LEVIRÜ 10 - AMÜSA BAIBEL (BSI)

Nadab ko Abihu nyüh Münyi

¹ Aron tsurü Nadab ko Abihu nyühnü anyüh michang tbhü hirocho, hütsüla michüh yohcho ko müchiji yohpü Abüdongba khyang hiwücho. Ta hiba michang tsü Amüsa mah, tunüo Abüdongba-nü hütsü jünung yuzeng müjü.

² Dhrongyengnü Abüdongba-nü michang müthehcho ko anyüh tsü Abüdongba bete trüpseh sücho.

³ Hütsüde Mosa-nü Aron te yocho, hi nengdang Abüdongba-nü hita yo licho, “I dikehrü atümungnü Ih Amüsaba drübae; Ihnü müyurü te I ahechi mishanung.” Ta Aron-nü sah müthsacho.

⁴ Mosa-nü Aron au azaba Uziel tsurü Mishael ko Elzafan nyüh dsi yocho, “Hila rung ko Amüsa Shükuh lanü nührü jünirü me hi hitsieng ko dongkhu yohpüng.”

⁵ Achotsü Mosa-nü yocho roh-i anyünü ro me tsü arüh shü la lohti dongkhu hitsicho.

⁶ Hütsüpü Mosa-nü Aron ko atsurü Eleazar ko Ithamar te yocho, “Nührü wahcho ngusohnung nührü kuva trarongnü mahkhang nührü jengki rehnah tüngusoh. Mahkhang nührü sünung ko yucho apüm te Abüdongba rihlong chüronung. Ta Abüdongba-nü müthehcho michangnü süsohcho meshünung nührü jünirü Israelrü apüm mülare.

⁷ Shükuh trahtri tüpehjü mahkhang nührü sünung, tunüo nührü Abüdongba tujinü müyühjü müsachehcho lile.” Achotsü arühnü Mosa-nü yocho kyo nguchicho.

Bebürüti nengdang Yuzeng

⁸ Abüdongba-nü Aron te yocho,

⁹ “Nüh ko nü tsurütinü yongkha yongpü ko müchapü I liba Shükuh la tüzüdu; mahkhang, nührü sünung. Hiba hi nü hung apümnü yohpünungba yuzeng.

¹⁰ Nührünü Amüsa ko amünyi, Amüsa ko amümüsa kahla adukah lisohng.

¹¹ Ihnü Mosa khu jüba yuzeng tsü nührünü Israelrü te do young.”

¹² Mosa-nü Aron ko atsurü anyingcho anyüh Eleazar ko Ithamar nyüh te yocho, “Abüdongba khyang mübücho nyingcho lanü tsang mübü hirung ko bhüpza müyohba hümdhse külüp-pü bholu tenü tsung, tunüo hiba amübü hi khütang Amüsa lile.

¹³ Hütsü Amüsa müdüm khüdu lanü tsung, hütsü Abüdongba khyang mübücho lanü nüh ko nü tsurüti nohlüm lile. Hütsü Abüdongba-nü Ite yuzengjücho lile.

¹⁴ Ta nüh ko nü kukhirünü bebürüti nengdang Abüdongba khyang pathsa jüba mübü akhuh ko athsejing tsü tsunung kohle. Nührünü hütsü Amüsa müdüm masü lanü tsunung kohle. Hiba amübü hi Israelrü akehta mübü lanü nüh ko nü tsurüti khyang nohlüm jüchoba lile.

¹⁵ Arühnü athsejing ko akhuh tsü Abüdongba khyang asu tsü tsang mübü jüde hirobae. Hiri tsü lede nengdang Abüdongba-nü yocho kyo, nüh ko nü tsurüti nohlüm linung.”

¹⁶ Mosa-nü münyi mübü nengdang miza tsü tsingdhingcho, ta hütsü trüp-pehko pü yuchicho. Hinü Eleazar ko Ithamar nyüh te abi zichüronü yocho,

¹⁷ “Tuepü nührünü Amüsa müdümla amünyi mübü tsü mütsucho? Hi khütang Amüsa lile ko hütsü yucho apüm münyi hitsinung shulüm Abüdongba-nü nührü khyang jüchoba lile.

¹⁸ Ashüh tsü Amüsa Shükuh la mühirocho tsü, Ihnü yocho roh-i nührünü kangmübü tsü hütsülanü tsuba thsako.”

¹⁹ Aron-nü lalingcho, “Khang Ihnü münyi mübü tsü chünye tsukhang khütanung? Hütsünü mii Abüdongba mükünyangsohnung mah-o? Müyurünü chünye Abüdongba te arüh münyi mübü mübüre ko arüh trüp mübü hirore, hütsütapü mii hiba adrünung hi I chah tikehre.”

²⁰ Mosa-nü hi yuchide abi künyangcho.