KHIDHINGCHO 36 - AMÜSA BAIBEL (BSI)

Kuthrilarü Thsiking

¹ Josef tsurü Manase shümtsurü Makhir tsurü Gilead tsutpu lanü athahti Mosa ko langnürüti yanglang wücho.

² Arühnü yocho, “Abüdongba-nü nüte alih tsü Israelrü khyang zii thsadhing changnah jünung mülacho. Adesü abinü nüte ihrü jünirü Zelofehad kuthsi tsü atsularüti khyang jüngpü mülajüko.

³ Ta hi müdheing, arühnü aparü hung adhrerü te kukangkhang, kuthsi tsü hütsüba hung yo kangre ko ihrü yo tsü azau kangnung.

⁴ Thali nguba Kang, aicho tsü abüdongrü yang ngude Zelofehad tsularüti yo kuthsi tsü lede nengdang arüh khyübarü yo kangnung ko ihrü hung yo changre.”

⁵ Achotsü Mosa-nü Israel khyang Abüdongba chahnü amülaba hiri jücho. Abinü yocho, “Manase hungnü yoba tsü yuje,

⁶ hütsünü Abüdongba-nü yore, Zelofehad tsularüti arüh mürucho masü te xengnung ta arühbürü hung la du xengnung kohle.

⁷ Israelrü mükhu palu kuthsi palu hung la du linung.

⁸ Israel-larü sünü kuthsi khyonang, abükyürü hung la du xengnung athsalang. Hütsüta palu jümürü thsiking palunü khyünung,

⁹ ko kuthsi tsü hung khüdu lanü apa hung khüdu yang müwünung. Palu hungnü mütozah palu hung thsiking khyünung.”

^10-11 Achotsü Zelofehad tsularüti Mahlah, Tirza, Hogla, Milka ko Noa, arühnü Abüdongba-nü Mosa te yocho kyo, arühbürü hung la du xengcho.

¹² Arühnü Josef tsurü Manase hung la du xengcho ko arüh thsiking tsü aurü hung la du licho.

¹³ Hiri yuzeng hi Jeriko lanü Jordan Yongkhi keh wüpü Moab ngah la Israelrü khyang Abüdongba-nü Mosa khu jücho lile.