KHIDHINGCHO 25 - AMÜSA BAIBEL (BSI)

Peor la Israelrü

¹ Israelrü Akacia Ngah la ro lide, müyurütinü Moab-larü te nahtrahnaxengnung dikehcho.

² Hiri khingkurütinü Moab tsingrang mübüba thsütila arüh dsiyohcho.

³ Israelrütinü tsuyongba tsü tsucho ko Peor Baal tsingrang tsü mübücho.

⁴ Hütsünü arüh te Abüdongba zichüro Mosa te yocho, “Israelrü langnürü atümung nowüng ko I yochonyi, anyümong arüh xohsehpehng, hütsükolü müyurü te Ihnü zii müchüronung.”

⁵ Mosa-nü adirüti te yocho, “Nührü müipinü nührü hung la sü Peor Baal tsingrang mübürü kangcho abi tsü kyüsehng.”

⁶ Israelrünü Abüdongba shükuh trahtri la longri püm lide, Mosa ko amülung apümnü ngu, Israelrü khüdunü Moab-larü khüdu abi Shükuh lang nozüducho ngucho.

⁷ Khode Aron shümtsurü ko Eleazar tsurü Finehas-nü hütsü ngucho, abinü shemüsu amülung pehjüpü tsicho.

⁸ Abinü thsuh khüdu bipü Shükuh la tsü khingkutpü ko adhreba nyüh tsü iiwünü anyüding khakhu chiicho. Hütsü khu Israelrü changsohyaba rümra tsü nyehlicho,

⁹ ta hütsünü nyüh hajar mükyüpü müyü süsohnü licho.

¹⁰ Abüdongba-nü Mosa te yocho.

¹¹ “Finehas-nü tu nguchicho, hütsü khu Ihnü adelü Israelrü te zii müchüro. I chah khu apa tu Tsingrang mümübünung abinü yaticho ko hütsü khu I rihlongla Ihnü arüh müchangjücho.

¹² Hütsüeko aronung shang apüm nengdang Ihnü abi te azengtacho külüprepü abi te young.

¹³ Abi ko abi trah lede nengdang bebürü thsanung külüpko, tunüo abinü Ite arorüh thsanung tsü mükhyünyücho ko müyurü münyi pehjünung kangcho.”

¹⁴ Israelrü Midian-larü te süsohba aneng tsü Salu tsurü Zimri, Simeon hung la tsutpu khüdu michah aziba licho.

¹⁵ Khingkutpü neng tsü Kozbi, au tsü Zur, Midian-rü hung khüdula ayingba licho.

¹⁶ Abüdongba-nü Mosa te yuzengjücho.

¹⁷ “Midian-rü tsü mahng ko arüh changjüng,

¹⁸ tunüo arühnü nührü Peor la thsüyohchü ko Peor la rümrala süsohba Kozbi arüh te mütsa bichicho.”