KHIDHINGCHO 35 - AMÜSA BAIBEL (BSI)

Levirü Khyang Jücho Yangditi

¹ Jeriko lanü Jordan keh wüpü Moab ngah la Abüdongba-nü Mosa te yocho,

² “Israelrü te, arühnü nguba alih la tsünü arüh lisohnung yangdi khürü ko hütsüri mükang kanglungrü mungsohnung alih Levirü khyangsü jünung young.

³ Hiri yangditi tsü Levirü yo thsanung ko arüh hütsüla linung. Alih angah tsü arüh kanglungrü lamungji thsanung.

⁴ Alih angah tsü yangdi tbü lanü apümlang khehap hajar khüdu thsasohng,

⁵ hütsünü du yangdi tsü alongla thsapü khüu khüulang khehap hajar anyüh-nyüh thsanung.

⁶ Adesü Levirü khyang nyüh khüdunü thsameh nyüh khüdu kyüsehde tsikehnung shulüm Tsiyoh Yangdi dhüroh jüngding.

⁷ Hütsüchah lahkeh alih angah zehpü yangdi yürepü anyüh jüng, hütsü yohrüta yangdi yürepü keh thsanung.

⁸ Hung müipila Levirü khyang yangditi tsü, arüh lih khütoh-inang hütsü shidüm jünung.”

Tsiyoh Yangditi

⁹ Abüdongba-nü Mosa te

¹⁰ Israelrü te yosohnung hita yocho: “Khode nührünü Jordan Yongkhi keh Kanan lih la züdunang,

¹¹ nührünü nyüh khüdunü thsameh nyüh khüdu kyüsehde tsiyohnung yangditi throchehng.

¹² Hütsüla abi asübarü tsutpurünü rühyangnung yangchiba lanü khümchonung. Nyitsarü kyüsehrü khüdu tsü yu mükhapü müsüsohnung.

¹³ Yangdi dhüroh throchehng,

¹⁴ asang Jordan nyüchüro langthringnü ko asang Kanan lih lanü.

¹⁵ Hiri tsü Israelrü ko amüshunye mahkhang lede nengdangnye shuparü liyarü nengdang tsiyoh yangditi thsanung. Sünü thsameh nyüh khüdu kyüsehnang abinü hiri yangdi khüdula tsiyohnung.

^16-18 “Ta idhse thsunohrü mahkhang singlungrü bichi müpsehkhang abi tsü süsohnung.

¹⁹ Asübarü tsutpurünü abi tsü süsohnung. Khode abi tsü ngunang müpsehpehnung.

²⁰ “Nyüh khüdunü khürü thrünyinü düm-müthehchü mahkhang langonü abi chah lahkhang

²¹ mahkhang shingsehkhang, abi amüpsehrü kangnung ko abi süsohnung. Abi tsü asübarü tsutpurünü süsohnung. Khode abi tsü ngunang müpseh pehnung.

²² “Ta müdhsatapü thsameh nyüh khüdu düm-mütheh mahkhang lango tsamütheh müpsehko.

²³ Mahkhang adüzünü nyüh khüdunü lung tsamütheh amüngulangnü nyüh khüdu müpsehko.

²⁴ Hitari lalü amülung tsünü asübarü tsü mah, ta athsamehba tsü khümnung.

²⁵ Amülung tsünü asübarü tsutpurü khehlanü asüsohba nyitsarü tsü khümchonung ko abi tsü abi tsiyohba yangdi lang tsü thali jünung. Abi hütsüla hütsü shikhe amungthriba Bebüba tsü müsüde libae.

²⁶ Asüsohba nyitsarü tsü tsiyoh yangdi tsü pehjü tsipü

²⁷ ko asübarü tsutpurü tsünü abi ngu müpsehkhang, rühyangba hi müpsehcho kyo mükhichinung.

²⁸ Asüsohba nyitsarü tsü Amungthriba Bebüba müsüde tsiyoh yangdila tsü linung, ta hütsüpü khanglang abinü arüh kulang thalinung kohle.

²⁹ Hiba yuzeng hi nüh ko nü trah licho apüm la bichinung.

³⁰ “Müpsehcho mülangcho nyüh khüdu abi mülangko, ta yuzi anyüh mahkhang alaa lipü du abi tsü süsohnungbae; yuzi khüdu dulü asücho khiyula mükükyünung.

³¹ Amüpsehrülü süsohnung. Thsinü abi mülang tsü müsahchehnung mükoh.

³² Nyüh khüdu tsiyoh yangdi lang rang tsikhang, Amungthriba Bebüba müsüde kulang thalinung shulüm angang tüjüsoh.

³³ Nühnü hütsüta nguchikhang, nüh liyaba limih münyijüre. Müpsehchonü alih tsü münyijüre ko amüpsehba tsü süsohchochah khu nyitsarü kyüsehcho alih tsü tunüsü müsachehnung mükoh.

³⁴ Nührü liyaba lih tsü tümünyijü, tunüo Ih, Abüdongba ko Ih Israelrü yola lire.”