KHIDHINGCHO 12 - AMÜSA BAIBEL (BSI)

Miriam Khingchicho

¹ Mosa-nü Kush-larü khüdu te kukangcho ko hütsü nengdang Miriam e Aron nyühnü abi nyüm chocho.

² Anyünü yocho, “Abüdongba-nü Mosa khu dunü chotacho mah-o? Abinü Ihsa khunüsü müchotacho do?” Abüdongba-nü anyünü choba tsü yuchicho.

³ Mosa tsü limih la atümung tenü alonglüm nyitsarü khüdu licho.

⁴ Dhrongyengnü Abüdongba-nü Mosa, Aron ko Miriam te yocho, “Ihnü nührü asang Shükuhlang rosohnyüre.”

⁵ Arühnü wücho ko Abüdongba nyükhi dongdila jürocho ko Shükuh trahtri la yapü zühde dsicho. “Aron! Miriam!” Anyünü bekhulang mütrah wücho,

⁶ ko Abüdongba-nü yocho. “Ade Ihnü yoba hi nyieng. Nührü yola azikehrü lide, Ihnü arüh te münguchehla mishacho ko arüh te melangla chotacho.

⁷ Ihnü I dikehrü Mosa te chotaba hi pa lile; I müyurü Israelrü atümung xükümnung Ihnü abi khyang nyümkehjücho.

⁸ Hütsünü Ihnü abi te romih e romih nyüh dhsükehta, arangyunü mah ta tsidsanü chotare; abinü I tsah mii nguko. Khüta nührünü I dikehrü Mosa nyüm chonung kohro?”

⁹ Anyüh te Abüdongba zichürocho; hütsünü abi za tside

¹⁰ nyükhi tsünü Shükuh tsü pehjücho ko dhrongyengnü Miriam fü tsü mübhiranü tsüticho ko shurü kyo thru kangcho. Aron-nü abükyü tsü mübhiranü tsüti ngude,

¹¹ abinü Mosa te yocho, “Adirü, yanglilüm, ihrü hiba akhingchi khu tüchongchasoh.

¹² Abükyü afü changsho tsukhangpü asücho surocho kyo tükangsoh.”

¹³ Achotsü Mosa-nü Abüdongba te zühdecho, “O Tsingrang, abükyü kyangjüng.”

¹⁴ Abüdongba-nü lalingcho, “Abükyü aunü aromih chah müchohkehjükhang, abükyü ashah tsü nyümong dhünyeh hinungbae. Hütsüeko abükyü nyükhih khüdu amüdongchahnü tsisohng ko hütsüpü khanglang nüli ronung kohle.”

¹⁵ Hütsüpü Miriam tsü amüdongchahnü nyümong dhünyeh tsisohcho ko abükyü nüli mürode, müyurü süsü mütsehmüicho.

¹⁶ Hütsüpü arühnü Hazeroth pehjücho ko wü Paran akungaselih la amüdongchah külüpcho.