LEVIRÜ 12 - AMÜSA BAIBEL (BSI)

Zatbüpü khanglang Müsachehba

¹ Abüdongba-nü Mosa khyang Israelrü nengdang yuzeng hiri jücho.

² Khingkurü khüdunü adhrerü zatbükhang, ayah rode kyo, nyümong dhünyeh mümüsa linung.

³ Akeh-u nyümong, akhunga tsü müjüp-pehnung.

⁴ Hütsüpü abükyü ashüh pehba nyümong lanü müsa kangnung nyümong sangrepü asang yingbae; abükyü müsachehba nyümong müpisade Amüsa tuchahsü müthapübae mahkhang Amüsa Shükuh la müzüdubae.

⁵ Abükyünü khingkurü nümüsukhang, ayah rode kyo, nyümong dhüremüyü mümüsa linung. Hütsüpü abükyü ayah roba nyümong lanü müsa kangnung nyümong rohrepü dhüroh yingbae.

⁶ Adhrerü mahkhang khingkurü zatbünye, abükyü müsachehba nyümong pisade, Abüdongba Shükuh trahtri la bebürü yang, abükyünü trüp mübü nengdang san kang khüdu za khüdu ko münyi mübü nengdang kuh-mümüdhrü mahkhang mümüdhrü khüdu hirobae.

⁷ Bebübanü Abüdongba khyang abükyü müsachehsohnung shulüm abükyü mübü tsü jünung, ko abükyü müsa kangnung. Hütsüta khingkurü khüdunü azarü zatbüpü khanglang hiroh-i nguchibae.

⁸ Abükyünü san khüdu jünung mükohkhang, mümüdhrü anyüh mahkhang kuh-mümüdhrü anyüh, khüdu trüp mübü ko khüdu münyi mübü nengdang jübae ko bebübanü hütsü abükyü münyi hitsisohnung amübü jünung ko abükyü müsa kangnung.