KHIDHINGCHO 20 - AMÜSA BAIBEL (BSI)

Kadesh la Tikehcho

¹ Akhudiba Choo la Israelrü amülungshünü Zin akunglih yang ro Kadesh la licho. Hütsüla Miriam sücho ko dhrürangcho.

² Arüh liba la tsü kih mülicho, achotsü müyurünü Mosa e Aron nyüh mükang shibülung jümjüm yocho:

³ Abüdongba Shükuh bete ihrü nyitsarü Israelrü yola sülang hütsü atsauba thsako.

⁴ Tuepü ihrü hiba akungaselih la norocho? Hila ihrü kanglungrü yola süsohnungba ang?

⁵ Tuepü Ijip lanü tu müchüroba lih hila ihrü norocho? Hila fürü, ngurüsih, shükusih mahkhang tsanümsih tu mühle. Ayongnung kih mii mühle.

⁶ Mosa e Aron nyühnü müyurü tenü za wü Shükuh trahtri la yacho. Arühnü alih la arüh romih mükhukehcho ko Abüdongba ahechi arüh michah rocho.

⁷ Abüdongba-nü Mosa te yocho,

⁸ “Yuzeng Singdi bete liba ja tsü khyüng ko Aron nühjünü Israelrü atümung shimükhongsohng. Hütsüla arüh bete liba lung te tsü kih pohchehnung young. Hütsüta nühnü arüh ko arüh kanglungrü nengdang ayongnung kih lung la tsünü pohchehsohnung.”

⁹ Abüdongba-nü mülacho kyo Mosa-nü wü ja tsü khyücho.

¹⁰ Aron anyünü amülung apüm lung bete tsü shibülungsohcho ko Mosa-nü yocho, “Nyieng, nührü anyümrüti! Nührü khyang lung hilanü kih pohchehsohnungo?”

¹¹ Hütsüta Mosa-nü ja tsü dhimüsu lung chah tsü anyüpi xüpcho, ko kih amülah pohchehcho ko nyitsarü ko kanglungrü apüm yongcho.

¹² Ta Abüdongba-nü Mosa e Aron nyüh yübücho. Abinü yocho, “Nühjünü Israelrü bete Ih Amüsa zii chah müyudsicheh. Hütsünü anyengchocho lih la tsü nühjünü arüh nomüzüdusohnung.”

¹³ Israelrünü Abüdongba nyümba ko arüh te Abi tsü Amüsaepü ngusohba Meriba la hi tikehcho.

Edom Yangthsabanü Israelrü Mülahkhusohcho

¹⁴ Mosa-nü yusi hirü Kadesh lanü Edom yangthsaba yang müthehcho. Arühnü yocho, “Hiba yusi hi nührü jünirü Israelrü chahnü lile. Ihrü khütoi chongcharo,

¹⁵ ihrü jümürü khüta Ijip lang wücho ko anyahli hütsüla licho hütsü nühnü müdhele. Ijiprünü ihrü jümürüti ko ihrü sehchi bichicho,

¹⁶ ko ihrünü Abüdongba arüku nengdang züdecho. Abinü ihrü züdecho yuva yuchi Ijip lanü ihrü nüchehnung riwürü khüdu müthehcho. Ko ade ihrü nührü lurü la Kadesh yangdila lile.

¹⁷ Yanglilüm nü lih khu ihrü lahkhu tsisohng. Ihrü ko ihrü kanglungrünü lang tenü za nührü luh lang mahkhang shükusiluh la müzüdunung ko nührü kihkong lanü müyongnung. Nührü lih mükhude ihrünü langtungte la du tsehnung.”

¹⁸ Ta Edomrünü lalingcho, “Ihrü lih khu mütsisohnung! Nührünü emüthsakhang, ihrünü shemüsu nührü mahnung.”

¹⁹ Israelrünü yocho, “Ihrünü langtungte la du tsehnung ko ihrü mahkhang ihrü kanglungrünü nührü kih yongjükhang ihrünü angang jünung nührü lih lahkhu tsinung nengdang du mülaang.”

²⁰ Edomrü tsünü thali yocho, “Ihrünü münyengchore!” Ko arühnü Israelrü te khatanung rothsarü adrong nüpü shemüsucho.

²¹ Edomrünü arüh lih khu Israelrü mütsisohcho khu, Israelrünü lang palangnü tsicho.

Aron Sücho

²² Israelrü amülung apümnü Kadesh pehjüpü ro

²³ Edomrü lurü Hor Zong chihcho. Hütsüla Abüdongba-nü Mosa e Aron nyüh te yocho,

²⁴ “Ihnü Israelrü khyang jünung nyengchoba lih la tsü Aron müzüduchehnung; abi sünung, tunüo nühjünü Meriba la I yuzeng nyümko.

²⁵ Aron ko atsudhre Eleazar nyüh Hor Zonglang nokürung,

²⁶ ko hütsüla Aron chahnü bebürü jengki khohcheh Eleazar khyang hütsüri khyüsohng. Hütsüla Aron sünung.”

²⁷ Abüdongba-nü yocho kyo Mosa-nü nguchicho. Arühnü amülungnü ngu Hor khang chah küducho,

²⁸ ko Mosa-nü Aron chahnü bebü jengki khohcheh Eleazar khyang khyüsohcho. Hütsüba khang chah Aron sücho ko Mosa e Eleazar nyüh thali jürocho.

²⁹ Amülung tsünü abi nengdang nyümong sangre meshücho.