KHIDHINGCHO 30 - AMÜSA BAIBEL (BSI)

Yuchüm Nengdang Yuzeng

¹ Mosa-nü yuzeng hiri Israelrü langnürüti khyang jücho.

² Khode nyüh khüdunü Abüdongba khyang lango jünung yuchümnang mahkhang lango lanü za linung yuchümnang, abinü hütsü müthsangnyangpü anyengchocho tsü nguchibae.

³ Khode khingkuzarü khüdunü aurü kuh la liya Abüdongba khyang lango jünung mahkhang lango lanü za linung yuchümnang,

⁴ aunü müdhepü müyatikhang, abükyünü nyengchocho mahkhang yuchümcho kyo nguchibae.

⁵ Ta aunü hütsü yuchipü yatikhang, abükyünü hütsü yohpünung müdhsütah. Abüdongba-nü abükyü khyang mülangpehjünung, tunüo hütsü aunü yaticho.

⁶ Amüxengcho khingkurü khüdunü ahsa mahkhang thsameh yuchümnang, mahkhang lango lanü za linung nyengchopü xengkhang, ko aniinü hütsü müdhepü müyatikhang,

⁷ abükyünü nyengchocho mahkhang yuchümcho apüm tsü nguchibae.

⁸ Ta aniinü hütsü müdhepü yatikhang abükyünü hütsü yohpünung müdhsütah. Abüdongba-nü abükyü khyang mülangpehjünung.

⁹ Chomilarü mahkhang azacho khingkurü khüdunülü anyengchocho apüm tsü yohpübae.

¹⁰ Axengcho khüdunü lango lanü za linung nyengchokhang,

¹¹ aniinü hütsü müdhepü müyatikhang, abükyünü nyengchocho apüm yohpübae.

¹² Ta aniinü hütsü müdhepü yatikhang, hütsü yohpünung müdhsütah. Abüdongba-nü abükyü mülangpehjünung, tunüo hütsü aniinü yaticho.

¹³ Abükyünü yuchümcho mahkhang nyengchocho khyünung mahkhang pehnung, anii tsü athsalang lile.

¹⁴ Ta, abinü hütsü yuchi nyümong tsünü müyatikhang, abükyünü yuchümcho mahkhang nyengchocho kyo apüm nguchibae. Abinü hütsü yuchi nyümong tsünü müyati.

¹⁵ Ta akhanglang abinü hütsü yatikhang, hütsü münguchicho mülang tsü abi chah küdunung.

¹⁶ Yuzeng hiri Abüdongba-nü Mosa khyang amüxengcho khingkurü khüdu au te liyaba thsanye mahkhang kuh kangcho khingkurü khüdunünye yuchümcho nengdang jücho lile.