KHIDHINGCHO 17 - AMÜSA BAIBEL (BSI)

Aron Ja

¹ Abüdongba-nü Mosa te yocho;

² “Israelrü te ahung müipi lanü langnürü müipinü khüdu khüdu nü khyang ja dhüreanyüh jünung young.

³ Ja chah tsü palu neng thrahkehng ko Levirü nengla Aron neng thrasohng. Ahung langnürü müipi nengdang ja khüdu khüdu linung.

⁴ Hütsüri tsü I Shükuhlang tsü hiwüng ko Ihnü nüh shirüba Yuzeng Singdi bete tsü yohpüng.

⁵ Ko sü ja Ihnü throchehnang hütsü chah anu chinung. Hütsüta Ihnü Israelrünü nüh mütozah nyümba lanü zahsohnung.”

⁶ Hütsüta Mosa-nü Israelrü te yocho ko arüh langnürü müipinü ja khüdu khüdu abi khyang jücho, hung khüdu nengdang khüdu, apümnü dhüreanyüh ko Aron ja tsüsü arüh yola yohpücho.

⁷ Hütsüpü Mosa-nü ja apüm tsü Shükuh la yuzeng singdi bete yohpücho.

⁸ Nyümong khüu, khode Mosa Shükuh la tsü züducho, Levi hung nengla Aron ja chah tsü anu chipü ngucho. Hütsü anu chicho, api picho ko almond singsih nyi sihcho.

⁹ Mosa-nü ja apüm tsü hiwü Israelrü te tsü ngusohcho. Atikehcho tsü arühnü ngucho ko langnürü müipinü palu ja khyülicho.

¹⁰ Abüdongba-nü Mosa te yocho, “Aron ja tsü thali Yuzeng Singdi bete yohpüng. Hütsü anyümrü Israelrü nengdang, arühnü nyümba tsü müzahkhang arüh sünungepü amüdhethsanung yohpünung.”

¹¹ Mosa-nü Abüdongba-nü mülacho kyo nguchicho.

¹² Israelrünü Mosa te yocho. “Khang ihrü hütsü achangkae!

¹³ Sü Shükuh amünyethsa roro abi sükhang, ihrü atümung sücho atsau.”