LEVIRÜ 5 - AMÜSA BAIBEL (BSI)

Amünyi Mübü Dhsütahba Khiyu

¹ Khiyu hirila amünyi mübü dhsütahre. Nyüh khüdu yukhachah yuzi jünung dsipü, abinü ngucho mahkhang yuchicho nengdang tu müchokhang, hütsü abi bha thsanung.

² Khürünü kanglungrü me chah thahpükhang, abinü nguchiba tsü lümchehyeng abi amümüsa mahkhang mülang kangre.

³ Khürünü mümüdhepü tu tu thsanye, nyitsarü amümüsa thahpükhang, abinü nguchiba tsü lümchehyeng abi mülang kangre.

⁴ Khürünü tu tu nengdangnye mülümdhingpü yuchümkhang, abinü nguchiba tsü lümchehyeng abi mülang kangre.

⁵ Khode nyüh khüdu mülangnang, abinü nyengchobae,

⁶ ko abi münyi ngang abinü Abüdongba yang san mahkhang miza atrüh khüdu amübü hirung. Bebübanü abi münyi ngang hütsü kangmübü jünung.

⁷ Nyüh khüdunü san mahkhang miza jünung mükohkhang, abinü Abüdongba yang abi münyi ngang mümüdhrü anyüh mahkhang kuh-mümüdhrü anyüh, khüdu münyi mübü nengdang ko akhüu tsü trüp mübü nengdang hirung.

⁸ Abinü hütsüri bebürü yang hironung ko bebübanü akhu münyi mübü mübünung. Abinü aku tsü müzingsahpü ahongnü xihsehnung ko ashüh tsünü bholu chah xahnung.

⁹ Ko ashüh anyingcho tsü bholu yingte tungkehjünung. Hi amünyi hitsisohnung amübü lile.

¹⁰ Hütsüpü abinü anyüuba uza tsü yuzengnü mülacho kyo trüp mübü mübünung. Hütsüta bebübanü nyitsarüba münyi nengdang kangmübü mübünung ko abi münyi pehjünung.

¹¹ Nyüh khüdunü mümüdhrü anyüh mahkhang kuh-mümüdhrü anyüh jünung mükohkhang, abinü münyi mübü nengdang hüm süreh khüdu hirung. Abinü hütsü michah olive tuji mahkhang müchiji tu müyohnung, tunüo hi tsang mübü mah, ta münyi mübü lile.

¹² Abinü hütsü bebürü yang hironung ko bebübanü hütsü apüm Abüdongba khyang mübücho amüdhethsa müyo-o kangchehnung ko hütsü bholu chah tsang mübü kyo trüpnung. Hi münyi hitsinung amübü lile.

¹³ Hütsüta bebübanü nyitsarüba münyi nengdang amübü jünung ko abi mülangpehjünung. Ko hüm anyingcho tsü tsang mübüde kyo bebürü khyünung.

Thsamehcho Mübü

¹⁴ Abüdongba-nü yuzeng hiri Mosa khyang jücho.

¹⁵ Nyüh khüdunü mümüdhepü Abüdongba Amüsa kohro müjükhang, abinü Abüdongba yang thsamehcho mübü lapha mükeh san mahkhang mizapung khüdu hirung. Angang tsü yuzengnü mülacho aichi khanung.

¹⁶ Abinü müjüba nengdang tsü jünung ko thsih la mükyü alaa lahkehpü jünung. Abinü hütsü bebüba khyang jünung ko bebübanü hütsü nyitsarüba münyi nengdang kangmübü jünung ko abi mülangpehjünung.

¹⁷ Nyüh khüdunü mümüdhepü Abüdongba yuzeng thsangnyang amünyi shitpahkhang, abi mülangko, ko akhang jübae.

¹⁸ Abinü thsamehcho mübü nengdang lapha mükeh san mahkhang miza khüdu bebürü yang hironung. Angang tsü yuzengnü mülacho aichi khanung. Bebübanü nyitsarüba münyi nengdang tsü kangmübü mübünung, ko abi mülangpehjünung.

¹⁹ Hiba hi Abüdongba nyüm shitpahcho münyi nengdang thsamehcho mübü lile.