LEVIRÜ 17 - AMÜSA BAIBEL (BSI)

Ashüh Tsunung Yaticho

¹ Abüdongba-nü Mosa te

² Aron ko atsurüti ko Israelrü atümung khyang yuzeng hiri jücho.

³ Israelrü sünü Abüdongba liba chah khu apalang kangmübü jünung misü mahkhang san mahkhang miza müpsehnang, abinü yuzeng thsangnyangko.

⁴ Abinü ashüh tphehko ko adesü Tsingrangba tsurü yola mükhiyohnung.

⁵ Hiba yuzeng adüzü, adelü Israelrünü jungchah müpseh mübüba kanglungrü mii Abüdongba khyang hironung. Arühnü bebürü yang Shükuh trahtri la noronung ko akehta amübü nengdang müpsehnung.

⁶ Bebübanü ashüh tsü trahtri la bholu chah tungkehnung ko asu tsü axümlichi chüro Abüdongba künyangsohnung nengdang trüpnung.

⁷ Adelü Israelrünü Abüdongba te arüh kanglungrü rangmü lanü müpseh miza tsingrang khyang kangmübü jo yuje mücho müthsanung. Israelrünü hiba yuzeng hi aronung shang apüm la bichinung.

⁸ Israelrü mahkhang arüh yola liba shuparü khürünü trahtri chah khu apalang Abüdongba khyang trüp mübü mahkhang apa kangmübü mübükhang,

⁹ abilü Tsingrangba tsurü yola mükhiyohnung.

¹⁰ Israelrü mahkhang arüh yola liba shuparü khürünü shuh la ashüh zeh tsukhang, Abüdongba-nü abi nyüm ximülanung ko abi tsurü yola mükhiyohnung.

¹¹ Akang liba apüm akang tsü ashüh la tsü zehle, hütsünü amünyi pehnung nengdang ashüh apüm tsü bholu chah tungkehnung Abüdongba-nü yuzeng jüko. Ashüh, khüi akang liro, hütsünü amünyi hitsire.

¹² Hütsünü Abüdongba-nü Israelrü te arühbürü thsanye mahkhang arüh yola liba shuparü thsanye, sünüsü shuh la ashüh zeh mütsunung yocho.

¹³ Israelrü mahkhang arüh yola liba shuparü khürünü amüsa kanglungrü mahkhang uza khürü müpsehkhang, abinü ashüh tsü hiro alih la tungpehpü jutibae.

¹⁴ Akang liba apüm akang tsü ashüh la tsü zehle, hütsünü Abüdongba-nü Israelrü te ashüh zehpü shuh mütsunung yuzengjücho ko sünü tsunang abi müyurü yola mükhiyohnung.

¹⁵ Israelrünye mahkhang shuparünye, sünü amükangnü sücho mahkhang rangmü kanglungrünü mükahsehcho shuh tsunang abinü ajengki thsübae, tsehkhubae ko nyüzeh müsachehnung yingbae.

¹⁶ Hütsüta müthsakhang, hütsü ngang abi chongchanung.