LEVIRÜ 14 - AMÜSA BAIBEL (BSI)

Tsukhangra Kehpü Müsachehcho

¹ Abüdongba-nü Mosa khyang tsukhangra dhsaranü kyangrü nyüh khüdu müsachehnung yuzeng hiri jücho.

² Abi müsachehcho mishanung nyümong apu tsü bebürü yanglang noronung.

³ Ko bebübanü abi dhingnung dongkhu nochüdunung. Dhsara tsü kyangkhang,

⁴ bebübanü amüsa uza anyüh yola cedar sing azikyah, rangshü amoh ko hyssop müphung khüdu hironung yuzeng jünung.

⁵ Hütsüpü bebübanü uza khüdu kih amüdhseng zehba alihnü külüpcho mütpah-tbhü khüdula müpsehnung.

⁶ Abinü uza akhüuba tsü khyo cedar sing, rangshü amoh ko hyssop yola amüpsehcho uza shüh la tsü dhsangnung.

⁷ Abinü ashüh tsünü tsukhangra lanü müsachehnungba nyitsarü chah tsü dhünyehpili xakehnung, hütsüpü abi amüsaepü mishanung. Hütsüpü abinü uza akang tsü asehsa la mongtsisohnung.

⁸ Nyitsarüba tsünü ajengki thsünung, akuva apüm hehpehnung ko tsehkhu pehnung; hütsükolü abi müsa linung. Abinü yang la züdunung kohnung, ta abinü Shükuh lanü dongkhu pathsa nyümong dhünyeh linung.

⁹ Adhünyeh nyümong tsü abinü thali athah, abenbüh, anahnbüh ko afü apüm la anbüh hehpehnung; ajengki thsünung ko tsehkhu pehnung, hütsüpü du abi müsa kangnung.

¹⁰ Akeh-u nyümong abinü tu achomükeh san, apung anyüh ko kang khüdu za san atrüh khüdu, tuji la yohrütacho hüm süreh asang ko tuji liter khüdula nohlüm asangla khüdu hironung.

¹¹ Bebübanü nyitsarüba tsü nüpü ko abi amübüti tsü hipü Shükuh trahtri yang wünung.

¹² Hütsüpü bebübanü sanpung yolanü khüdu ko tuji liter khüdula chang asang kangba tsü khyo thsamehcho mübü jünung. Abinü hütsü Abüdongba khyang bebüba nengdang pathsa jiyü jünung.

¹³ Abinü san tsü münyi mübü ko trüp mübü müpsehji Amüsa müdümla tsü müpsehnung. Abinü hütsüta nguchinung, tunüo thsamehcho mübü tsü münyi mübü kyo bebürü yo ko khütang Amüsa.

¹⁴ Bebübanü müsachehnung san shüh tsü khyo nyitsarüba tsalang nangku ying, tsalang kheh müyungkutrehdi ko tsalang jing müyungkutrehdi chah münohnung.

¹⁵ Bebübanü tuji khyo akheh fülilang müyola tungyohnung,

¹⁶ ko akheh tsalang müyungza dhsangnung ko Abüdongba liba la tsü dhünyehpili xahnung.

¹⁷ Abinü amüyola zehba tuji la tsünü khürü ko san shüh tsü khürü khyo müsachehnung liba tsalang nangku ying, tsalang müyungkutrehdi ko jing tsalang müyungkutrehdi chah münohnung.

¹⁸ Ko akheh la zehba tuji anyingcho tsü abinü nyitsarüba thah la yohjünung. Hütsüta abinü müsachehba nguchi tsü nguchinung.

¹⁹ Hütsüpü bebübanü münyi mübü jünung ko müsachehba nguchi nguchinung. Hütsüpü abinü trüp mübü nengdang akang tsü müpsehnung.

²⁰ Ko bholu chah tsang mübü yola mübünung. Hütsüta bebübanü müsacheh nguchi tsü nguchinung ko nyitsarüba tsü müsa kangnung.

²¹ Nyitsarüba tsü iilümchonü pisa müjüchehkhang, abinü apu müsachehnung Abüdongba khyang bebüba nengdang jiyü thsanung ko abi thsameh mübü thsanung sanpung khüdu hirobae. Abinü tuji la yohrütacho hüm süreh khüdu ko tuji liter khüdula chang asang kangcho nohlüm khüdu tsang mübü nengdang hirobae.

²² Abinü mümüdhrü anyüh mahkhang kuh-mümüdhrü anyüh, khüdu münyi mübü ko khüdu trüp mübü nengdang hirobae.

²³ Abi müsachehba akeh-u nyümong bebürü yang Shükuh trahtri la hütsüri tsü hirung.

²⁴ Bebübanü san ko tuji tsü khyo bebüba nengdang Abüdongba khyang pathsa jiyü jünung.

²⁵ Abinü san tsü müpsehnung ko ashüh khürü khyücheh nyitsarüba tsalang nangku ying, tsalang kheh müyungkutrehdi ko tsalang jing müyungkutrehdi chah münohjünung.

²⁶ Bebübanü akheh fülilang müyola tuji khürü tungyohnung

²⁷ ko akheh tsalang müyungza lanü Abüdongba lichola tsü dhünyehpili xahnung.

²⁸ Abinü tuji khürü khyo ashüh yohba müdümtila tsü yohnung: nyitsarüba nangku ying tsalang, tsalang kheh müyungkutrehdi ko jing tsalang müyungkutrehdi.

²⁹ Amüyola anyingcho tuji tsü nyitsarüba athah la yohjünung ko hütsüta müsachehba tsü nguchinung.

³⁰ Hütsüpü abinü mümüdhrü mahkhang kuh-mümüdhrü khüdu

³¹ münyi mübü, ko khüdu trüp mübü nengdang tsang mübü yola mübünung. Hütsüta bebübanü müsachehba nguchi tsü nguchinung.

³² Hiba yuzeng hi tsukhangra kehpü müsachehnung ayah roh-i amübü müjüchehrü nengdang linung.

Kuh la Mangrang

³³ Abüdongba-nü Mosa ko Aron nyüh khyang

³⁴ kuh la mangrangnü jengcho shulüm yuzeng hiri jücho. (Hiri hi Israelrü khyang Abüdongba-nü jünung liba Kanan la züdupü bichinungba lile.)

³⁵ Sünü abi kuh la mangrang lii ngunang wü hütsü bebürü te yobae.

³⁶ Bebübanü wü hütsü müdhingdenü kuh la lüpcho zangchehnung yuzeng jünung; mahkhang kuh la licho lüpcho amümüsa kangnung. Hütsüpü abinü wü kuh la mangrang tsü dhingnung.

³⁷ Züdi chah tsü müyahkhüti mahkhang mohmürunü tsunü ngukhang,

³⁸ abinü kuh tsü nyümong dhünyeh nengdang zihti pehnung.

³⁹ Adhünyeh nyümong abinü thali ro dhingdhingnung. Mangrang tsü ratpah tsikhang,

⁴⁰ abinü mangrang kehba lung tsü yangdi khu hiwü mümüsa müdümla pehnung yuzeng jünung.

⁴¹ Hütsüpü abinü ayonglang züdi apüm tsü sahpü asahbülungcho tsü yangdi khu hiwü amümüsa müdümla pehnung.

⁴² Hütsüpü apehcho lung tsü apanü mülihnung ko züdi tsü thali asinü münohnung.

⁴³ Kuh la lung tsü pehpü ko züdi tsü sahpehpü apa asinü münohpü khanglang thali mangrang tsü chürokhang,

⁴⁴ bebüba thali wünü dhingnung. Hütsü ratpah tsikhang, kuh tsü amümüsa linung.

⁴⁵ Hütsü tphüpü lung ko sing ko amünohcho apüm tsü yangdi khu hiwü amümüsa müdüm khüdula pehnung.

⁴⁶ Kuh tsü zihtipü lide sünü hütsüla züdunang abi nyüzeh amümüsa linung.

⁴⁷ Sünü kuh hütsüla yüpnang mahkhang tsuyongnang abinü ajengki thsübae.

⁴⁸ Bebürünü dhingnung rode, kuh tsü thali münohpü khanglang mangrang tsü thali müchürokhang, kuh tsü amüsaepü mishanung, tunüo mangrang tsü riri changpehko.

⁴⁹ Kuh tsü müsachehnung nengdang, abinü uza anyüh, cedar sing azikyah, rangshü amoh ko hyssop müphung hironung.

⁵⁰ Abinü uza khüdu kih amüseng zehba alihnü külüpcho mütpah-tbhü michah müpsehnung.

⁵¹ Hütsüpü abinü cedar sing, rangshü amoh ko hyssop ko uza akang tsü khyo amüpsehcho uza shüh la ko kih amüdhseng la tsü dhsangnung. Ko abinü kuh la tsü dhünyehpili xahnung.

⁵² Hütsüta abinü kuh tsü uza shüh, kih amüdhseng, uza akang, cedar sing, hyssop ko rangshü amoh hirinü müsachehnung.

⁵³ Hütsüpü abinü uza akang tsü yangdi khupü asehsa la mongtsisohnung. Hütsüta abinü kuh tsü müsachehnung ko hütsü amüsa linung.

⁵⁴ Tsukhangra, madhsa, kii, atahcho madhsa ko shü la mahkhang kuh la mangrang nengdang

^55-56 yuzeng tsü hiri linung.

⁵⁷ Lango amüsa mahkhang amümüsa nengdang yuzeng hirinü khanung.