JOSHUA 5 - AMÜSA BAIBEL (BSI)

¹ Jordan nyüzüdulang Amor-rü yangthsarü atümung ko Mediteranean kihdi jüp liba Kanan-rü yangthsarü atümungnü Abüdongba-nü Israel apüm mükhukhangde, Jordan yongkhi kungsohchoepü yuchicho. Arühnü Israelrü drüpehcho ko arüh müci sümcho.

Gilgal la Müjüp-pehcho

² Hütsüpü Abüdongba-nü Joshua te yocho, “Lungthsuh külüpm ko Israelrü müjüp-pehjüng.”

³ Achotsü Abüdongba-nü mülacho kyo Joshua-nü nguchicho ko abinü Müjüp-pehba Khang pü dsiba müdümla Israelrü müjüp-pehjücho.

^4-6 Khode Israelrü Ijip pehjücho, adhrerüecho apüm müjüp-pehpü licho. Ta, akungaselih la kang yüre tsehde, adhrerü akhunga süsü mümüjüp-pehpü licho. Adesü, arühnü Ijip pehjüde khatala wüxah adhrerü apüm hütsü bekhyah chihde sükhangpehpü licho, tunüo arühnü Abüdongba yocho mühnyicho. Abinü yuchümcho kyo, arüh jümürü te nyengchoba nyikih ko thsakukih pohyaba lih tsü müngusohcho.

⁷ Hiri tsuzarüti tsü süsü mümüjüp-peh-echo ko hiba asi shang tsü Joshua-nü müjüp-pehjücho.

⁸ Müjüp-pehba nguchi tsü thümpü khanglang, yucho shünü madhsa tsü mükyangde arüh lichah du licho.

⁹ Abüdongba-nü Joshua te yocho, “Chünye Ihnü nührü Ijip la ayurü thsa liba ashah tsü pehjüre” Hütsünü hiba müdüm te Gilgal pü dsicho ko hiba neng tsü ade yingcheh lile.

¹⁰ Israelrü Jeriko shündhün Gilgal ngah la liyade, hütsüba choo nyümong dhüremüyüu romang arühnü Phungkhu Thsüti mungcho.

¹¹ Nyümong khüu tsü arühnü akhudiba Kanan lih lanü chürocho tsang tsucho: aruhcho tsang ko bhüpza müyohcho hümdhse.

¹² Hütsütinü manna mülongcho ko Israelrünü adelü manna mübichicho. Hütsü shikhe tinü arühnü Kanan lih lanü chürocho tsang tsucho.

Joshua ko Nohsheng biba Nyitsarü

¹³ Joshua Jeriko shündhün lide, abinü dhrongyengnü nohsheng bipü nyüh khüdu abi bete ngucho. Joshua-nü abi yang küdu tsingdhingcho, “Nüh ihrü rothsarü yola khüdu a mahkhang arorüh khüdu-o?”

¹⁴ Nyitsarüba tsünü lalingcho, “Süsü mah, Ih Abüdongba rothsarü yola anüchirü.” Joshua-nü alih la hapkeh abi mübü yocho, “Abüdongba, Ih Nü dikehrü lile. Nühnü I khyang tu nguchisohnyüro?”

¹⁵ Ko Abüdongba rothsarü anüchiba tsünü abi te yocho, “Nü jingkhüm khyüchehng; nüh yaba müdüm tsü Amüsa.” Ko Joshua-nü abi te yocho kyo nguchicho.