KHIDHINGCHO 3 - AMÜSA BAIBEL (BSI)

Aron Tsurüti

¹ Abüdongba-nü Mosa te Sinai Zong la chotade Aron ko Mosa-rü kukhi tsü hiroh-i licho.

² Aron tsurü müyü licho: Nadab aukhuba, Abihu, Eleazar ko Ithamar.

³ Arüh tsü bebürü thsanung müyühjü khachehthrocho,

⁴ ta Nadab e Abihu nyüh Sinai zong la Abüdongba khyang amümüsa michang mübüde süsohcho. Arüh tsuzarü mülicho, hütsünü Aron akangli ayung Eleazar ko Ithamar nyühnü bebürü nguchi nguchicho.

Bebürü Dikehnung Levirü Throchehcho

⁵ Abüdongba-nü Mosa te yocho,

⁶ “Levi hung norung ko Bebüba Aron dikehnung arüh throchehng.

⁷ Arühnü I Shükuh la dhsütah nguchi ko bebürü ko yucho apüm dhsütah nguchi nguchinung.

⁸ Shükuh la kohro apüm arühnü xükümnung ko anyingcho Israelrü nguchi nguchinung.

⁹ Levirü nguchi apümnü Aron ko abi tsurüti dikehnung.

¹⁰ Nühnü Aron ko atsurüti tsü bebü nguchi nguchinung throchehng; aparü sünü hütsü nguchinang abi süsohnung.”

¹¹ Abüdongba-nü Mosa te yocho,

¹² “Levirü tsü ade tinü Iyo thsanung. Khode Ihnü Ijiprü aukhurü atümung müpsehcho, Ihnü Israelrü kukhi mükhu aukhuba tsü Ipu tsurü kyo müsachehjücho ko kanglungrüsü hütsüta müsachehjücho.

¹³ Ade Israelrü aukhurüti tsü Iyo thsanung mülih, Levirü thsanung; arüh Iyo kangnung. Ih Abüdongba.”

Levirü Mono Khicho

¹⁴ Sinai lipilih la Abüdongba-nü Mosa te

¹⁵ Levirü atsutpu ko kukhinü adhrerü atümung choo khüdupü amilang azirü neng thrahyohnung yuzengjücho,

¹⁶ ko Mosa-nü hütsüta nguchicho.

^17-20 Levi tsurü asang licho: Gershon, Kohat ko Merari ko arüh neng binü arüh tsü arüh jümürü kangcho. Gershon atsurü anyüh licho: Libni ko Shimei; Kohat atsurü müyü licho: Amram, Izhar, Hebron ko Uziel; ko Merari atsurü anyüh licho; Mahli ko Mushi. Ko arüh neng binü arüh tsü arüh jümürü kangcho.

²¹ Gershon hung tsü Libni ko Shimei tsutpunü kangcho.

²² Choo khüdu mihlang azirü adhrerü thrahyohrü tsü arüh hajar dhünyeh thsih münga licho.

²³ Hiba hung tsü Shükuh khanglang nyüzüdulang,

²⁴ Lael tsurü Eliasaf tsü aziba thsapü müdongcho.

²⁵ Arüh tsü Shükuh, ayonglang atsung, amilang atsung, trahtri shü, Shükuh ko bholu mükang yohba kitising shü

²⁶ ko kekhüm la züduba trahtri kitising hiri tsü dhingyehnung licho. Hiri kohro xükümnung tsü arüh nguchi.

²⁷ Kohat hung tsü Amran, Izhar, Hebron ko Uziel tsutpunü kangcho.

²⁸ Choo khüdu mihlang azirü adhrerü aneng thrahyorü tsü arüh hajar keh thsih dhüroh licho.

²⁹ Hiba hung tsü Shükuh kihjinglang lahpi,

³⁰ Uziel tsurü Elizafan tsü athah thsapü müdongcho.

³¹ Arühnü Yuzeng Singdi, tsingthsang, dsimüdongsing, bholu, Amüsa Müdümla bebürünü bichiba tsangfü hiwü ko Amüsauba Müdümla züduba trahtri kitising dhingyehcho. Hiri xükümnung tsü arüh nguchi.

³² Levirü yola ayingba tsü Bebüba Aron tsurü Eleazar licho. Abinü Amüsa Müdümla nguchirüti dhingyehcho.

³³ Merari hung tsü Mali ko Mushi tsutpunü kangcho.

³⁴ Choo khüdu mihlang azirü adhrerü aneng thrahyohrü tsü arüh hajar dhüroh thsih anyüh licho.

³⁵ Hiba hung tsü Shükuh kihku lahpi Abihail tsurü Zuriel tsü athah thsapü müdongcho.

³⁶ Arühnü Shükuh singtpah, idong, kuhbi, dümpi ko chingkehtaba apüm dhingyehcho. Hiri xükümnung tsü arüh nguchi.

³⁷ Arühnü yanglonglang kekhüm la kuhbi, dümpi, ahüsing ko düshü hirisü dhingyehcho.

³⁸ Mosa ko Aron ko atsurüti tsü nyüchürolang Shükuh bete müdongcho. Arühnü Israel nengdang Amüsa müdümla dikehba nguchi apüm dhingyehcho. Aparü sünü hütsü nguchi nguchinung müküpnang abi süsohnung.

³⁹ Levirü adhrerü choo khüdu mihlang Abüdongba yuzeng khu Mosa-nü ahungnü thrahyohrü tsü arüh hajar mükyüpü anyüh licho.

Aukhuba Mülih Levirü Khyücho

⁴⁰ Abüdongba-nü Mosa te yocho, “Israelrü aukhurü atümung Iyo. Hütsüeko adhrerü choo khüdupü amilang azirü atümung aneng thrahyohng. Ta arüh mülih Ihnü Levirü atümung chingre. Ih Abüdongba!

⁴¹ Adesü Ihnü kanglungrü akhu mütrüba mülih Levirü kanglungrü khangre.”

⁴² Mosa-nü hütsü nyinü aukhurü

⁴³ choo khüdupü mihlang atümung neng thrahyohcho ko arüh tsü hajar mükyüpü anyüh, thsih anyüh nyürepü asang thsacho.

⁴⁴ Abüdongba-nü Mosa te yocho,

⁴⁵ “Ade Israelrü aukhurü mülih Levirü tsü Iyo kang müsachehng ko Israelrü yo akhu mütrücho kanglungrü mülih Levirü kanglungrü tsü müsachehng.

⁴⁶ Ko Israelrü aukhurü tsü Levirü tenü 273 nü alaa kangrü tsü, alaa tsü nührünü lihchobae.

⁴⁷ Nyüh khüdu nengdang ade bichiba ahochocho aichi taripi münga-nga jüng,

⁴⁸ ko thsi hütsü Aron ko atsurüti khyang jüng.”

⁴⁹ Mosa-nü hütsü nyi

⁵⁰ taripi, hajar khüdu thsih asang rohrepü münga tsü khyücho ko hütsüri tsü,

⁵¹ Aron ko atsurüti khyang jücho.