LEVIRÜ 26 - AMÜSA BAIBEL (BSI)

Yochonyicho Amüwa (Azk 7.12-24; 28.1-14)

¹ Abüdongba-nü yocho, “Nührünü singkülüp, kyothri lung-dongdi mahkhang lung lanü hamcheh tu tümübü. Tunüo Ih Tsingrang Abüdongba lile.

² Yudsi yangthsa Thsüti yohpüng ko Ih mübüba müdüm drüng. Ih Abüdongba.

³ “Nührünü I yuzeng ko amülaba bichi likhang,

⁴ alihnü tsahma chürosohnung, singdongnü singsih sihsohnung ko Ihnü bechola tsing müthehnung.

⁵ Fürü thangchi linung hütsünü shükusih laanung akyang chii maxa yanung ko machi kyang chii shükusih laa yanung. Nührünü tsunyücho tsunung ko nührü alih la khümcho linung.

⁶ “Ihnü nührü lih la yangtsa jünung ko nührü tu müdrü yüpnung. Ihnü alih la adrünung kanglungrü mülisohnung, ko hütsüla adesü khata mülinung.

⁷ Nührü rorüh michah nührünü akoh ngunung;

⁸ nührü nyüh münganü thsih kohnung, ko nührü thsihnü hajar dhüre kohnung; Nü thsunohrü bete arüh khülunung.

⁹ Ihnü nührü müwajünung ko nührü suhnung; nührü te I azengtacho yohpünung.

¹⁰ Tsangsi hiyohde mii nührü tsang ahi tsuyanung.

¹¹ Ih nührü yola I Amüsa Shükuh la linung ko nührü yolanü ximüla mütsinung.

¹² Ih nührü yola linung; Ih nührü Tsingrang thsanung ko nührü I müyurü thsanung.

¹³ Ih, nührü Tsingrang Abüdongba-nü, nührü ayurüthsa mülisohnung Ijip lanü nührü nüchehcho. Nührü ku tsungmüsupü rachisohnung Ihnü nührü arahcho thsangnyangjüko.”

Yocho Münyicho Akhingchi

¹⁴ Abüdongba-nü yocho, “Nührünü I yuzeng mübichikhang, nührü khingchinung.

¹⁵ Nührünü I yuzeng ko amülaba mübichikhang ko azengtacho thsangnyangkhang,

¹⁶ Ihnü nührü khingchinung. Nührü akang changnungthsa Ihnü amükyangba dhsara ko asüba nührü michah hirojünung. Nührünü ma chiinung, ta tu müxasahnung, tunüo nührü rorünü nührü kohnung ko nührünü yuthsahchehcho tsü arühnü tsunung.

¹⁷ Nührü kohchehnung nengdang Ihnü nührü nyüm yanung ko nührü khura drümüyangchonü sünü mü-iichipü nührünü drü tsinung.

¹⁸ “Hiri apüm tikehpü mii nührünü Iyu mühnyikhang, Ihnü dhünyehpinü alaa nührü khingchinung.

¹⁹ Nührü tüzümükhüm ko müthsehba Ihnü thsangnyangjünung; tsing mürosohnung, ko nührü lih tsü idhse kyo müküp kangsohnung.

²⁰ Nührü müküp nguchicho apüm amii mülinung, tunüo alihnü tu müchürojünung ko singdongtinü asih müsijünung.

²¹ “Hütsüpü mii nührünü rihta Iyu mühnyikhang, Ihnü dhünyehpinü alaa nührü khingchinung.

²² Ihnü nührü yang adrünung kanglungrü müthehnung ko arühnü nührü tsurü mükahsehnung, nührü misü changjünung ko nührü azikyah du nyingsohnung ko hütsünü nührü lang chitisohnung.

²³ “Akhingchi hiri apüm jüpü mii nührünü adesü I yocho mühnyipü mütozah I neng münyijükhang,

²⁴ Ihnü nührü akhudi tenü dhünyehpinü alaa zi khingchinung.

²⁵ Nührünü azengtacho thsangnyangchonü, nührü khingchinung Ihnü khata chürosohnung, ko nührünü tsikehnung yangdila shibülungnye, nührü yola mükyangba dhsara müthehnung ko nührü rorüh kheh la khing jünung.

²⁶ Nührü tsuyongba chixiba yatijünung, ko khingkurü dhürenü arüh licho apüm taphi khüdu lanü du külüpnung. Arühnü hütsü ho-pü jünung; ko nührünü hütsü tsunye mi müjengnung.

²⁷ “Hiri apüm tikehpü mii nührünü mütozah I yocho mühnyikhang,

²⁸ I rihlongchüro nührü akhudi tenü dhünyehpinü alaa amütsau nührü khingchinung.

²⁹ Nührü tsurü mii tsunungthsa nührü khura kongnung.

³⁰ Ihnü akhangchah nührü amübükuh tphünahjünung, nührü müchiji bholu tphahtsujünung ko nührü me tsü kyothri khülucho michah dhiyohchüpehnung.

³¹ Ihnü rihlongchüro nührü yangditi ko mübüji thsangnyangjünung, ko nührü kangmübüti mükhyüchonung.

³² Ihnü yanglih tsü hütsüla liba arorüh mii nyemüyangnungthsa changjünung.

³³ Ihnü nührü michah khata hirojünung ko nührü shirü lih jeng tsishosohnung. Nührü yanglih thrüchahchüpehnung, ko yangditi changpehjünung.

^34-35 Hütsüde alimih tsü akyahshang ajeng ngunung; nührü rorüh lih la yangtsilang lide, hütsü thrüchahchüpeh kyahshang linung.

³⁶ “Nührü yangtsila lirüti drümüyangsohnung ko nyübongnü singvatpah khüdu füchichonü mii nührünü drü tsinung. Khatala arorüh bete tsirü roh-i nührü tsinung ko arorüh amünyehla mülipü mii nührü ngasehnung.

³⁷ Sünüsü mü-iichipü nührübürü khüdunü khüdu chah müthikehnung, ko arorüh nyüm nührünü mükoh khatanung.

³⁸ Nührü rorüh lihnü nührü münyo, yangtsilangnü nührü sünung.

³⁹ Nührü rorüh lih la asünyingrü tsüsü, nührübürü münyi ko nührü tpurüti münyi ngang changnung.

⁴⁰ “Ta nührü chahnü trahchochoti sürünü Ite rihta ko Ih nyüm yacho ko Ihnü arüh nyümsoh, arüh rorüh lih la yangtsilang wüsohcho.

⁴¹ Arühnü arühbürü münyi ko arüh tpurüti münyi nyengchonung. Achangkala khode nührü chahnü trahchochotinü longlüm kangnü, arüh münyi ko nyümchongang akhingchi tsü ngunang,

⁴² Ihnü Jakob, Isak ko Abraham te Ih azengtaba tsü lümchehnung ko Ihnü anyengchocho asi kangchi alih tsü I müyurü khyang jünung.

⁴³ Ta akhu, alih la tsünü nyitsarüti pehnung, hütsüpü dunü akyahshang ajeng ngunung ko arühnü I yuzeng ko amülaba dhsonglicho shulüm akhingchi ngunung.

⁴⁴ Ta, arüh arorüh lih la lide, Ihnü arüh sehchi müthrühchahchüpehnung, mahkhang müchangjünung. Hütsü arüh te I azengtaba changkanung. Ih Abüdongba arüh Tsingrang.

⁴⁵ Ih Abüdongba, arüh Tsingrang thsanung alimih apüm te I tase ngusoh Ijip lanü I nyitsarü nüchehpü arüh jümürü te zengtacho Ihnü lümkehnung.”

⁴⁶ Hiri apüm tsü Israelrü shulüm Sinai khang chah Abüdongba-nü Mosa khyang jücho yuzeng ko amülaba lile.