KHIDHINGCHO 16 - AMÜSA BAIBEL (BSI)

Kora, Dathan ko Abiram-rünü Nyümcho

^1-2 Levirü Kohat hung lanü Izhar tsurü Koranü Mosa nyüm yamüsucho. Abi yola Reuben hung lanü nyüh asang Eliab tsurü Dathan ko Abiram nyüh ko Pelet tsurü On, ko aparü Israelrü amülungnü throchehcho anengkhong langnürü 250 zehcho.

³ Arühnü Mosa e Aron nyüh bete shibülungnü anyüh te yocho, “Nühjü khurale! Yucho la khiyoh atümung Abüdongba yo lile ko Abüdongba tsü Ihsa atümung te lile. Khang Mosa, tuepü nüpu jangjang Abüdongba müyurü atümung michah adiuba kangro?”

⁴ Mosa-nü hi yuchide, abinü alih la mükhukeh dangkhidangnangcho.

⁵ Hütsüpü abinü Kora ko abi monoti te yocho, “Atunyang Abüdongba-nü Ihsa sü Abi yonang ngusohnung; abinü sü Abi yonang abi khyang bholu chah thahpüsohnung, hütsü Abinü throchehcho linung.

⁶ Atunyang nüh ko nü monotinü michangfüh bieng, michüh yohng ko hütsü michah müchiji yohpü bholu lang hiwüng.

⁷ Hütsüde Abüdongba-nü Ihsa sü throchonang müdhenung. Khuraba tsü nührü Levirüe!”

⁸ Mütozah Mosa-nü Kora te yocho, “Nyieng, nührü Levirüti!

⁹ Israel Tsingrangba-nü nührünü abi te chotanung, Abüdongba Shükuh la dikehnung ko yucho dikehnung aparü yolanü pathsa khacheh yohpüba tsü aikyah-epü nührünü lümrü do?

¹⁰ Abinü nührü ko Levirü aparü atümung hiba jingdrang atsa hi ngusohcho ko ade nührünü bebü nguchi tsüsü khyünung müküpre.

¹¹ Nührünü Aron nyüm choba tsü nührünü Abüdongba nyümrepü müdheing.”

¹² Hütsüpü Mosa-nü Dathan ko Abiram nyüh dsinung müthehcho, ta anyünü yocho, “Ihjü müronung!

¹³ Ijip lih asu lanü nücheh ro ihrü akungaselih hila kyüsehnung tsü nüh mükükyührü mah-o? Hütsüla mii ihrü michah abüdong thsanyürü mah-o?

¹⁴ Nühnü asu lih lang ihrü nororü mah mahkhang kuh ko shükusiluh ihrü khyang jürü mah, ta ade nühnü ihrü thsüyohchünung müküpre. Ihjü müronung.”

¹⁵ Mosa tsü zichüronü Abüdongba te yocho, “Hirinü hirocho amübü tusü tükhyücho. Ihnü arüh sütesü müthsameh; Ihnü arüh gadu khüdu mii mükhyü.”

¹⁶ Mosa-nü Kora te yocho, “Atu nüh ko nü mono 250 tsü nüpü Abüdongba Shükuh yang rung; Aron-sü hütsüla linung.

¹⁷ Nührü müipinü abürü michangfüh tsü binung, müchiji hütsü michah yohnung, hütsüpü bholu chah hütsü mübünung.”

¹⁸ Achotsü arüh müipinü palu michangfüh tsü bicho, hütsüla michüh yohcho ko hütsü michah müchiji yohcho ko Shükuh trahtri la Mosa e Aron nyüh yola yacho.

¹⁹ Hütsüpü Koranü arüh trah apüm shibülungsohcho ko Mosa e Aron nyüh lahpi pinü Shükuh trahtri la tsü yasohcho. Dhrongyengnü Abüdongba ahechi amülung apüm michah hekehjücho,

²⁰ ko Abüdongba-nü Mosa e Aron nyüh te yocho,

²¹ “Hiri nyitsarü tenü shehpü yaang ko Ihnü arüh ade tsatsa changsohnung.”

²² Ta Mosa e Aron nyühnü alih la mükhukeh yocho, “O, Tsingrang, akang apüm chixiba Nüh lile. Nyüh khüdunü amünyi shitpahde yucho apüm chah Nü zichüronung mah-o?”

²³ Abüdongba-nü Mosa te yocho,

²⁴ “Müyurü te Kora, Dathan ko Abiram arüh lichahnü shehkhunung young.”

²⁵ Achotsü Mosa-nü Israel langnürüti zeh Dathan e Abiram nyüh yanglang wücho.

²⁶ Abinü müyurü te yocho, “Hiri akhürahrü shükuh lanü shehmüing ko arüh kohro tu chahsü tüthahbü. Mahkhang arüh münyi ngang arüh yola nührü mii wohpehnung.”

²⁷ Achotsü arühnü Kora, Dathan ko Abiram-rü shükuh lanü shehmüicho. Dathan e Abiram nyühnü chüro anyüh nitpürü ko tsuzarü te arüh Shükuh trahtri la yacho.

²⁸ Mosa-nü müyurü te yocho, “Hi khu hiri nguchiba hi Ipu lümchonü mah ta hiri apüm nguchinung Abüdongba-nü Ih müthehchoepü nührünü müdhenung.

²⁹ Hiri nyitsarüti hi Tsingrangba chahnü akhingchi khürü khu mahpü akyang sükhang, Ih Abüdongba-nü mümütheh.

³⁰ Ta müyuchidhingcho lango Abüdongba-nü nguchikhang, alihnü kanung ko arüh licho apüm te arüh münyünung ko arüh akangnü asülih la züdunung, hütsüde nührünü hiri nyitsarütinü Abüdongba dhsonglichoepü müdhenung.”

³¹ Abinü hütsü chokayeng, Dathan e Abiram nyüh yaba alih tsü karüpcho

³² ko arüh ko arüh kukhiti, Kora ko abi monoti apüm ko arüh kuthsi apüm münyüpehcho.

³³ Hütsüta arüh tsü arüh lih Sheol-lang akangnü arüh kuthsite züducho. Arüh michah alihnü khangticho ko arüh changpehcho.

³⁴ Arüh tracho yuchide, hütsüla lirü Israelrü atümung drü tsipehcho. Arühnü züdecho, “Shang! Alihnü Ihsasü münyükhangmütsa!”

³⁵ Hütsüde Abüdongba-nü michang mütheh müchiji tah mübürü arüh 250 tsü trüp-pehcho.

Michang Tbhü

³⁶ Hütsüpü Abüdongba-nü Mosa te yocho,

³⁷ “Bebüba Aron tsurü Eleazar te atrüp-pehrü kohro anyingchola tsünü imüyeng michang tbhü tsü hirungding ko tbhü la tsünü miha tsü khüdenang pehnung young, tunüo michang tbhü tsü Amüsa lile.

³⁸ Hütsüri tsü Abüdongba bholu yang hirodenü müsapehko. Hütsüeko arüh münyi ngang süsohbarü michang tbhü tsü khyo mütpah kengtpahpü bholu lüptising thsaang. Hütsü Israelrü nengdang amüzahnung linung.”

³⁹ Achotsü bebürü Eleazar-nü hütsüri khyo mütpah kengtpahpü bholu lüptising thsacho.

⁴⁰ Hütsü Aron trah chah khu aparü sünüsü Abüdongba khyang müchiji tahnung bholu yang müronung Israelrü nengdang amüzahnung licho. Mahkhang Kora ko abi nyitsarü kyo changnung. Hi apüm tsü Abüdongba-nü Mosa khu Eleazar khyang yuzengjücho khu du nguchicho.

Aron-nü Müyurü Khümchocho

⁴¹ Nyümong khüu tsü amülung shünü Mosa e Aron nyüh nyüm jümjüm yocho, “Nühjünü Abüdongba müyurü khürü süsohko.”

⁴² Mosa e Aron nyüh nyüm arüh atümung shibülungpü khanglang, arühnü Shükuh lahpi tsü ximüla dhingde nyükhinü hütsü lohticho ko Abüdongba ahechinü teh ngucho.

⁴³ Mosa e Aron nyühnü Shükuh bete tsü wü yacho,

⁴⁴ ko Abüdongba-nü Mosa te yocho.

⁴⁵ “Hiri tenü shehkhung, Ihnü ade arüh hila changjünung.” Anyünü alih la mükhukehcho,

⁴⁶ ko Mosa-nü Aron te yocho, “Nü michang tbhü bieng, bholu lanü hütsüla michüh yohng ko hütsü michah müchiji aza yohng. Hütsüpü müyurü yanglang dhsüdhsa wüng ko arüh nengdang müsachehba nguchi nguching. Dhsüdhsang! Abüdongba rihlong chüropehko ko rümra khüdu dikehpehko.”

⁴⁷ Hütsü Aron-nü nyicho, abi michang tbhü bicho ko müyurü shimükhong licho longla tsü shang wücho. Khode abinü rümra tsü dikehpehpü ngucho, abinü michüh chah tsü müchiji tsü yohcho ko müsachehba nguchi tsü nguchicho.

⁴⁸ Hinü rümra tsü yaticho ko abi tsü akang lirü e asürü kahla yasohcho.

⁴⁹ Kora yola sürü mükhipü arüh hajar dhüre müyüpü thsih dhünyeh sücho,

⁵⁰ Khode rümra tsü zahcho, Aron-nü Mosa yang Shükuh trahtrilang wücho.