LEVIRÜ 2 - AMÜSA BAIBEL (BSI)

Tsang Mübü

¹ Abüdongba khyang tsang mübü hirode, abinü akhudi hütsü hüm kang dongbae. Abinü hütsü michah olive tuji ko müchiji yoh

² ko hütsü Aron hung bebürü yang hirung. Aying thsaba bebüba tsünü hütsülanü hüm müyo-o ko tuji ko müchiji apüm khyo Abüdongba khyang apüm mübücho amüdhethsa bholu chah trüpnung. Hiba amübü axümlichi tsünü Abüdongba künyangsohre.

³ Ko anyingcho tsang mübü tsü bebürüti yo kangnung; ko hütsü Abüdongba khyang mübücho lanü khyüchehchonü, hi dee Amüsa linung.

⁴ Amübü tsü taa lanü tahcho hümdhse thsakhang, hütsü bhüpza müyohcho thsaang. Hütsü hüm la tuji yoh külüpcho hümdhse acheh mahkhang olive tujinü münoh külüpcho hümdhse thsanung kohle.

⁵ Amübü tsü füh la hecho hümdhse thsakhang, hütsü hüm la olive tuji yohcho, ta bhüpza müyohcho thsaang.

⁶ Ko nühnü hütsü amübü kang hirode, hütsü chenahng ko hütsü michah tuji tungkehjüng.

⁷ Amübü tsü aruhfüh lanü ruhcho hümdhse thsakhang, hütsü hüm ko olive tujinü külüpcho thsaang.

⁸ Hütsü Abüdongba yang amübü thsa hirung ko bebüba khyang jüng, abinü hütsü bholu yang hiwünung.

⁹ Hütsü apüm Abüdongba khyang mübücho kyo, hütsülanü amüdhethsa aza khyücheh bholu chah trüpnung. Hiba amübü axümlichi tsünü Abüdongba künyangsohre.

¹⁰ Anyingcho tsü bebürü yo kangnung; ko hütsü Abüdongba khyang mübücho lanü khyüchehchonü hütsü dee Amüsa linung.

¹¹ Nühnü Abüdongba yang hiroba tsuyongba, amübü tusü bhüpza yoh külüpcho müthsabae; nühnü amübü jücho tulasü bhüpza mahkhang thsakukih tüyoh.

¹² Kang mükhu akhu xacho amübü Abüdongba yang hirung, ta hilü bholu chah mütrüpnung.

¹³ Tsang mübü apüm la mih yohng, tunüo mih tsünü nüh ko Tsingrangba kahla azengtacho müdhesohre. (Nührü amübü apüm la mih yohng.)

¹⁴ Khode nühnü Abüdongba yang akhu xacho amübü hironang, tse tsü ruhpü mahkhang dongpü mübüng.

¹⁵ Hütsü michah olive tuji ko müchiji yohng.

¹⁶ Bebübanü hütsülanü khürü amüdhethsa trüpnung ko Abüdongba khyang amübü thsa müchiji apüm tsü trüpnung.