KHIDHINGCHO 18 - AMÜSA BAIBEL (BSI)

Bebürü ko Levirü Anguchinung

¹ Abüdongba-nü Aron te yocho, “Shükuh la dikehde thsamehcho münyi nengdang nüh, nü tsurüti ko Levirü bha thsanung; ta bebü nguchila thsamehcho nengdanglü nüh ko nü tsurüti du bha thsanung.

² Nüh ko nü tsurüti Shükuh la dikehde nü yola nguchi nüh trosohnung, Levi hung nührü tsutpurü norung.

³ Arühnü nüh ko Shükuh xükümnung, ta Amüsa Müdüm mahkhang bholu chah Amüsa kohro tu chahsü müthahpübae.

⁴ Arühnü nüh dikehnung ko Shükuh la dikehba apüm xükümnung, ta müxangchehrülü süsü nü yola münguchinung.

⁵ Israelrü nyüm I rihlong müchüronungthsa, Amüsa Müdüm ko bholu lalü nüh ko nü tsurüti dunü xükümnung.

⁶ Israelrü yolanü nü khyang jiyü roh-i jünung Levirü nührü tsutpurü throchehba tsü Ihnü lile. Arühnü Shükuh la nguchichehnung nengdang I khyang arüh müsachehko.

⁷ Ta bholu ko khütang Amüsa Müdümla bebü nguchi nguchinunglü nüh ko nü tsurüti dunü xükümnung. Hiri hi nührü bha thsanung, tunüo Ihnü nührü khyang bebürü thsanung jiyü tsü jüko. Amüxangchehrü sü hiba Amüsa kohro shündhün ronang abilü süsohnung.”

Bebürü Nohlüm

⁸ Abüdongba-nü Aron te yocho, “I khyang amübü jücho amütrüpba mübü apüm nührü khyang jücho hi lümchehng. Nüh ko nü trah khyang lede nengdang hiba nohlüm hi jüre.

⁹ Bholu chah mütrüpba Amüsa mübü yolanü hiri hi nührü yo linung; tsang mübü, amünyi mübü ko sahliba amübü. Amüsa mübü khyang khütoi mübüro hütsü nüh ko nü tsurü yo thsanung.

¹⁰ Nührünü hiri hi Amüsa Müdüm lanü tsubae ko adhrerü dunü hi tsunung; arüh tsü Amüsa roh-i khiching.

¹¹ “Hütsüchah lahkeh, Israelrünü apa amübü tuturü I khyang jüro hütsü nührü yo thsanung. Ihnü hütsü nüh, nü tsurüti ko tsularüti khyang lede nengdang jüre. Nü kukhi la ayahnü sürü müsa liro arühnü hütsü tsunung kohle.

¹² “Israelrünü kang mükhu chisicho lanü ayingsih khüi I khyang jücho hütsü Ihnü nührü khyang jüre: Olive tuji, yongkha ko fürü.

¹³ Hiri apüm nührü yo lile. Nührü kukhi la ayahnü müsa lirü atümungnü tsunung kohle.

¹⁴ “Israel la I khyang khakhuchü müsachehjücho lüpcho nührü yo thsanung.

¹⁵ “Aukhuba ko kanglungrünye akhu mütrüba khüi Israelrünü I khyang mübüro hütsü nührü yo thsanung. Ta aukhurü lihcholinung angang tsü khyüng ko akhu mütrüba kanglungrü khüi ayahnü amümüsa khichiro, hütsü lihcholinung angang tsüsü khyüng.

¹⁶ Azarü tsü choo khüdu azirü thsa kahlanü akihchocho amii Shekel taripi münga jüpü lihchonung.

¹⁷ Ta akhu mütrücho misü, san ko mizalü mülihchonung; hütsürilü Iyo ko kangmübü jünungbae. Ashüh tsü bholu chah xahkehng ko asu tsü Ih künyang xümnungthsa tsang mübüthsa mübüng.

¹⁸ Hütsülanü shuh, adüzünü akhuh ko ajing khüi pathsa amübü liro hütsüri nührü yo thsanung.

¹⁹ “Israelrünü I khyang pathsa amübü jücho apüm tsü, aronung shang apüm la nüh, nü tsurü ko tsularüti khyang Ihnü jüre. Hiba hi amüthsangnyangba azengtaba Ihnü nüh ko nü trah te külüpre.”

²⁰ Abüdongba-nü Aron te yocho. “Nührünü thsiking thsanung kuthsi tu müngunung nührü khyang Israel lih lanü alih mülümchojünung. Nührü yo apümnü Ih, Abüdongba.”

Levirü Nohlüm

²¹ Abüdongba-nü yocho, “Israelrünü I khyang dhüre nohlüm jücho apüm Ihnü Levirü khyang jüko. Hi I Shükuh la nguchichongang linung.

²² Adelü Israel aparünü amünyi shitpah arüh müsünung nengdang Shükuh amünyeh türo.

²³ Ade tinü Shükuh tsü Levirü dunü xükümnung ko hütsü lüpcho arüh bha thsanung. Hiba yuzeng hi lede nengdang nührü chahnü trahchochoti shulümsü linung. Israel-la Levirü kuthsi mülinung,

²⁴ tunüo Israelrünü I khyang jüba dhüre nohlüm tsü Ihnü arüh khyang arüh yo thsanung jüko. Hütsünü Ihnü arüh te Israel-la arüh kuthsi mülinungepü yoko.”

Levirü Dhüre Nohlüm

²⁵ Abüdongba-nü Mosa te

²⁶ Levirü te hita yonung yuzengjücho: “Khode nührünü Israelrü chahnü dhüre nohlüm Abüdongba-nü nührü kuthsi thsanung jücho khyüchonang, nührünü hütsülanü dhürela nohlüm khüdu Abüdongba khyang jüng.

²⁷ Hiba amübü hi luthsarünü fürü asi ko yongkha asi külüpcho amübü jüba roh-i khichinung.

²⁸ Hütsüta nührünüsü Israelrü chahnü nguba dhüre nohlüm apüm lanü Abüdongba khyang jünung. Hiba amübü hi nührünü Abüdongba nengdang bebüba Aron khyang jüng.

²⁹ Nührünü ngucho lanü atsauba jüng.

³⁰ Khode nührünü atsauba tsü jünang, luthsarünü amübü jüpü anyingcho tsü yohpücho kyo anyingcho tsü nührü khyünung yohpüng.

³¹ Anyingcho tsü nüh ko nührü kukhirünü masü lanü tsunung kohle, tunüo hütsü Shükuh la dikehchongang nührü amii lile.

³² Nührünü atsauba tsü Abüdongba khyang jüpü khanglanglü hütsü tsunung tu mülang mülinung. Ta Amüsa jiyüla tsünü atsauba mümübücho khu münyinung müzahng; mahkhang nüh sünung.”