LEVIRÜ 13 - AMÜSA BAIBEL (BSI)

Tsukhangra nengdang Yuzeng

¹ Abüdongba-nü Mosa ko Aron nyüh khyang yuzeng hiri jücho.

² Nyüh khüdu aküp la mübhira kyo madhsa amütsa mahkhang kii mahkhang kyükyü chürokhang, abi tsü bebürü Aron trah yang norung.

³ Bebüba tsünü madhsa tsü dhingnung ko hütsüla anbüh tsü thru kangkhang ko madhsa tsü aküp tenü asoh-u züdukhang, hütsü tsukhangra lile, ko bebübanü abi tsü amümüsaepü mishanung.

⁴ Ta madhsa tsü athru ko aküp tenü asoh-u züducho mürangchehkhang ko anbüh tsü thru mükangkhang, bebübanü abi tsü nyümong dhünyeh pathsa khangtipünung.

⁵ Ko dhünyeh nyümong bebübanü thali dhingnung ko madhsa tsü müsühmüyapü asusuh du ngukhang, abinü adesü nyümong dhünyeh thali khangtipünung.

⁶ Adesü dhünyeh nyümong bebübanü dhingnung ko madhsa tsü müsühmüyapü kungkehkhang abi tsü amüsa, hütsü madhsa duepü mishanung. Nyitsarüba tsü ajengki thsütohnung ko abi tsü amüsa linung.

⁷ Ta bebübanü abi tsü amüsaepü mishapü khanglang, madhsa tsü alaa tsikhang, bebürü te thali ngusohnung.

⁸ Bebübanü abi tsü thali dhingnung ko alaa sühmüya tsicho ngukhang, abi tsü amümüsa; hütsü tsukhangraepü mishanung.

⁹ Nyüh khüdu mübhira chürokhang, abi bebürü khyang dhingsohnung norobae.

¹⁰ Aküp chah madhsa tsü athru thsakhang ko hütsü khu anbüh mii thrusohkhang ko mamükih tingkhang, hütsü binoh tsukhangra lile.

¹¹ Bebübanü abi tsü amümüsaepü mishanung; abi pathsa müyohpodhingnung, tunüo abi tsü mümüsajung lile.

¹² Madhsa tsünü ajing lanü athah chii tsütikhang, bebübanü thali dhingnung.

¹³ Madhsa tsünü afü apüm tsütikhang, abinü hütsü amüsaepü mishanung. Aküp apüm tsü thru kangkhang, abi tsü ayahnü müsa lile.

¹⁴ Ta adikehlanü madhsa tsü tingchehkhang, abi tsü amümüsa lile.

¹⁵ Bebübanü abi thali dhingnung rode madhsa tsü tingthoh chürokhang, abi tsü amümüsaepü mishanung. Madhsa tingthoh chüroba adüzü tsukhangra ko nyitsarüba tsü amümüsa.

¹⁶ Ta khode madhsa tsü kyangnü aküp tsü thru kangnang, abinü bebürü yanglang wünung ko abi thali dhingnung.

¹⁷ Madhsa tsü thru kangkhang, abi müsa lile, ko bebübanü hütsü amüsaepü mishanung.

¹⁸ Nyüh khüdu kii chüropü kyangpü

¹⁹ akhanglang kii kiiba müdümla tsü athru tingkhang mahkhang mohmüru chürokhang, abinü bebürü yang wüng.

²⁰ Bebübanü hütsü dhingnung ko aküp tenü arah tsü züdukhang ko hütsüla anbüh tsü thru kangkhang, abinü hütsü amümüsaepü mishanung. Hütsü kiila tsünü tsukhangra chürochoba lile.

²¹ Ta bebübanü hütsü dhingdhingpü hütsüla anbüh tsü thru mükang ko aküp tenü madhsa tsü züducho müngukhang, ta hütsü jengpa ngukhang, abi tsü nyümong dhünyeh nengdang pathsa khangti yohpünung.

²² Abemi tsü adiu kangkhang, bebübanü hütsü amümüsaepü mishanung. Hütsü tsukhangra amüdhethsa lile.

²³ Ta hütsü mümülichi ko müza mükangkhang, hütsü kii lanü arah due, bebübanü abi amüsaepü mishanung.

²⁴ Nyüh khüdu tahcho thsakhang ko shutsa tsü athru mahkhang mohmüru kangkhang, bebübanü abi dhingnung.

²⁵ Hütsüba müdümla anbüh tsü thru kangkhang ko aküp tenü asoh-u züdukhang, hütsü tahcho lanü dikehcho tsukhangra lile ko bebübanü abi tsü amümüsaepü mishanung.

²⁶ Ta hütsüla anbüh tsü thru mükangkhang ko aküp lanü asoh-u müzüdukhang, ko jengpa kangkhang, bebübanü abi nyümong dhünyeh nengdang pathsa yohpünung.

²⁷ Bebübanü nyümong dhünyeh-ula dhingnung ko hütsü adiu kangkhang, hütsü tsukhangra lile ko abinü hütsü amümüsaepü mishanung.

²⁸ Ta arah tsü mümülichikhang ko adiu mükangkhang ko jengpa kangkhang, hütsü tsukhangra mah. Bebübanü hütsü amüsaepü mishanung, tunüo hütsü atahcho arah du lile.

²⁹ Khode khingkurünye adhrerünye thah la mahkhang kümjingla madhsa chüronang, bebürünü abi dhingnung.

³⁰ Aküp tenü asoh-u züdukhang ko anbüh tsü müyeng ko nümnümkhang, hütsü tsukhangra lile, abi tsü amümüsaepü mishanung.

³¹ Bebübanü dhingde, aküp tenü madhsa tsü azüdu-uba müngukhang, ta anbüh tsü münyahrümkhang, abi tsü nyümong dhünyeh nengdang pathsa khangtipünung.

³² Bebübanü dhünyeh nyümong thali dhingnung ko hütsü adiu mükangkhang ko anbüh tsü müyengnü mükangkhang ko aküp tenü asoh-u züdu müngukhang, apunü madhsa mükang tsü hehnung.

³³ Bebübanü adesü nyümong dhünyeh thali khangtipünung.

³⁴ Adhünyeh nyümong thali madhsa tsü bebübanü dhingnung ko adiu mükangkhang ko asoh-u müzüdukhang, abi tsü amüsaepü mishanung. Nyitsarüba tsünü ajengki thsünung ko abi müsa linung.

³⁵ Ta abi amüsaepü mishapü khanglang, madhsa tsü adiu kangkhang, bebübanü hütsü thali dhingnung.

³⁶ Madhsa tsü adiu kangkhang, anbüh amüyeng tsülü müdhingnung; abi tsü amümüsa lijungle.

³⁷ Ta bebübanü madhsa tsü adiu mükang ko anbüh cheh chicho ngukhang, madhsa tsü kyangko, ko abi amüsaepü mishanung.

³⁸ Khingkurünye adhrerünye khode aküp la athru chüronang, bebürünü hütsü dhingnung.

³⁹ Aküp tsü phaa thrukhang, hütsü aküp lanü lapha chürocho due; abi tsü amüsa lile.

^40-41 Nyüh khüdu ahongkohlang mahkhang akikhanglang kuva longkhang, hütsü khu abi amümüsa kangnung mükoh.

⁴² Ta kuva mükehla tsü mohmüru madhsa chürokhang, hütsü tsukhangra lile.

⁴³ Bebürünü hütsü dhingnung ko hütsü mohmüru madhsa chürokhang,

⁴⁴ abinü hütsü amümüsaepü mishanung, tunüo abi thah chah tsukhangra kehle.

⁴⁵ Sü tsukhangra kehro, abinü shüthreh khyüpü, kuva müsühpü, aromih ajinglang müshütipü, “Amümüsa, amümüsa” pü züde rachinung.

⁴⁶ Hütsü mükyangde abi amümüsa linung ko abi aparü tenü za rangmü la linung.

Mangrang nengdang Yuzeng

⁴⁷ Khode jengki shunbüh shü mahkhang anana,

⁴⁸ mahkhang shünana shunbüh jengki mahkhang shuküp mahkhang shuküpnü külüpcho masü chah mangrang chüronang,

⁴⁹ hütsü amüyah mahkhang mohmüru thsakhang hütsü xahtaba mangrang lile, hütsü bebürü te ngusohng.

⁵⁰ Bebürünü hütsü dhingnung ko kohro tsü nyümong dhünyeh pathsa yohpünung.

⁵¹ Abinü dhünyeh nyümong hütsü dhinglinung ko mangrang tsü ratpah tsikhang hütsü amümüsa.

⁵² Bebürünü hütsü trüp-pehnung, tunüo hütsü xahtaba mangrang, hütsüeko hütsü michangnü trüp-pehng.

⁵³ Ta, abinü hütsü dhingde, mangrang tsü kohro chah tsü ratpah tsicho müngukhang,

⁵⁴ abinü hütsü thsüpü nyümong dhünyeh adesü pathsa yohpünung.

⁵⁵ Hütsüpü abinü hütsü dhingnung ko mangrang tsü müratpahnye müshohkhang, hütsü amümüsa linung; hütsü belang mahkhang khanglang kehnye, nührünü kohro tsü trüp-pehng.

⁵⁶ Ta bebübanü dhingde mangrang tsü shohpü ngukhang, abinü shü lanünye shuküp lanünye hütsü rohcheh pehnung.

⁵⁷ Hütsüpü, mangrang tsü thali chürokhang, hütsü ratpah tsirübae, hütsü abüdongrü tsünü trüp-pehng.

⁵⁸ Abinü kohro tsü thsüde anyah tsü tsikhang, abinü hütsü thali thsünung, ko hütsü müsa linung.

⁵⁹ Hütsüla, shunbüh shünye, anana shünye, mahkhang anbüh keh anana shü mahkhang shuküp jengki masü chah mangrang küducho nengdang yuzeng linung.