KHIDHINGCHO 34 - AMÜSA BAIBEL (BSI)

Luhrüti

¹ Abüdongba-nü Mosa khyang

² Israelrü nengdang athülaba hiri jücho: “Khode nührünü anyengchocho Kanan lih la tsü züdunang, nührü lurü tsü hiroh-i linung.

³ Kihjing lahpi tsü Zin akungaselih lanü Edom lurü chii linung; nyüchürolang tsü Asü Kihdi kihjing lahpi achangka chii linung.

⁴ Hütsü lanü Akrabbim Lang kihjing lahpi ximülaang ko mütozah Zin khu Kadesh Barnea kihjing lahpi chii linung. Hütsü lanü kihku-nyüzüdu lahpi Hazer Addar ko Azmon chii

⁵ khüi lanü ximüla Ijip lurü ngahlang ronung ko Mediteranean la changkanung.”

⁶ “Nyüzüdulang lahpi lurü tsü Mediteranean kihdi thsanung.

⁷ “Kihku lang lahpi lurü tsü Mediteranean kihdi lanü Hor Zong chii

⁸ ko hütsülanü Hamath lang chii linung.

⁹ Hütsü lanü mütozah Zedad ko Zifron chii linung ko hütsü Hazar Enan la changkanung.

¹⁰ “Nyüchürolang lurü tsü Hazar Enan lanü Shefam chii linung.

¹¹ Hütsü lanü Ain nyüchüro langthring Harbel chii linung ko hütsülanü azonglihlang wü Galil kihting nyüchüro langthring kihbekhüm chii linung,

¹² ko kihjinglang Jordan Yongkhi jüpnü jowü Asü Kihdi chii linung. “Hiri müyü hi nührü lurü linung.”

¹³ Achotsü Mosa-nü Israelrü te yocho, “Nührünü Zii thsadhing ngunung liba lih tsü hi lile, hiba lih hi Abüdongba-nü hung dükupü achangsho khyang jo lile.

¹⁴ Reuben ko Gad ko nyüchüro langthring Manase hung achangsho abürü nohlüm nguko.

¹⁵ Jeriko dükehlang Jordan nyüchüro langthring, palu kukhi aichi arüh kuthsi nguko.”

Alih Changnahnung Nyümkehjüba Langnürüti

¹⁶ Abüdongba-nü Mosa te yocho,

¹⁷ “Bebüba Eleazar ko Nun tsurü Joshua nyühnü alih tsü changnahnung.

¹⁸ Anyüh tronung hung müipi lanü azirü nyüh khüdu-khüdu zehsohng.”

^19-28 Abüdongba-nü throba nyitsarüti tsü hiri: Ahung Langnürü Juda Jefune tsurü Kaleb Simeon Amihud tsurü Shelumel Benjamin Kislon tsurü Elidad Dan Jogli tsurü Bukki Manase Efod tsurü Haniel Efraim Shifthan tsurü Kemuel Zebulun Parnak tsurü Elizafan Isakar Azzan tsurü Paltiel Asher Shelomi tsurü Ahihud Naftali Amihud tsurü Pedahel

Ahung Langnürü

²⁹ Hiri nyitsarüti hi Abüdongba-nü Kanan lih la Israelrü khyang kuthsi changnah jünung nyümkehjücho.