LEVIRÜ 1 - AMÜSA BAIBEL (BSI)

Üpümnü Trüp Mübüba

¹ Abüdongba-nü abi Shükuh lanü Mosa dsicho ko abi khyang yuzeng hiri

² Israelrünü arüh kangmübü jüde hiroh-i bichisohnung jücho. Nyüh khüdunü kanglungrü kangmübü jüde, hütsü abi misü mahkhang san mahkhang miza yolanü khüdu thsabae.

³ Abinü abi misü khüdu trüp mübükhang, abinü achomükeh misüpung khüdu jüng. Abüdongba-nü abi khyüchonungthsa, abinü hütsü Abüdongba liba Shükuh la züduba trahtri la jüng.

⁴ Abinü abi khehnü kanglungrü thah chah tsü nyümkehnung ko abi münyi hitsinung hütsü kangmübüthsa khyüchonung.

⁵ Abinü misüpung tsü hütsüla müpsehnung ko Aron hung bebürütinü ashüh tsü Abüdongba khyang jünung ko Shükuh trahtri la bholu müyüdinglang tungkehjünung.

⁶ Hütsüpü abinü kanglungrü küp tsü khohpü khanahnung,

⁷ ko bebürünü bholu chah sing zangkehnung ko tahkehnung.

⁸ Arühnü michang chah tsü shuh akhanahcho tsü ko athah ko asu zeh yohnung.

⁹ Nyitsarüba tsünü bohnying ko athsejing tsü thsütohnung ko hütsü khehthsithsaba bebüba tsünü kangmübü üpümnü trüpm. Hiba amübü axümlichi tsünü Abüdongba künyangsohre.

¹⁰ Amübü tsü san mahkhang miza thsakhang, hütsü apung ko lapha mükeh khüdu khyüng.

¹¹ Abinü hütsü bholu kihku lahpinü müpsehbae ko bebürünü ashüh tsü bholu müyüdinglang tungkehjünung.

¹² Nyitsarüba tsünü hütsü khanahpü, khehthsithsaba bebüba tsünü michang chah tsü athah ko asu tsü zeh shuh apüm tsü yohng.

¹³ Nyitsarüba tsünü bohnying ko athsejing tsü thsütohbae ko bebüba tsünü Abüdongba khyang kangmübü tsü jünung ko bholu chah apümnü trüpnung. Hiba amübü axümlichi tsünü Abüdongba künyangsohre.

¹⁴ Amübü tsü uza khüdu thsakhang, hütsü mümüdhrü mahkhang kuh-mümüdhrü thsaang.

¹⁵ Bebüba tsünü hütsü bholu yang hiro ahong xisah bholu chah tsü aku tsü tahpehng. Ashüh tsü bholu khüulang shokehsohng.

¹⁶ Abinü anbüh ko atsangkeh tsü khyücheh bholu nyüchüro lahpi tavi pehjila tsü pehsohng.

¹⁷ Abinü aqo anyüh tsünü bipü aqo tsü mürohsahpü afü tsü mürahrüpnü bholu chah tsü üpümnü trüpm. Hiba amübü axümlichi tsünü Abüdongba künyangsohre.