KHIDHINGCHO 13 - AMÜSA BAIBEL (BSI)

Füzathsarü

¹ Abüdongba-nü Mosa te yocho,

² “Hung dhüreanyüh müipi lanü langnürü khüdu-khüdu throung ko Ihnü Israelrü khyang jüba Kanan lih chehdhingnung wüsohng.”

^3-15 Mosa-nü yochonyi Paran akungaselih lanü langnürüti hiroh-i müthehcho: Ahung Langnürü Reuben Zakur tsurü Shamua Simeon Hori tsurü Shafat Juda Jefune tsurü Kaleb Isakar Josef tsurü Igal Efraim Nun tsurü Hoshea Benjamin Rafu tsurü Palti Zebulun Sodi tsurü Gadiel Manase Susi tsurü Gaddi Dan Gemali tsurü Amiel Asher Mikael tsurü Sethur Naftali Vofsi tsurü Nabi Gad Maki tsurü Geuel

Ahung Langnürü

¹⁶ Alih chehdhingnung Mosa-nü füzathsarü müthehrü tsü hiri licho. Abinü Nun tsurü Hoshea tsurü neng tsü Joshua mülijücho.

¹⁷ Mosa-nü arüh wüsohde, abinü arüh te yocho, “Hilanü kihku lahpi Kanan lih kihjing lahpilang wüng ko hütsülanü azong lih lang tsü züdung.

¹⁸ Limih tsü tu roh-i, nyitsarü khütoi liro ko arüh khütoi re azeh hiri tsü rangchehng.

¹⁹ Alih tsü tsarü mütsarü ko nyitsarüti tsü lungtbü yangdila lirü a mütbüticho yangdila liro hütsü rangchehng.

²⁰ Alih tsü asu a mahnang ko mürong mülinang dhing. Ko hütsü lih lanü singsih khürü hirung.” (Hütsü shükusih nyiba akyang thsacho.)

²¹ Achotsü arühnü kihku lahpi tsü wücho ko kihjing lahpi Zin akungaselih lanü kihku lahpi Hamath Lang shündhün Rehob chii alih tsü jüchocho.

²² Arühnü akhudi kihjing lahpi wücho ko akurong Anakim trah Ahiman, Sheshai ko Talmai hungti liba Hebron lang rocho. (Hebron tsü Ijip la Zoan tenü kang dhünyeh bekhu thricho.)

²³ Arühnü Eshkol Ngah la rocho, ko hütsüla arühnü shükusih müphung khüdu sihba ajengza khüdu kyüsahcho ko hütsü khura mülingchonü nyüh anyünü sing tohyohpü dhicho. Arühnü tsanümsih ko ngurüsisü khürü hirocho.

²⁴ (Hütsü müdüm te Eshkol Ngah) pü dsicho, tunüo Israelrünü hütsüla shükusih müphung-o kyüsahcho.

²⁵ Nyümong yüre khyo arühnü alih tsü jüchodhingpü, achehdhingrüti tsü

²⁶ Mosa, Aron ko Israelrü yang Paran akungaselih la Kadesh la thali rocho. Arühnü tu ngucho hütsü yocho ko arühnü hirocho singsih tsüsü ngusohcho.

²⁷ Arühnü Mosa te yocho, “Ihrünü alih tsü jüchoko ko alih tsü dee asu lile; ko hütsülanü hirocho singsih hila khürü lile.

²⁸ Ta hütsüla lirü tsü re azeh ko arüh yangditi tsü dee amülülah ko dee tsa tbütipü lile. Adrünung tsü, akurongrü trah khüdu hütsüla lile.

²⁹ Kihjing lahpi tsü Amalek-rü, Hit-rü, Jebus-rü lile ko Amor-rü tsü azong lih la lile; ko Kanan-rü tsü Mediteranean kihdi te ko Jordan Yongkhi jüp lile.”

³⁰ Ko Mosa bete Kaleb-nü aparüti tsü yuva müchürosoh yocho, “Ihsanü ade arüh mah alih tsü khyübae; arüh kohnungthsa Ihsa tase lile.”

³¹ Ta Kaleb yola würü tsünü yocho, “Doh! Ihsanü arüh mükohnung; Ihsa tenü arüh re azehbae.”

³² Hütsüta arühnü jüchoba lih nengdang tsü Israelrü yola arahkheh sobhocho. Arühnü yocho, “Alih la tsünü hütsüla lirü tsuxah mii müchürore.

³³ Ihrünü ngucho atümung athsengthseng ko Anak chahnü trahchocho akurongrü mii nguko. Arüh dhingde Ihsalü khengqu khüdu roh-i due.” Ihsanü hütsü müdhebae.