.

¹¹ Hütsüpü abinü ajengki mülihnung ko mihtru tsü bipü dongkhu ayahnü amüsa müdümla tsü hiwü pehnung.

¹² Bholu chah michang tsü mümehsohpü tahdu yasohnung. Nyangnyü mükhu bebüba tsünü hütsü chah sing tahnung, hütsü michah trüp mübü rungnümnung ko akehta mübü lanü asu tsü trüpnung.

¹³ Bholu chah michang tsü mümehsohpü tahdu yasohnung.

Tsang Mübü

¹⁴ Tsang mübü nengdang yuzeng tsü hiri linung. Aron hung bebürünü bholu bete Abüdongba khyang tsang mübü hirung.

¹⁵ Hütsüpü abinü hüm müyo-o ko tuji ko hütsü michah müchiji kehpü hiri apüm Abüdongba khyang mübücho amüdhethsa bholu chah trüpnung. Amübü hi axümlichi tsünü Abüdongba künyangsohre.

¹⁶ Anyingcho tsü bebürüti tsunung. Hütsü bhüpza müyohpü hümdhse külüpnung ko Abüdongba Shükuh kekhüm Amüsa müdümla tsunung.

¹⁷ Abüdongba-nü tsuyongba mübü lanü changsho arüh khyang jüko. Hi amünyi mübü ko thsamehcho mübü kyo khütang Amüsa lile.

¹⁸ Aronung shang apüm la Aron trah adhrerü atümungnü Abüdongba khyang mübücho tsuyongbala mütozah arüh nohlüm tsu linung. Mübücho tsuyongba chah sünü thahpünang hütsü Amüsa zii tsünü abi dhsakehnung.

¹⁹ Abüdongba-nü Mosa khyang

²⁰ Aron trah bebürü khachehthronung nengdang yuzeng hiri jücho. Abi khachehthro nyümong abinü Abüdongba khyang amübü roh-i hüm süreh khüdu (nyümong mükhu tsang mübü toi) anyangnyü changsho ko anyüzehlang changsho jüng.

²¹ Hütsü tuji la yohrütapü taa chahnü henung ko chenahnung ko tsang mübü Abüdongba te axümlichi akünyang thsa mübüng.

²² Aronung shang apüm la Aron trah la sü Amungthriba Bebü nguchiro abinü hiba amübü hi jünung. Hi Abüdongba kangmübü roh-i apümnü trüpnung.

²³ Bebübanü külüpcho tsang tusü tsunung mükoh; hütsü apüm trüpnung.

Münyi Mübü

²⁴ Abüdongba-nü Mosa te,

²⁵ Aron ko atsurüti te münyi mübü nengdang yuzeng hiri jünung mülajücho. Trüp mübünung kanglungrü müpsehji bholu kihku lahpi tsü münyi mübü nengdang kanglungrü tsü müpsehnung. Hiba hi khütang Amüsa mübü lile.

²⁶ Kanglungrü kangmübü jüba bebüba tsünü Abüdongba liba Shükuh kekhüm lanü hütsü tsunung.

²⁷ Hütsüba kanglungrü shuh tsü sünü ko tunü thahpünang hütsüba Amüsa zii tsünü abi dhsakehnung. Hütsüba kanglungrü shühnü jengki khürüchah münohkhang, hütsü Amüsa müdüm lanü thsütohng.

²⁸ Shuh tsü alih füh khüdula chongkhang, hütsü müpnahpehng ko idhse füh lanü chongkhang, hütsü sehchi thsütohpehng.

²⁹ Bebürü kukhi la adhrerü apümnü hiba amübü hi tsunung kohle; hi khütang Amüsa lile.

³⁰ Ta amünyi mübü lanü Shükuh la ashüh hiro münyi pehnung müsachehbala bichikhang, kanglungrü tsü tütsu; hütsü trüp-pehng.