KHIDHINGCHO 11 - AMÜSA BAIBEL (BSI)

Müdüm tsü Tabera Dsicho

¹ Müyurünü arüh chongcha nengdang Abüdongba te jümjüm-müsucho. Khode Abüdongba-nü hütsü yuchicho, Abinü rihlongchüro arüh michah michang müthehcho. Hütsünü arüh yola trüpcho ko arüh müdongchah nangolang thsangnyangcho.

² Müyurünü Mosa te troung pü züdecho; abinü Abüdongba te dangkhidangnangcho ko michang tsü mehcho.

³ Hütsünü hiba müdüm te Tabera dsicho, tunüo hütsüla arüh yola Abüdongba michangnü trüpcho.

Mosa-nü Langnürü Nyühre Throcho

⁴ Israelrü yola shuparüsü khürü shitsehla tsü zehcho. Arühnü shuh khütang mükhyahcho ko Israelrü arühbürünüsü jümjüm yocho: “Shuh aza dusü ngurelanglü!

⁵ Ijip-lalü amükangnü ngu ihrü tsunyücho ngucho. Nushah, shongshevi, ziva, bangpang ko laseng hiri lümchehre.

⁶ Ta adelü ihrü remüzeh. Atsunung tusü mühle, nyümong mükhu manna hidu!”

⁷ (Manna tsü singtse aikyükyah kyo, adhingnung wala amüyeng)

⁸ Hütsü aromang yingkih yola arüh müdongcho te longcho.

⁹ Nyangnyü khüu müyurütinü hütsüri throbülung hüm kang dongpü ngüpnü hümdhse külüpcho. Hütsü olive tuji la ruhcho hümdhse kyo kyücho.

¹⁰ Müyurünü Shükuh trahtritila amülungmülung yapü jümjümba apüm tsü Mosa-nü yuchicho.

¹¹ Abüdongba-nü arüh te zichürocho müdhe abi mükünyangcho. Ko abinü Abüdongba te yocho, “Tuepü Ih hitoi mütsa bichiro? Tuepü Ite mükünyangro? Tuepü nyitsarü hitoi nengdang I khyang bhamüling hi jücho?

¹² Ihnü arüh mükülüp mahkhang münümüsu. Tuepü arükurü khüdu kyo I kheh la akhungarü kyo wüpnü nühnü arüh jümürü te nyengchoba lih lang nowünung Ite yoro?

¹³ Ihnü khüdenü nyitsarü hitoi nengdang shuh ngunung? Arühnü mütozah tra shuh chingre.

¹⁴ Nyitsarü hitoi I mülengnülü müxükümcheh; I nengdang dirale!

¹⁵ Nühnü Ih hita bichiekhang, müipü Ih kyüsehpehng” tunüo Nühnü khingchicho Ihnü mürangchore.

¹⁶ Abüdongba-nü Mosa te yocho, “Müyurünü langnürüepü khyüchochehba azirü nyühre nübülung, arüh tsü I Shükuh la I yanglang norung ko hütsüla nü müshüm yasohng.

¹⁷ Ih jüronung ko hütsüla Ihnü nüte chotanung ko Ihnü nü khyang jücho lanü anbü khürü khyo arüh khyang jünung. Hütsükhang, nyitsarü hitoi bhamüling tsü nü mülengnü mühinung, ta arühnü tronung.

¹⁸ Hütsüeko ade müyurü te young, ‘Atu nengdang nührü jangjang müsachehng; nührünü atsunung shuh ngunung. Nührünü shuh lilanglü, ko Ijip la lide atsauepü tranü chocho Abüdongba-nü yuchiko. Ade Abüdongba-nü nührü khyang shuh jünung ko nührünü hütsü tsunung.

¹⁹ Ko hütsü nührünü nyümong khüdu anyüh, mahkhang münga mahkhang dhüre mahkhang mükyü nyümong du tsunungba mah,

²⁰ ta nührü nabong lanü tavi xüm mümüthohde choo yungtsa tsunung. Hi tikehnung, tunüo nührü yola liba Abüdongba te jümjüm Ijip müpehjüba thsako pü Abi nyümko.’”

²¹ Mosa-nü Abüdongba te yocho, “Ihnü hila nyüh hajar thsih dhüroh nole ko Nühnü arüh khyang choo khüdu shuh kükyo jünungepü yorü ang?

²² Arüh longxo misü ko san müpsehchehnung do? Kihdi la zehba ngu apümnü mii arüh kükyünung do?”

²³ Abüdongba-nü lalingcho, “I zii akihzah lirü do?” “Ihnü yoba hi tikeh a mütikehnang nührünü zah ngunung!”

²⁴ Achotsü Mosa-nü wü müyurüti te Abüdongba-nü yocho roh-i arüh te yocho. Abinü langnürü nyühre nübülung Shükuh mükang yasohcho.

²⁵ Hütsüde Abüdongba nyükhila jürocho ko abi te chotacho. Abinü Mosa khyang jüba anbü lanü khürü khyo langnürü nyühre khyang tsü jücho. Khode arüh michah anbü tsü rocho, arühnü azikehrü kyo akhikyahchah choyohcho.

²⁶ Langnürü nyühre yola nyüh anyüh Eldad ko Medad nyühnü Shükuhlang tsü müwüpü amüdongchah du pümcho. Hütsüla arüh michah anbü tsü rocho ko arühnüsü azikehrü kyo choyohmüsucho.

²⁷ Dhrezarü khüdunü wü Mosa te Eldad e Medad nyüh nguchiba tsü yocho.

²⁸ Hütsüde azadenü Mosa tro roba Nun tsurü Joshua-nü Mosa te yocho, “Adirü, arüh tsü yatieng.”

²⁹ Mosa-nü lalingcho, “I nguchi nengdang nühnü tülümxü. Ihnülü Abüdongba-nü Abi müyurü atümung khyang Abi anbü jo arüh atümungnü azikehrü kyo choyohsohnyüre.”

³⁰ Hütsüpü Mosa ko langnürüti arüh nyühre tsü müdonglang thalicho.

Abüdongba -nü Mümüyüh Müthehcho

³¹ Dhrongyengnü Abüdongba-nü nyübong müthehnü kihdi lanü mümüyüh alihtenü khehap anyüh mii müthsa mongchi rosohcho. Uzati tsü arüh müdongchah jeng apümlang lutri adrong mongyohsohcho.

³² Hütsüta mükhyang müyüp ko nyümong khüu mükhyang müyurünü mümüyüh tsü rangbülungcho; nyitsarü mükhu süreh hajar mihlang du rangcho. Arühnü arüh liba mükangmüla hütsüri kungcho.

³³ Arüh shuh atsunung kükyo liyade, müyurü te Abüdongba zichürocho ko arüh yola rümra chürosohcho.

³⁴ Hütsüba müdüm te, “Shuxangrü Kong” pü dsicho, tunüo hütsüla arühnü shuxangrü dhrürangcho.

³⁵ Hütsülanü arühnü shehmüi wünü Hazeroth la müdongcho.