JOSHUA 7 - AMÜSA BAIBEL (BSI)

Akhan Münyi

¹ Abüdongba-nü Israelrü te Jeriko lanü tusü mükhyünung ta lüpcho changpehsohnung yobasü münyicho. Nyitsarü khüdu anengnü Akhan-nü hütsüba yuzeng tsü thsangnyangcho, hütsünü Abüdongba-nü Israelrü te rihlong chürocho. (Akhan tsü Zabdi shümtsurü ko Karmi tsurü, Juda hung lanü changshocho Zera tsutpu lanü licho)

² Joshua-nü Jeriko lanü Bethaven shündhün, Bethel nyüchüro lahpi yangdi khüdu Ai yanglang limih tsü xüchonung nyitsarü khürü wüsohcho. Arühnü hütsü xodhingpü Joshua te yusi jücho:

³ “Ai mahnung Ihsa atümung wünung müdhsütah. Nyüh hajar anyüh mahkhang asang du müthehng. Hütsü nengdang rothsarü apüm tümütheh; hütsü yangdi amülah khüdu mah.”

⁴ Hütsünü Israelrü nyüh hajar asango du hütsü mahnung wücho, ta arüh dseli müthehcho.

⁵ Ai-rünü arüh tbükhüm lanü Shebarim chii iijowü arüh sangrepü dhüroh kyüsehcho. Hütsükolü Israelrü tsü müci süm drüpehcho.

⁶ Joshua ko Israelrü langnürütinü awahchonü arüh shü rehnah, arüh awah ngusohnung arüh thah chah tavi kangkeh, Abüdongba Yuzeng Singdi jingte chichi hütsüla nyüzeh yüpjocho.

⁷ Ko Joshua-nü yocho, “Abüdongba Tsingrang! Tuepü Nühnü ihrü Jordan keh norocho? Amor-rü kheh la jünungba ang? Ihrü changsohnungba ang? Tuepü ihrü yah Jordan khüulang tsü mülisohcho?

⁸ O Abüdongba, Ihnü tu yonung, tunüo Israelrü arorüh tenü shehli roko.

⁹ Kanan-rü ko hütsü lih la lirü apümnü hütsü yuchinung. Arühnü ihrü benung ko ihrü apüm kyüsehnung. Hütsüde Nühnü Nü neng khümchonung tu nguchinung?”

¹⁰ Abüdongba-nü Joshua te yocho, “Shemüsung! Tuepü alih la hita yüpjoro?

¹¹ Israelrünü amünyi shitpahko! Arühnü Ite anyengchotacho thsangnyangko. Arühnü changpehsohnung lanü kohro khürü khyüko. Arühnü fühko, arahkheh choko ko arüh kohro yola yohko.

¹² Hütsü khu Israelrünü arüh rorüh bete müyachehre. Arühnü arüh betenü shehre, tunüo arühbürü tsü ade changpehnung mülangjüko! Ihnü nührü te mükhyünung yoba kohro tsü nührünü müpehkhangdelü Ih nührü te mülinung.

¹³ Shemüsung! Müyurüti müsachehsohng ko I yanglang ronung rungnümsohng. Atu rungnümnung arüh te young, tunüo Ih Israel Tsingrang Abüdongba-nü hi yore: ‘Israelrü, Ihnü changpehsohcho kohro khürü nührü kheh la lile. Nührünü hi müpehde nührü rorüh bete müyachenung!’

¹⁴ Hütsüeko anyangnyü tsü arüh ahung-ahungnü ronung young. Ahung khüiba Ihnü throchehnang hütsü tsutpu-tsutpu rosohng. Tsutpu khüi Ihnü throchehnang, kukhi khüi Ihnü throchehnang, nyüh khüdu-khüdu rosohng.

¹⁵ Sü kheh la mülangjücho kohro tsü zehnang abi tsü abi te akukhirü ko abi kohro apüm zeh trüp-pehnung, tunüo abinü Israel khyang ashah dira hirojüko ko Ite azengtacho thsangnyangko.”

¹⁶ Nyangnyü khüu mütoh Joshua-nü Israelrü ahung-ahung nüchehcho ko Juda hung throchehcho.

¹⁷ Abinü Juda hung atsutpu-tsutpu nüchehcho. Hütsüpü abinü Zera tsutpu akukhi-kukhi norocho ko Zabdi kukhi throchehcho.

¹⁸ Hütsüpü abinü Zabdi kukhi nyüh khüdu-khüdu norocho ko Zabdi shümtsurü Karmi tsurü Akhan throchehcho.

¹⁹ Joshua-nü abi te yocho, “Itso, Israel Tsingrang Abüdongba bete yuje cho nyengchoung. Nühnü tu nguchicho Ite young. I tenü hütsü rangnung tümüküp.”

²⁰ Akhan-nü lalingcho, “Yuje,” “Ihnü Israel Tsingrang Abüdongba nyüm amünyi shitpahko ko Ihnü nguchiba tsü hi.

²¹ Ihrünü kengchocho kohro yola Ihnü Babylon-rü fükhüm khüdu taripi süreh anyü-oshi ko hon süreh achangshochah kehnü külüpcho tpah khüdu ngucho. Ihnü hütsü mükhyahrachonü hütsü khyüko. Hütsü I shükuh la taripinü akhyangdi thsapü jurangpüle.”

²² Achotsü Joshua-nü nyitsarü khürü müthehcho ko arühnü shükuh la tsü shangwücho ko mülangjücho kohro tsü taripinü akhyangdi thsapü hütsüla jurangpücho arühnü ngucho.

²³ Arühnü hütsü shükuh lanü Joshua ko Israelrü apüm yanglang hirocho ko Abüdongba bete hütsüri khyangpüjücho.

²⁴ Joshua yola Israelrü apümnü ro Akhan, taripi, fükhüm ko hon atpah, Akhan tsuzarüti, abi kanglungrüti, abi shükuh, ko abi yo lüpcho khyücho ko Akhor Ngah yang hirocho.

²⁵ Ko Joshua-nü yocho, “Nühnü tuepü achongcha hi ihrü michah hirocho? Abüdongba-nü ade nü chah achongcha hirojünung.” Hütsüde nyitsarü apümnü Akhan lungnü kengsehcho ko kohro tsü trüp-pehjücho.

²⁶ Arühnü abi michah lung khütangonü zangticho ko hütsü chünye yingcheh lile. Hütsünü hiba müdüm te chünye yingcheh Akhor Ngah pü dsire. Hütsüko du Abüdongba rihlong kyangcho.