LEVIRÜ 4 - AMÜSA BAIBEL (BSI)

Mümüdhepü Shitpahcho

¹ Abüdongba-nü Mosa te yocho,

² Israelrü te young: khode nyüh khüdunü mümüdhepü amünyi shitpahnang ko Abüdongba yuzeng la mümülacho nguchinang, yuzeng hiri bichieng.

³ Amungthriba Bebübanü amünyi shitpah müyurü michah athsameh hirokhang, abinü misü bongtho achomükeh khüdu hiro abi münyi nengdang Abüdongba khyang kangmübü jüng.

⁴ Abinü misüza tsü Shükuh trahtri la hiro athahchah akhehnü nyümkehpü Abüdongba jingte hütsü müpsehnung.

⁵ Hütsüpü Amungthriba Bebübanü misüpung shüh tsü changsho Shükuhlang tsü hiwünung.

⁶ Abinü ashüh la tsü amüyungza dhsangnung ko Amüsa akitising bete tsü dhünyehpili xahnung.

⁷ Hütsüpü abinü Shükuh la müchiji tahji bholu jüh chah tsü ashüh tsü müyühnung. Abinü ashüh anyingcho tsü Shükuh trahtri la kangmübü tahji bholu yingte tungkehjünung.

⁸ Hiba misüpung chahnü asu apüm khyüchehnung, abohnying la asu,

⁹ akhüling ko hütsüri chah kehcho asu ko amüci lanü atsaubati.

¹⁰ Bebübanü hiba asu tsü akehta amübü shulüm kanglungrü asu khyo nguchicho roh-i tsü, trüp mübü tahji bholu chah tsü trüpnung.

¹¹ Ta abinü aküp, ashutsa, athah ajing ko abohnying axü zeh hiwü

¹² amüsachehcho tavi wohbhüm chah sing michang la trüp-pehnung.

¹³ Israel yucho shünü mümüdhepü Abüdongba yuzeng thsangnyang amünyi shitpahkhang,

¹⁴ amünyi tsü müdheyeng, yuchonü amünyi mübü misü bongtho khüdu hirobae. Arühnü hütsü Abüdongba liba Shükuh yang hironung;

¹⁵ yucho la azibarünü athahchah arüh khehnü nyümkehnung ko hütsüla tsü müpsehnung.

¹⁶ Amungthriba bebübanü misüpung shüh tsü Shükuh la tsü hizüdunung,

¹⁷ ko hütsüla amüyungza dhsangpü shü kitiji bete tsü dhünyehpili xahnung.

¹⁸ Abinü ashüh changsho Shükuh yonglang nangolang bholu jüh chah xahnung ko anyingcho tsü Shükuh trahtri la liba kangmübü tahji yingte tsü tungkehnung.

¹⁹ Hütsüpü abinü asu apüm khyo bholu chah tsü trüpnung.

²⁰ Abinü amünyi mübü jüpü misüpung chah nguchicho kyo hiba misüpung chahsü nguchinung ko hütsüta abinü müyurü münyi nengdang mübünung ko arüh mülangpehjünung.

²¹ Hütsüpü abinü apu münyi nengdang misüpung trüpcho akyokyo tsü misüpung tsü dongkhu dhi chüdunung ko trüpnung. Hiba hi yuchoshü münyi hitsinung amübü lile.

²² Yangthsarü khüdunü mümüdhepü amünyi shitpah Abüdongba yuzeng thsangnyangkhang,

²³ abi te amünyi tsü müdhesoh, abinü lapha mükeh miza khüdu jüng.

²⁴ Abi khehnü nyümkehpü trüp mübünung müpsehji, bholu kihku lahpi chah tsünü müpsehnung. Hi amünyi hitsinung amübü lile.

²⁵ Bebübanü ashüh la tsü amüyungza dhsangnung, bholu jüh chah yohpünung ko anyingcho tsü bholu yingte tungkehjünung.

²⁶ Hütsüpü abinü akehta mübü nengdang müpsehba kanglungrü su trüpcho akyokyo ashüh apüm tsü bholu chah trüpnung. Hütsüta yangthsarü münyi nengdang bebübanü kangmübü jünung ko abi mülangpehjünung.

²⁷ Müyurü khüdunü mümüdhepü amünyi shitpah Abüdongba yuzeng thsangnyangkhang,

²⁸ abi te amünyi tsü müdhesohyeng, abinü lapha mükeh miza atrüh khüdu amübü jüng.

²⁹ Ko trüp mübünung müpsehji bholu kihku lahpi chah tsünü athahchah akhehnü nyümkehpü müpsehnung.

³⁰ Bebübanü ashüh la tsü amüyungza dhsangnung, bholu jüh chah yohpünung ko anyingcho tsü bholu yingte tungkehjünung.

³¹ Ko abinü akehta mübü nengdang müpsehba kanglungrü chahnü khyüchehcho kyo apüm tsü khyüchehnung ko axümlichi tsünü Abüdongba künyangsohnungthsa abinü hütsü bholu chah trüpnung. Hütsüta bebübanü müyurü münyi nengdang kangmübü jünung ko abi mülangpehjünung.

³² Nyüh khüdunü amünyi mübü san khüdu hirokhang, hütsü lapha mükeh ko atrüh khüdu thsabae.

³³ Abinü trüp mübünung müpsehji, bholu kihku lahpi chah tsünü athahchah akhehnü nyümkehpü müpsehnung.

³⁴ Bebübanü ashüh la tsü amüyungza dhsangnung, bholu jüh chah yohpünung ko anyingcho bholu yingte tungkehjünung.

³⁵ Ko abinü akehta mübü nengdang müpsehba san chahnü khyüchehcho kyo asu apüm tsü khyüchehnung ko abinü Abüdongba khyang tsang mübü jübate tsü yohrüta bholu chah tsü trüpnung. Hütsüta bebübanü nyitsarüba münyi nengdang tsü kangmübü jünung, ko abi mülangpehjünung.