LEVIRÜ 24 - AMÜSA BAIBEL (BSI)

Dsimüdongji Müshocho

¹ Abüdongba-nü Mosa te yocho,

² Israelrü khyang yuzeng hiri jüng: Mütozah Shükuh la dsi tsü tahkeh yohpünung shulüm olive tuji atsauba tsü hirosohng.

³ Khütang Amüsa Müdümla Yuzeng Singdi bete Aron-nü romang mükhu hütsüri tsü tahkehnung ko nyangnyü khüu yingcheh yohpünung. Hiba yuzeng hi aronung shang apüm la yohpünung.

⁴ Abüdongba kuh la hon amüdhsengnü külüpcho dsimüdongsing chah dsi tsü Aron-nü mümehsohpü xükümnung.

Mübücho Hümdhse

⁵ Hüm süreh dhüreanyüh hiro hümdhse dhüreanyüh külüpm.

⁶ Hon amüdhsengnü külüpcho tsingthsang chah Abüdongba bete hümdhse tsü dhürürohnü chung anyüh kang chung.

⁷ Abüdongba khyang tsang mübü thsanung hümdhse mülih achung anyüdinglang müchiji atsauba yohpüng.

⁸ Aronung shang apüm la Sabath nyümong müipi Abüdongba bete hümdhse tsü yohpüjüng. Hi lede nengdang Israelrü anguchinung.

⁹ Hümdhse tsü Aron ko abi trah yo thsanung ko arühnü hütsü Amüsa müdüm khüdulanü tsunung, tunüo hiba hi bebürü nengdang Abüdongba khyang tsang mübü jücho la khütang Amüsa nohlüm khüdu lile.

Yuje Yukhanung Adüzü

^10-11 Nyüh khüdu au Ijiprü ko atpa Dan tsutpu lanü Dibri tsularü Shelomit chahnü licho. Arüh lichah hiba nyitsarü tsünü Israelrü khüdu te yübütacho.

¹² Yübütaba te tsü abinü Tsingrangba chokehcholacho, achotsü arühnü abi Mosa yanglang nowücho ko khangti yohpüpü abi chah tu nguchinung Abüdongba te tsingdhingcho.

¹³ Abüdongba-nü Mosa te yocho,

¹⁴ “Hütsüba nyitsarü tsü alichahnü dongkhu nochüdung. Abinü chokehcholacho yuchirü atümungnü abi thah chah nyümkeh abi amülanglangepü yuzi jüsohng ko amülung apümnü abi lungnü kengseh süsohng.

¹⁵ Hütsüpü Israelrü te Tsingrangba chokehcholarülü hütsü ngang khingchinung ko süsohnungepü young.

¹⁶ Israelrünye ko hütsüla liba shuparü thsanye, sünü Tsingrangba chokehcholanang, abi kengseh süsohnung.

¹⁷ “Sünü müpsehro abi süsohnung,

¹⁸ ko sünü bürü yo kanglungrü kyüsehnang abinü amülih jünung. Hütsü akang mülih akang.

¹⁹ “Sünü bürü lerohpehjüro, abinü tu nguchicho abi chah hütsü akyokyo nguchinung.

²⁰ Abinü arüh khyahsahjükhang, abi rüh khüdu khyahsahjünung; nahtse mülih nahtse, aha mülih aha. Abinü khüta dhsakehjüro, hütsüta abi chah dhsakehjünung.

²¹ Sünü kanglungrü khüdu kyüsehnang abinü hütsü mülihjünung, ta sünü nyitsarü müpsehnang abi süsohnung.

²² Hiba yuzeng hi Israelrü ko nührü yola liba shuparü atümung nengdang linung, tunüo Ih nührü Tsingrang, Abüdongba lile.”

²³ Khode Israelrü te Mosa-nü hi yocho, arühnü nyitsarüba tsü dongkhu nochüdu kengseh süsohcho. Hütsüta Abüdongba-nü Mosa te yocho kyo Israelrünü nguchicho.