LEVIRÜ 20 - AMÜSA BAIBEL (BSI)

Yocho Münyicho Ngang Akhingchi

¹ Abüdongba-nü Mosa te yocho, Israelrü te young,

² “Nührü mahkhang nührü yola liba shuparü khürünü Molek tsingrang mübünungla bichinung tsuzarü khürü jükhang, yuchonü abi lungnü kengsehnung.

³ Khürünü Molek khyang tsuzarü jo I amüsa kuh münyijü I neng amüsa nengchüsohkhang, Ihnü abi nyüm yanung ko I müyurü khüdu roh-i mükhiyohnung.

⁴ Abinü nguchiba tsü amülungnü nangyüthsa abi müsüsohkhang,

⁵ nyitsarüba ko abi kukhi ko Molek mübübala zehrü atümung nyüm Ipunü nguchinung. Ihnü arüh tsü I müyurü roh-i mükhiyohnung.

⁶ “Khürünü asülang würü te lümlong chingnung wükhang, Ihnü abi nyüm yanung ko I müyurü roh-i mükhichinung.

⁷ Nührü jangjang müsa lieng, tunüo Ih nührü Tsingrang Abüdongba.

⁸ I yuzeng bichieng, tunüo Ih Abüdongba ko nührü müsa kangjüre.”

⁹ Abüdongba-nü yuzeng hiri jücho. Sünü atpa mahkhang au chokehcholaro abi süsohnung; abi süba tsü apu bha thsanung.

¹⁰ Sünü bürü nitpürü te nahtrahnaxengro, abi ko khingkutpü anyüding süsohnung.

¹¹ Sünü au nitpü khüdu te mükhongnü abi ashah khyüsohro, abi ko khingkutpü anyüding süsohnung. Arüh süba tsü arühbürü bha thsanung

¹² Nyüh khüdunü atsunyahlarü te mükhongkhang, anyüding süsohnung. Anyünü nahtrahnaxengko. Ko anyüh süba tsü anyübünyü bha thsanung.

¹³ Adhrerü khüdunü aparü adhrerü khüdu te mükhongkhang, anyünü athrünyinung nguchiko, ko anyüding süsohnung. Anyüh süba tsü anyübünyü bha thsanung.

¹⁴ Nyüh khüdunü atpa ko atsulatpü anyüding khyükhang, arühnü ashahmükeh nguchibangang tsü arüh asangding süsohnung; hitarilü nührü yola tütikehsoh.

¹⁵ Adhrerü khüdunü kanglungrü khüdu te mükhongkhang, abi ko kanglungrü anyüding süsohnung.

¹⁶ Khingkurü khüdunü kanglungrü khüdu te mükhongnung müküpkhang, abükyü ko kanglungrü anyüding süsohnung. Arüh süba tsü arühbürü bha thsanung.

¹⁷ Nyüh khüdunü ani mahkhang atpa-thsatpü tsulatpü te kuthrikhang, arüh tsü misha ashah khyüsohpü yucho lanü iipehnung. Abinü anilarü te mükhongko, hütsü ngang khingchinung.

¹⁸ Nyüh khüdunü khingkurü ayah rode abükyü te mükhongkhang, anyüding yucho lanü iipehnung, tunüo anyünü ayah amümüsa yuzeng thsangnyangko.

¹⁹ Nyüh khüdunü atpa azatpü te mükhongkhang, anyüh mabomashicho ngang khingchinung.

²⁰ Nyüh khüdunü au azaba nitpü te mükhongkhang, abinü au azaba khyang ashah hirojüre, ko abi ko khingkutpü nyüh tsü khingchinung, anyüh süsü tsuzarü mülinung.

²¹ Nyüh khüdunü amung nitpü khyükhang, arüh tsuzarü mülipü sünung. Abinü amümüsa nguchi nguchiko ko amung ashah khyüsohko.

²² Abüdongba-nü yocho, “Ihnü nührü noroba Kanan lihnü nührü müdhsonglinungthsa, I yuzeng ko amülaba bichieng.

²³ Hütsüla lirü yangthsa tüithsa; hütsüba lih la nührü züdusohnung Ihnü müyudsirü tsü iipehre. Arühnü arüh nguchi amütsanü Ih wahsohko.

²⁴ Ta Ihnü hiba nyikih ko thsakukih pohyaba lih tsü nührü khyang jünung nyengchoko, ko hütsü nührü khyang jünung. Ih nührü Tsingrang Abüdongba ko Ihnü nührü aparü yucho tenü pathsa kangsohko.

²⁵ Hütsüeko nührünü kanglungrü ko uza khüi amüsa ko khüi amümüsa hütsü tsüpm. Amümüsa kanglungrü mahkhang uza tütsu. Ihnü arüh tsü amümüsaepü mishako, ko hütsüri tsuchonü nührü mümüsa kangsohnung.

²⁶ Nührü Amüsa linung ko nührü Iyo du thsanung, tunüo Ih Abüdongba ko Ih Amüsa. Nührü Iyo thsanung Ihnü aparü yucho tenü nührü pathsa yohpücho.

²⁷ “Adhrerü mahkhang khingkurü sünü asülang würü te lümlong chingnang, abi süsohnung; sünü hütsüta nguchinang, abi süba tsü apu bha thsanung.”