LEVIRÜ 21 - AMÜSA BAIBEL (BSI)

Bebürü Nengdang Yuzeng

¹ Abüdongba-nü Mosa te yocho, bebürü Aron hung te young, “Abürü kuh la au, atpa, atsurü, atsularü, amung mahkhang amüxengcho anilarükhung müthsakhang,

² bebürü süsü asürü me la zeh

³ abürü jangjang münyi mükangbae.

⁴ Abi te dhrelarü lahpinü shükehta licho khunülü apu jangjang amümüsa mükangbae.

⁵ “Bebürü sünüsü abi meshüla zehcho ngusohnung athah mühehbae mahkhang benbüh mühehbae mahkhang afüla mütsehnahbae.

⁶ Abi müsa libae ko I neng mümünyijübae. Abinü I khyang tsang mübü jüre, ko abi müsa libae.

⁷ Bebürü khüdunü nahtranahxenglarü mahkhang amümüdhsengcheh mahkhang azacho khingkurü mükhyübae; tunüo abi Amüsa lile.

⁸ Müyurünü bebürü tsü Amüsaepü lümbae, tunüo abinü I khyang amübü jüre. Ih Abüdongba Amüsa lile, ko Ihnü I müyurü Amüsa külüpre.

⁹ Bebürü tsularü khüdu nahtranahxenglarü kangkhang, abükyünü au khyang ashah hirojüre; abükyü tsü trüpsehpehng.

¹⁰ “Amungthriba bebübanü athahchah tuji müyühjü throchehcho ko bebürü jengki khyünung müsachehcho lile, hütsünü abinü akuva müshüpü müpehjübae mahkhang abi longricho ngusohnung ajengki mürehnahbae.

^11-12 Abi I khyang müsachehchoba lile ko abi jangjangthsa amümüsa mükangbae, mahkhang atpa mahkhang au thsanye asürü me licho kuh la I Amüsa Shükuh pehjüpü züdunü Ih mümünyijübae.

¹³ Abinü amüdhsengcheh lazarü khyübae,

¹⁴ ta chomilarü mahkhang azacho khingkurü mahkhang nahtranahxenglarü khüdu mükhyübae. Abinü anyitsarü yolanü amüdhsengcheh lazarü khüdu du khyübae.

¹⁵ Mahkhang tsuzarü sürü amüsa linung athsalang, arüh amümüsa kangnung. Ih Abüdongba ko Ihnü abi Amungthriba Bebü thsanung pathsa yohpücho.”

¹⁶ Abüdongba-nü Mosa te yocho,

¹⁷ Aron te young, “Nü trah la jingkheh müpisarü sünüsü I khyang amübü jünung mükoh. Hi aronung shang apüm nengdang linung.

¹⁸ Jingkheh müpisarü sünüsü I khyang amübü jünung mükoh: anatohrü, ajingjahrü, müpimüsa, athrimüchüh;

¹⁹ jingkheh jahrü;

²⁰ arungbüm mahkhang amüchüh; nahshehrü mahkhang tsukhangra kehrü; ko axangmicho hitarinü I khyang amübü tüjüsoh.

²¹ Bebürü Aron trah jingkheh müpisarü sünüsü I khyang amübü tüjüsoh.

²² Hitari nyitsarünü I khyang mübücho Amüsa tsang mübü ko khütang Amüsa tsang mübü tsunung kohle,

²³ ta abi jingkheh mütsarü tsü, abinü Amüsa akitising mahkhang bholu chii müronungbae. Abinü hiri Amüsa mümünyijübae, tunüo Ih Abüdongba ko Ihnü arüh Müsa kangsohre.”

²⁴ Hütsüta, hiri tsü Mosa-nü Aron, Aron tsurüti ko Israelrü atümung te yocho.