JOSHUA 6 - AMÜSA BAIBEL (BSI)

Jeriko Khülucho

¹ Jeriko tbükhümti tsü Israelrü müzürosohnung khangticho ko nyahcho. Yangdila tsü süsü müzürosohcho mahkhang mütsisohcho.

² Abüdongba-nü Joshua te yocho, “Ihnü nü kheh la Jeriko yangthsaba ko athrungrü rothsarüti zeh jüko.

³ Nüh ko nü rothsarütinü yangdi tsü nyümongla khüdupi dhüroh nyümong mükang,

⁴ Bebürü dhünyeh arüh müipinü rühti bipü Yuzeng Singdi bekhu tsehnung. Adhünyeh nyümong bebürütinü rühti tsü mehnü nüh ko nü rothsarütinü dhünyehpili mükang.

⁵ Hütsüde arühnü yuva anyahli mehnung. Nührünü hütsü yuchide, nyitsarü apümnü yuva arangchehnü mohnung ko hütsüde yangdi tbü tsü khülunung. Hütsüde rothsarü apümnü müchongkhüti yangdila tsü züdung.”

⁶ Joshua-nü bebürüti dsinü arüh te yocho, “Yuzeng Singdi tsü dhieng ko nührü dhünyehnü rühti bipü hütsü bekhu püte.”

⁷ Hütsüpü abinü abi müyurü te Abüdongba Yuzeng Singdi bekhu anyahrü tsisoh yangdi tsü mükangnung shemüsunung yocho.

⁸ Hütsüta, Joshua-nü mülacho kyo, rühti mehba bebürüti bekhu anyahrü tsicho;

⁹ hütsü khangte Yuzeng Singdi dhirü bebürü anyahrü zeh rocho. Bekhyah hi ayung rühti meh licho.

¹⁰ Ta Joshua-nü abi müyurüti abinü yuzeng müjüdelü mümohnung ko yu khüdusü müchonung yuzengjücho.

¹¹ Achotsü abinü hiri mülung te Abüdongba Yuzeng Singdi tsü dhipü yangdi tsü khüdupi mükangnung yocho. Hütsüpü arühnü amüdongchah tsü thali rocho ko hütsüla yüpcho.

^12-13 Joshua-nü nyangnyü khüu mütoh surocho ko anyüpiu bebürüti ko rothsarü akhudi roh-i yangdi tsü mükangcho: akhudi, bekhu anyahrü; hütsü tung rühti dhünyeh mehrü bebürüti dhünyeh; hütsüpü Abüdongba Yuzeng Singdi dhirü bebürü ko akhangte anyahrü. Bekhyah hi ayung rühti meh licho.

¹⁴ Arühnü anyüu nyümong tsüsü yangdi tsü khüdupi mükangcho ko amüdongchah thalicho. Arühnü hütsüta dhüroh nyümong nguchicho.

¹⁵ Adhünyeh nyümong tsü arühnü mütoh surocho ko lede kyo yangdi tsü dhünyehpi mükangcho, hi nyümong du arühnü dhünyehpi mükangcho.

¹⁶ Adhünyehpi mükangde, khode bebürünü rühti tsü mehnung thsacho, Joshua-nü abi nyitsarüti te mohnung yuzengjücho ko abinü yocho, “Abüdongba-nü nührü khyang yangdi tsü jüko!

¹⁷ Yangdi ko hütsüla zehcho lüpcho Abüdongba khyang amübü kang changsohng. Nahtrahnaxenglatpü Rahab ko abükyü kukhirü du nyingjüng, tunüo abükyünü Ihsa füzathsarüti rangsohcho.

¹⁸ Ta achangsohcholanü nührünü tusü tükhyü; nührünü khyükhang, Israelrü michah chongcha ko achangba hirore.

¹⁹ Hon, taripi ko imüyengnü mahkhang idhsenü külüpcho lüpcho Abüdongba nengdang pathsa yohpünung. Hütsü Abüdongba kuthsi la yohpüng.”

²⁰ Hütsükolü bebürütinü rühti tsü mehcho. Müyurütinü hütsü yuchiyeng khütang zii mohcho ko tbü tsü khülucho. Hütsüpü rothsarütinü müchongkhüti yangdila tsü shiyoh mahchehcho.

²¹ Arüh nohshengnü yangdila tsü khingkurü adhrerü ko aza-azi apüm kyüsehcho. Arühnü misü, san ko gadu-sü müpsehcho.

²² Joshua-nü hütsüpü chehdhingnung wüsohba nyüh anyüh te tsü yocho, “Nahtrahnaxenglatpü kuh la tsü züdung ko nühjünü abükyü te nyengchocho roh-i, abükyü ko abükyü kuh la lirüti nüchehng.”

²³ Achotsü anyünü wü Rahab, atpa ko amungrüti ko arüh tsutpurü apüm nüchehcho. Arühnü arüh tsutpurü ko ayurüti atümung nowü Israelrü müdongchah shündhün yohpücho.

²⁴ Hütsüpü arühnü yangdila tsü michang thsürang lüpcho trüp-pehjücho, ta hon, taripi ko imüyengnü külüpcho kohrotilü khyo Abüdongba kuthsi la yohcho.

²⁵ Ko Joshua-nü nahtrahnaxenglatpü Rahab ko arüh jünirü apüm nyingjücho, tunüo abükyünü abinü müthehcho füzathsarü anyüh tsü rangsohcho. (Abükyü trah chünye yingcheh Israel la lire)

²⁶ Hütsüpü Joshua-nü amüzahnung khüdu yuchüm yocho: “Sünü Jeriko thali külüpchinung müküpnang abilü Abüdongba chokehchola pohki linung. Sünü müsunang atsurü aukhuba sünung; Sünü tbükhüm külüpnang atsurü achangba sünung.”

²⁷ Hütsüta Joshua te Abüdongba licho ko abi anengkhong tsü limih apümlang müdhecho.