KHIDHINGCHO 22 - AMÜSA BAIBEL (BSI)

Moab Yangthsabanü Balaam Dsicho

¹ Israelrünü shehmüi wü Jordan nyüchürolang ko Jeriko khüu langthring Moab ngah la licho.

² Khode Moab yangthsaba, Zippor tsurü Balak-nü Amor-rü chah Israelrünü tu nguchicho ko Israelrü arüh khütoio hütsü yuchicho,

³ abi ko abi müyurüti atümung drümüyangcho.

⁴ Moabrünü Midian-rü zirü te yocho, “Misüpungnü rangyola zanu müxücheh tsukhangcho kyo hirinü tunyah mülipü Ihsa mükang lüpcho changjünung.”

⁵ Achotsü yangthsaba Balak-nü Amor lih la Eufrates yongkhi shündhün Pethor la liba Beor tsurü Balaam adsinung yusi hirü müthehcho. Arühnü Balak chahnü yusi hi hirocho: “Ijip lanü yucho khüdu chürocho nü khyang müdhesohnyüre; arüh nyitsarü tsü apümlang tsishoko ko ihrü lih khyünung thsale.

⁶ Arüh drongrale, hütsüeko yanglilüm rung ko I nengdang arüh chokehcholaang. Hütsükhang, kümüdeo ihrünü arüh kohnung ko ihrü lih lanü arüh iipehnung. Nühnü müwajükhang müware, nühnü chokehcholakhang, chokehcholarepü ihnü müdhele.”

⁷ Achotsü Moab-rü ko Midian-rü zirünü chokehcholanung ngang amii hijüpü Balaam yanglang wücho ko Balak chahnü yusi tsü jücho.

⁸ Balaam-nü arüh te yocho, “Shomülang hila yüpm ko Abüdongba-nü tu yonang Ihnü nührü te atunyang yonung.” Achotsü Moab-rü zirü tsü Balaam kuh la yüpcho.

⁹ Tsingrangba-nü Balaam yang ro tsingdhingcho, “Nü kuh la müdongrü hi sürüo?”

¹⁰ Abinü lalingcho, “Moab yangthsaba Balak-nü

¹¹ Ijip lanü roba nyitsarütinü alih apüm sohjenglepü yonung rosohcho. Abinü arüh te khata iipehnung shulüm arüh chah chokehcholajüng pü” Ite yonung rosohcho.

¹² Tsingrangba-nü Balaam te yocho, “Hiri yola tüwü ko Israelrü chah tüchokehchola, tunüo Ihnü arüh müwajüko.”

¹³ Nyangnyü khüu Balaam-nü wü Balak yusi hirü te yocho, “Nührü thali wüng; Abüdongba-nü Ite nührü yola tüwüpü yoko.”

¹⁴ Achotsü arühnü Balak yang thali wü Balaam tsü müro pü yusi tsü yocho.

¹⁵ Thali Balak-nü akhurü tenü adrongu atungte nyitsarüti müthehcho.

¹⁶ Arühnü Balaam yanglang wü Balak chahnü yusi hi jücho: “Nüh I yanglang ronung tunüsü tüyatisoh!

¹⁷ Ihnü nüh khütang jiyünung ko nühnü tonang hütsüta nguchinung. Yanglilüm ro I nengdang nyitsarü hiri chokehcholajüng.”

¹⁸ Ta Balaam-nü lalingcho, “Balak-nü akuh la licho hon ko taripi apüm I khyang jünye, Ihnü I Abüdongba Tsingrang yu aikyahsü pehnung mükoh.

¹⁹ Ta shomülang hila yüpm ko Abüdongba-nü lango yo a mahnang nyidhingnung.”

²⁰ Hütsü romang Tsingrangba-nü Balaam yanglang ro yocho, “Hiri hi nüh nowünung rocho thsakhang, rungnüm ko wüng, ta Ihnü tu yonang hütsü du nguching.”

²¹ Achotsü nyangnyü khüu Balaam-nü abi gadu chah pümpü Moab-rü zirü yola wücho.

Balaam ko Abi Gadu

²² Balaam wücho khu Tsingrangba mükünyangcho ko Balaam tsü akulirü anyünü müyangnü gadu chah pümpü wüyade, Abüdongba riwürü khüdu jüro abi lang yati yacho.

²³ Gadu tsünü riwürü tsü nohsheng bipü yacho ngude abinü rangmülang ximüla tsicho. Balaam-nü gadu tsü lahnü langlang norocho.

²⁴ Achotsü riwürü tsünü shükusiluh anyüh kahla Anyüdinglang lungnü chungti licho akongchongla yacho.

²⁵ Khode gadu tsünü riwürü tsü ngucho, abinü akongchongchah tsü tsohkehcho ko hütsü chahnü Balaam jing nyehcho. Anyüpiusü Balaam-nü gadu tsü lahcho.

²⁶ Adesü riwürü tsünü bekhu wüpü alahkhu mütsanung akongsüm khüdula yacho.

²⁷ Adelü, gadu tsünü riwürü tsü ngude abinü yüp-pehcho. Balaam-nü azi chüro gadu tsü xüpnahmüsucho.

²⁸ Hütsüde Abüdongba-nü gadu khyang yuchonung zii jücho ko gadu tsünü Balaam te yocho, “Ihnü nüte tu nguchicho? Tuepü hinü asangpi I chah xüpro?”

²⁹ Balaam-nü lalingcho, “Tunüo nühnü Ih tachiko! Ih nohsheng birelang, nüh kyüsehnung.”

³⁰ Gadu tsünü lalingcho, “Nü akang ayung pümba gadu tsü Ih mahrü do? Ihnü hi kyo akhulang nüh tachicho do?” Abinü lalingcho, “Mütachi.”

³¹ Hütsüde Abüdongba-nü Balaam nahtse khangthrujücho ko hütsüla riwürü khüdu nohsheng bipü yacho ngusohcho; Ko Balaam-nü alih la apu jangjang aromih thsürangcho.

³² Riwürü tsünü yocho, “Tuepü nühnü nü gadu chah asangpili xüpcho? Ih nü lang yatinung rocho, tunüo nühnü hiba nguchi hi münguchiba thsacho.

³³ Ta nü gadu-nü Ih ngupü asangpili ximülacho. Abinü hütsüta müthsarelang, Ihnü gadu tsü pehjüpü nüh kyüsehpü liba thsako.”

³⁴ Balaam-nü lalingcho, “Ihnü amünyi shitpahko. Nühnü langla yapü Ih yatirepü Ihnü mümüdheko; ta Ih wünung tsü amüthsalang thsakhang, Ihnü kulang thalinung.”

³⁵ Ta riwürü tsünü yocho, “Hiri yola wüng, ta Ihnü yocho du young.” Achotsü Balaam-nü arüh yola wücho.

Balak-nü Balaam Khyüchocho

³⁶ Khode Balak-nü Balaam rolepü yuchicho, abinü abi mütohnung Moab-rü lurü la Arnon Yongkhi bekhümla Ar yangdi chii wücho.

³⁷ Balak-nü abi te yocho, “Ihnü akhudi dside tuepü mürocho? Ihnü nü khyang müjünungepü lümcho mah-o?”

³⁸ Balaam-nü lalingcho, “Dhing! Ih ro lile. Ta ade Ih tu tase liro? Tsingrangba-nü tu youngrünang hütsü du yonung kohle.”

³⁹ Hütsüpü Balaam-nü Balak yola Huzot yangdi lang wücho

⁴⁰ ko Balak-nü misü ko San khürü kyüseh Balaam ko abi yola rorüti khyang shuh khürü jücho.

Balaam-nü choyohcho Akhudiba

⁴¹ Nyangnyü khüu tsü Balak-nü Bamoth Baal-lang Balaam notuwücho ko Israelrü liba khürü ngusohcho.