KHIDHINGCHO 23 - AMÜSA BAIBEL (BSI)

¹ Abinü Balak te yocho, “Hila I khyang bholu dhünyeh külüpm ko I khyang misüpung dhünyeh ko mizapung dhünyeh hirung.”

² Balak-nü abi te yocho kyo nguchicho ko abi ko Balaam nyühnü bholu müipi chah misüpung ko mizapung khüdu-khüdu mübücho.

³ Hütsüpü Balaam-nü Balak te yocho, “Nüh trüp mübüba te yaang ko Abüdongba-nü Ite shiro a müshirünang Ihnü wü dhingnung. Abinü Ite tu mishanang Ihnü nüte yonung.” Achotsü abinü azong khang khüdu chah tuwücho,

⁴ ko Tsingrangba-nü abi te shirücho. Balaam-nü abi te yocho, “Ihnü bholu dhünyeh külüpko ko hütsü mükhu chah misüpung ko mizapung khüdu-khüdu mübüko.”

⁵ Abüdongba-nü Balaam te tu yonungnang yopü Balak yang thali abi te yusi tsü yonung müthehcho.

⁶ Achotsü abinü thali wücho ko hütsü yingcheh Balak tsü Moab-rü langnürüti yola abi trüp mübüte ya ngucho.

⁷ Balaam-nü choyoh yu hi züdecho: “Moab yangthsaba Balak-nü nyüchürolang azong lih Syria lanü Ih norocho, abinü yocho, ‘Rung I nengdang choyohjüng, Israelrü chah chokehcholajüng.’

⁸ Tsingrangba-nü müchokehcholacho Ihnü khüta chokehcholanung? Mahkhang Abüdongba-nü mümülangjüpü achangba khüta chonung?

⁹ Lungkhang chahnü Ihnü arüh ngule; Akhang chahnü Ihnü arüh dhingnung kohle. Arüh müleng liba yucho khüdu; Aparü tenü arüh alaa müwajükopü arühnü müdhele.

¹⁰ Israelrü trah tsü lihwü kyo lile, Arüh khidhingnung drongrale. Tsingrangba müyurü khüdu kyo I nyümongti changkasohng; Amüsarü kyo Ih tbachi süsohng.”

¹¹ Hütsüde Balak-nü Balaam te yocho. “Nühnü Ite hi tu nguchiro? I rorüh chokehcholasohnung Ihnü nüh hila norocho, ta nühnü nguchicho apümnü nühnü arüh müwajüko.”

¹² Abinü lalingcho, “Abüdongba-nü Ite yocho du Ihnü yonung kohle.”

Balaam-nü Choyohcho Anyüuba

¹³ Achotsü Balak-nü Balaam te yocho, “Nühnü Israelrü khürü du ngunung müdümla I yola rung. Nühnü hütsülanü I nengdang arüh chokehcholajüng.”

¹⁴ Abinü abi Pisga zong akhangchah Zofim rangmülang nowücho. Hütsü lasü abinü bholu dhünyeh külüpcho ko hütsüri müipi chah misüpung ko mizapung khüdu-khüdu mübücho.

¹⁵ Balaam-nü Balak te yocho, “Nühnü hilanü trüp mübüba te yaang ko Ihnü wü hütsüla Tsingrangba shirünung.”

¹⁶ Abüdongba-nü Balaam shirücho ko tu yonungnang yopü thali Balak yang abi yusi hipü müthehcho.

¹⁷ Achotsü abinü thali wücho ko hütsü yingcheh Balak tsü Moab-rü langnürüti yola abi trüp mübüte ya ngucho. Balak-nü Abüdongba-nü tu yochonang tsingdhingcho,

¹⁸ ko Balaam-nü choyoh yu hi züdecho: “Rung, Zippor tsurü Balak. Ko Ihnü tu yoro hütsü nyieng.

¹⁹ Tsingrangba-nü nyitsarü kyo mürahkhehre; Abi amüi tsurü kyo lasih mümülichire, Abinü tu nyengchonang nguchire; Abinü chore ko hütsü nguchire.

²⁰ Ite müwajünung thülako, Ko Tsingrangba-nü müwajüde, Ihnü hütsü dsilinung mükoh.

²¹ Israel akangla tu suro amütsa mahkhang achongcha müronung Ihnü münguchehre. Abüdongba Tsingrang arüh te lile; Abi tsü arüh Tsingrangepü arühnü sobhore.

²² Tsingrangba-nü Ijip lanü arüh nüchehcho; Abinü arüh nengdang rangmü misüpung kyo khatacho.

²³ Israel yucho nyüm bichinung, Zii ko amongzi mühle. Ade müyurünü Israel nengdang yonung, ‘Dhing Tsingrangba-nü tu nguchicho!’

²⁴ Israel yucho tsü kangdi akurah kyole; Abinü rehnah mümünyüde münyehlire. Abinü kyüsehba shüh tsünü mümüchade münyehlire.”

²⁵ Hütsüde Balak-nü Balaam te yocho. “Nühnü Israelrü chah chokehchola müjünyüre, ta amüwa dusü tümüwajü!”

²⁶ Balaam-nü lalingcho, “Abüdongba-nü tu yonang hütsüri lüpcho Ihnü nguchinungepü nüte müyocho mah-o?”

Balaam-nü Choyohcho Asanguba

²⁷ Balak-nü yocho, “Müdüm apa khüdulang nüh nowünung Ite rung. Kümüdeo hütsülanü Tsingrangba-nü nü khyang arüh chokehcholasohnung kohle.”

²⁸ Achotsü abinü Balaam nüpü lipilih chahchü nguba Peor zong khang chah tuwücho.

²⁹ Balaam-nü abi te yocho, “I nengdang hila bholu dhünyeh külüpm ko misüpung dhünyeh ko mizapung dhünyeh hirung.”

³⁰ Abi te yocho kyo Balak-nü nguchicho ko bholu müipi chah tsü misüpung ko mizapung khüdu-khüdu mübücho.