LEVIRÜ 3 - AMÜSA BAIBEL (BSI)

Akehta Amübü

¹ Khode nyüh khüdunü abi misü khüdu akehta amübü jünang, hütsü misüpung mahkhang misü lapha mükeh khüdu jüng.

² Abinü kanglungrü thah chah tsü akhehnü nyümkehnung ko Abüdongba liba Shükuh la züduba trahtri la tsü hütsü müpsehng. Aron hung bebürütinü ashüh tsü bholu müyüdinglang tungkehjünung.

³ Ko kanglungrü tsü hiro changnah Abüdongba khyang mübünung; bohnying la asu apüm,

⁴ akhüling ko hütsü chah asu ko amüci atsauba.

⁵ Bebürünü hiri apüm trüp mübüba yola bholu chah trüpnung. Hiba amübü axümlichi tsünü Abüdongba künyangsohre.

⁶ Lümkhata amübü nengdang san mahkhang miza khyükhang, hütsü apung mahkhang atrüh khyünung kohle, ta tu lapha mükeh thsanungbae.

⁷ Nyüh khüdunü san khüdu amübü jükhang,

⁸ abinü athahchah akhehnü nyümkehpü Shükuh betenü hütsü müpsehng. Bebürütinü ashüh tsü bholu müyüdinglang tungkehjünung

⁹ ko kanglungrü tsü hiroh-i changnah jüng: amüyingdongrü asu apüm, bohnying müshücho asu apüm,

¹⁰ akhüling ko amüshühcho asu ko amüci atsauba.

¹¹ Khehthsithsaba bebübanü hiri apüm Abüdongba khyang tsang mübü trüp mübünung.

¹² Nyüh khüdunü miza khüdu amübü jükhang,

¹³ abinü athahchah akhehnü nyümkehpü Shükuh betenü hütsü müpsehnung. Bebürünü ashüh tsü bholu müyüdinglang tungkehjünung

¹⁴ ko kanglungrü tsü hiroh-i changnah Abüdongba khyang jünung: abohnying la asu apüm,

¹⁵ akhüling ko hütsü amüshüh asu ko amüci la atsauba.

¹⁶ Bebübanü hiri apüm bholu chah Abüdongba künyangsohnung tsang mübüthsa trüpnung. Asu apüm Abüdongba nohlüm lile.

¹⁷ Israelrü sünüsü asu mahkhang ashüh tsunung mükoh; hi Israelrü atümungnü arüh khüdederü linye lede bichinungba yuzeng lile.