KHIDHINGCHO 27 - AMÜSA BAIBEL (BSI)

Zelofehad Tsularüti

¹ Mahlah, Noa, Hogla, Milka ko Tirza hiri tsü Josef tsurü Manase, abi tsurü Makhir, abi tsurü Gilead, abi tsurü Hefer ko abi tsurü Zelofehad tsularüti licho.

² Arühnü wü Abüdongba Shükuh trahtri la Mosa, bebüba Eleazar langnürüti ko amülung apüm bete yapü yocho,

³ “Uwa chahnü adhrerü khüdusü mülipü lipilih la abi süko. Abi Abüdongba nyümba Kora mülung la müzeh; abi apu münyinü sücho.

⁴ Abi chahnü atsurü adhrerü mülicho nganglangnü, tuepü abi neng Israel lanü chahnung? Uwa-rü jünirü yola ihrü khyangsü kuthsi khülo!”

⁵ Mosa-nü hiba khiyu tsü Abüdongba yanglang hiwücho

⁶ ko Abüdongba-nü abi te yocho,

⁷ “Zelofehad tsularütinü kihchiba tsü athsalang; aurü jünirü yola arüh khyangsü kuthsi tsü jüng. Abi thsiking tsü arüh khyangsü jüng.

⁸ Khode nyüh khüdu atsurü adhrerü mülipü sonang, abi thsiking tsü abi tsularünü khyünungepü Israelrü te young.

⁹ Abi atsularü mii mülikhang, amung aninü thsiking tsü khyünung.

¹⁰ Abi amung ani mii mülikhang, abi aurü jünirünü thsiking tsü khyünung.

¹¹ Abi jünirü mahkhang au azabarü mülikhang, abi te amünyeh-u jünirünü thsiking tsü khyünung ko abi yo kangnung. Ko Ih, Abüdongba-nü yuzengjücho kyo Israelrünü hiba hi yuzeng kang bichinung.”

Mosa Mülih Joshua Throchehcho

¹² Abüdongba-nü Mosa te yocho, “Abarim Zonglang tsü küdung ko Ihnü Israelrü khyang jüba lih tsü dhing.

¹³ Ko nü mung Aron kyo, nühnü hütsü ngupü du nüh sünung,

¹⁴ tunüo nühjüdingnü Zin akungaselih la I yuzeng nyümcho. Meriba la ayucho shünü Ih nyümde, arüh bete nühnü I Amüsa ziichah müdümpicho.” (Meriba tsü Zin akungaselih la Kadesh la kinatung tsü lile.)

¹⁵ Mosa-nü kihchicho,

¹⁶ “Akang jüba Abüdongba Tsingrang, müyurü nünung ko Nü yucho tsü san nyahrü müliba san mükyopü

¹⁷ khatalasü nünung nengdang nyüh khüdu throchehjüng.”

¹⁸ Abüdongba-nü Mosa te yocho, “Nun tsurü Joshua, süchah anbü kehro, nühnü abi nowüng ko abi thah chah nü khehnü nyümkehjüng.

¹⁹ Abi tsü bebüba Eleazar ko amülung bete yasohng, ko hütsüla atümung bete abi tsü nü mülih-epü arüh khyang müdhesohng.

²⁰ Israelrü atümungnü abi yocho nyinungthsa nühnü abi khyang nü tase khürü jüng,

²¹ bebüba Eleazar-nü Urim ko Thummim bichi I lümcho müdhenung ko Joshua-nü abi chah dümpinung. Hütsüta Eleazar-nü Joshua ko Israelrü apüm arüh nguchi apüm la hütsü roh-i thongu nünung.”

²² Abüdongba-nü mülacho kyo Mosa-nü nguchicho. Abinü Joshua tsü bebüba Eleazar ko amülung apüm bete yasohcho.

²³ Abüdongba-nü yuzengjücho kyo, Mosa-nü Joshua thah chah akhehnü nyümkeh abinü Mosa mülihrepü sobhocho.